Kwamamaza

Ni uwuhe muzimu wateye uturere twa Kicukiro, Nyabihu, Musanze, Gakenke...mu mihigo?

Yanditswe kuya 15-09-2016 saa 13:04' na Cyprien Niyomwungeri


Kuva mu mwaka wa 2006 Guverinoma y’u Rwanda yashyizeho politiki y’Imihigo hagamijwe gukorera hamwe no gutuma abantu bagira ibikorwa ibyabo, bityo bikihutisha gahunda z’iterambere ry’abaturage.

Uko umwaka w’Ingengo y’Imari utashye, abayobozi mu nzego z’ibanze n’inzego bwite za Leta besa imihigo bagasinya n’iyo bazahigura mu mwaka ukurikiyeho. Muri uyu muhango hanatangwa amanota kuri buri turere hitawe ku mihigo twesheje.

Ntabwo bitangaje kuba akarere kakitwara neza mu mihigo kuko abatuyobora bemeza ko baba bahawe byose ngo bayese, ahubwo igiteye ikibazo ni ugusanga hari utwituriye mu myanya ya nyuma cyangwa tugahananuka mu ya mbere tukajya mu ya nyuma.

Mu muhango wo kwesa imihigo ya 2015/2016 no guhiga iya 2016/2017, Minisitiri w’Intebe, Anastase Murekezi yakomoje ku turere dukomeje kwitwara nabi tugaragara mu myanya ya nyuma utundi tugasubira inyuma.

Yagize ati “Ni ikibazo gikomeye cyane. Uturere twa Nyabihu, Musanze, Rubavu, Rutsiro, Gakenke, Karongi na Ruhango twakomeje kugaragara mu myanya 10 ya nyuma ni ikibazo gikomeye. Hari uturere twasubiye inyuma, rwose, Kicukiro, Burera, Kamonyi ni uturere twajyaga tuza imbere cyane none turabarirwa inyuma cyane.”

Yavuze ko mu mpamvu zituma uturere tuza inyuma harimo imikoranire itanoze hagati ya nyobozi, njyanama n’abakozi b’Akarere ndetse no hagati y’abayobozi b’Akarere n’abafatanyabikorwa babo mu rwego rwa JAF, ruswa no kutamenya guhiga bigendenye no guhindura ubuzima bw’abaturage.

Kicukiro

Akarere ka Kicukiro ni kamwe mu turere dukomeje gusubira inyuma umusubirizo mu kwesa imihigo. Mu mwaka wa 2013/2014 kari ku mwanya wa mbere, 2014/2015 kaba aka gatanu naho mu 2015/2016 kaza ku mwanya wa 20.

Kubwa Minisitiri w’Intebe, Murekezi, uku gusubira inyuma kwa Kicukiro asanga ari ikibazo gikomeye gishingiye ahanini ku kuba nyobozi idafite umurongo wo gushyira hamwe mu miyoborere.

Mu nshuro nyinshi IGIHE yagerageje kuvugana n’ Umuyobozi w’Akarere ka Kicukiro, Dr. Nyirahabimana Jeanne, kuva kuwa Mbere tariki ya 12 Nzeri 2016, mu gitondo cyo kuri uyu wa Kane nibwo yitabye telefoni agira ati “Nta kanya mfite ko kuvuga kuri ibyo, mfite abantu turi kumwe.’’

Umuyobozi w’Akarere ka Kicukiro, Dr. Nyirahabimana Jeanne

Nyabihu

Akarere ka Nyabihu ni kamwe mu turere turindwi tugize Intara y’u Burengerazuba, imyaka itatu ikurikirana ntabwo kabashije kwitwara neza mu kwesa imihigo kabaga kahize.

Mu mwaka wa 2013/2014, Nyabihu yabaye iya 22, mu wa 2014/2015 nabwo iba iya 22, naho umwaka ushize wa 2015/2016 iba iya 23. Guhera muri 2011/2012, aka karere ntikazi uko kuza mu myanya y’imbere ya 20 bisa.

Umuyobozi w’Akarere ka Nyabihu, Uwanzwenuwe Théoneste yabwiye IGIHE ko by’umwihariko muri uyu mwaka ushize, basubijwe inyuma n’imihigo nka Mitiweli bari biyemeje kugera ku 100% bakagera hafi kuri 80% na gahunda ya Girinka itarashyizwe mu bikorwa uko bikwiye.

Akomeza avuga ko imihigo bahuriyeho n’izindi nzego yabashegeshe cyane, aho bagombaga gufatanya na Minisiteri y’Ubuhinzi n’Ubworozi (Minagri) kubaka imihanda yoroshya ubuhahirane (Feeder roads) ntibigerweho uko byateganyijwe.

Yagize ati “Imihanda byatewe n’abo twagombaga kubifatanya aribo Minagri, twahize kubaka ibirometero 28 umwaka urangira hari 7.5 bitubatswe.”

Uwanzwenuwe avuga ko muri uyu mwaka bihaye ingamba zikaze kugira ngo bakureho umuvumo wabibasiye imyaka myinshi.

Yagize ati “Twihaye gahunda yo kwisuzuma buri gihembwe tukareba aho tuvuye n’aho tugeze ku buryo tuzajya gusoza umwaka twaramaze gukosora ibitagenda neza.”

Umwaka ushize Nyabihu yakoresheje ingengo y’imari ingana na Miliyari 12.

