Ni ukuba ingayi no kubura uburere: Abacitse ku icumu bamaganye Idamange upfobya Jenoside yarayirokotse

Yanditswe na Uwimana Abraham
Kuya 13 Gashyantare 2021 saa 06:50
Yasuwe :
0 0

Umugani ugira uti “Abo umwami yahaye amata ni bo bamwimye amatwi,” si uw’ubu ahubwo wamyeho kuva kera. Abanyarwanda bawuca iyo babonye umuntu wagiriwe neza inyiturano ikaba kugaya no kwifatanya n’abashaka gushyira hasi uwagize iyo neza.

Kuri ubu uyu mugani wongeye gucibwa na benshi muri iyi minsi babishingiye kuri Idamange Ryamugwiza Yvonne, umubyeyi umaze iminsi wumvikanaho imvugo zipfobya Jenoside yakorewe Abatutsi, kandi ari mu bayirokotse wanagobotswe n’Ikigega kigenewe Gutera Inkunga Abacitse ku Icumu batishoboye, FARG.

Benshi mu bacitse ku icumu rya Jenoside yakorewe Abatutsi, nyuma yo kumva amagambo amaze iminsi atangazwa na Idamange, bahagurukiye kumunenga no kwamagana ibitekerezo bye, bavuga ko ari ukwibagirwa aho yavuye no kudashima.

Umuyobozi w’Umuryango ubumbiye hamwe abapfakazi ba Jenoside Yakorewe Abatutsi, AVEGA Agahozo, Mukabayire Valérie, yavuze ko badashobora kwihanganira umuntu wese upfobya Jenoside yakorewe Abatutsi uwo yaba ari we wese, by’umwihariko ngo iyo bikozwe n’uwacitse ku icumu ngo biba biteye agahinda kurushaho.

Yagize ati “Gupfobya Jenoside kuri twebwe, ni ugukomeretsa abantu, ni ukudaha agaciro ibyabaye mu gihugu. Uko abantu bababaye, uko Jenoside yabaye abantu barabizi, gutinyuka kuyipfobya ahubwo ni indengangakamere, ni amakosa akomeye, ni ikintu twebwe tudashobora kwihanganira.”

Yagarutse kuri Idamange wumvikanye apfobya Jenoside yakorewe Abatutsi avuga ko nta warokotse muzima ushobora gutinyuka ngo apfobye Jenoside.

Ati “By’umwihariko rero kuri uriya Idamange, sinzi aho yaturutse ntabwo njye muzi, no kuba avuga ko yarokotse ntabwo njye mbizi, nta n’ubwo byumvikana ukuntu avuga ko yarokotse kandi agapfobya Jenoside, ariko na we turamwamagana nk’abandi bose.”

Yongeyeho ati “Sinzi niba anatekereza neza, kuko niba yararokotse nk’uko abivuga, agomba kuba afite ikibazo cy’imitekerereze kugira ngo atinyuke gupfobya Jenoside kuri buriya buryo. Turamwamagana rero cyane nk’uko twamagana n’abandi bose, nk’uko twigeze tubamagana igihe cyose, nk’uko tuzanabamagana n’abandi bose bazaza nyuma ye.”

Mukabayire yavuze ko binashoboka ko hari abamushuka bakamukoresha mu gupfobya kugira ngo babone ijwi rivuga ko n’abarokotse Jenoside barimo bayipfobya.

Impuguke mu mateka akaba n’umwanditsi w’ibitabo, Isaïe Murashi, na we yagarutse kuri Idamange uri kugarukwaho ku mbuga nkoranyambaga zitandukanye hirya no hino kubera ibiganiro bye byuzuyemo amagambo apfobya Jenoside, avuga ko akwiriye kwamaganwa.

Ati “Icyo mbivugaho ni uko umuntu wese upfobya Jenoside aba akwiye kwamaganwa n’Abanyarwanda bemera Jenoside, aba ari kumwe n’abatayemera kandi bayipfobya cyangwa se bayikoze. Uwo rero n’ubwo yaba avuga ko yayirokotse aba yivuguruza, ntawe umenya icyo aba atekereza nta n’umenya icyo aba agamije, aba ari umuntu udakwiye gushyigikirwa ukwiye kwamaganwa gusa.”

Yongeyeho ati “Uriya Idamange simuzi, uretse biriya yanditse nasomye numvise no kuri YouTube, biriya ni ibigambo bibi cyane bipfobya Jenoside, ibyo byo nta kubishidikanyaho. Ikibyihishe inyuma rero ntabwo nakimenya kuko simuzi, ariko rero ikigaragara cyo ni uko atari mu murongo mwiza.’’

Murashi yavuze ko hari benshi muri iki gihe basigaye bajya mu murongo ugayitse wo gupfobya Jenoside bagamije amaramuko.

Yakomeje ati “Hari ababa bashakisha amafaranga kuri