Umuyobozi w’Akarere ka Nyabihu, Uwanzwenuwe Théoneste

Musanze

Aka karere gakomeje kwiturira mu myanya y’inyuma cyane kuko nko muri 2013/2014 kari aka 27 muri 2014/2015 kaba aka 13 naho mu mwaka ushize wa 2015/2016 kaba aka nyuma ku mwanya wa 30.

Akarere ka Musanze kanengewe imbere y’Umukuru w’Igihugu ko abakozi bako bigenga, bikorera ibyo bashatse nyobozi irebera. Minisitiri w’Intebe, Murekezi, yaciye amarenga ko iki kibazo kirambye muri Musanze.

Yagize ati “Abakozi barakora ibyo bashaka nibo bayobozi nkuko bari barabimenyereye kuva mbere, ntabwo ari byo, ntabwo ari byo, nyobozi igomba kuyobora rwose.”

Umuyobozi w’Akarere, Musabyimana Jean Claude, yemera ko iki kibazo gihari kandi batangiye gukora isuzuma ngo gikemuke.

Ku birebana n’imihigo, avuga ko icyatumye baba aba nyuma ari uko bahize imihigo yo kubaka imihanda ariko ugasanga abayigendamo hari abarwaye imvunja, bahize kubaka ibigo nderabuzima ariko abaturage ntibishyure ubwisungane mu kwivuza.

Ahandi ngo hubatswe amashuri ariko ntibyabuza ko umubare w’abana benshi bayata ndetse bamwe bakajya kwibera mu muhanda. Musanze yabaruwemo abarwayi ba bwaki benshi nk’ikimenyetso cy’imiririre mibi, aho abana basaga 400 bari barwaye iyi ndwara.

Umuyobozi w’Akarere, Musabyimana Jean Claude

Rutsiro

Mu mwaka wa 2013/2014, Akarere ka Rutsiro kari ku mwanya wa 18 , muri 2014/2015 gasubira inyuma kaba aka 23, umwaka ushize wa 2015/2016 bihumira ku mirari kaba aka 29 mu turere 30.

Mu muhango wo kwesa imihigo no guhiga iya 2016/2017, aka karere kavuzweho kumara amezi menshi nta buyobozi gafite, aho abakayoboraga bamwe bafunzwe kubera ruswa abandi bagatoroka.

Umuyobozi wako, Ayinkamiye Emerance, yabwiye IGIHE ko hari imihigo itarageze ku 100% bitewe n’ibibazo byagaragaye mu miyoborere y’akarere, imihindagurikire y’ikirere, impinduka mu buyobozi.

Yagize ati “Kubaka Guest House y’akarere, yagombaga kuzura uriya mwaka ubu yarahagaze burundu, amashanyarazi ngo habuze Cash power mu bubiko bwa REG, ifumbire ntiyakoreshejwe, byose byatewe n’imiyoborere mibi kandi ababikoze batawe muri yombi.”

Muri Werurwe uyu mwaka uwari Meya wa Rutsiro, Byukusenge Gaspard yatawe muri yombi akekwaho icyaha cyo kwaka ruswa umushoramari wagombaga kubaka ‘Guest house’ ya Rutsiro hamwe no kwigwizaho umutungo.

Uwahoze ari Umunyamabanga Nshingwabikorwa w’Akarere ka Rutsiro, Murenzi Thomas, nawe yatawe muri yombi muri Mutarama uyu mwaka, akekwaho kwaka ruswa rwiyemezamirimo wari watsindiye isoko ryo kubaka Guest House y’Akarere amubeshya ko ari ugutera inkunga amatora.

Umuyobozi w'Akarere ka Rutsiro, Ayinkamiye Emerance

Gakenke

Akarere ka Gakenke muri 2013/2014 kari ku mwanya wa 15, mu mwaka wa 2014/2015 kaza ku mwanya wa nyuma wa 30, mu wa 2015/2016 nabwo kaza ku mwanya wa 27.

Umuyobozi w’Akarere, Nzamwita Deogratias, yabwiye IGIHE ko ikintu gikomeje gushegesha akarere ari uruhare rw’abaturage mu mihigo.

Yagize ati “Abaturage usanga bavuga ko nta ruhare bagira mu mihigo ndetse bakayifata nk’itari iyabo, twiyemeje kubegera kugira ngo imihigo y’akarere bayiyumvemo bayigire iyabo.”

Umuyobozi w’Akarere, Nzamwita Deogratias

Muri uyu mwaka ngo hari ibigo bari bafatanyije imihigo bitayirangije. Meya Nzamwita avuga mo nk’ikigo cy’Igihugu gishinzwe ingufu, REG, cyakoze 30% by’ibyo cyari cyiyemeje mu gukwirakwiza amashanyarazi mu baturage. Impamvu cyatanze ngo cyabuze Cash Power n’insinga.

Ikindi kigo gitungwa agatoki nk’icyasubije inyuma akarere ka Gakenke, ni igishinzwe ubuhinzi n’ubworozi, RAB, cyagombaga gutera intanga amatungo ku kigero cya 100% ariko kikabikora ku kigero cya 60%.

Nzamwita avuga ko by’umwihariko uyu mwaka bahuye n’ibiza bikangiza ibikorwa remezo akarere kari karakoze, abatanze amanota bagasanga byarangiritse.

Muri rusange ibindi bisubiza inyuma uturere harimo ko abayobozi batinda kwishyura ba rwiyemezamirimo babashakamo ruswa no gutegura imihigo yoroshye itazahindura ubuzima bw’abaturage.

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved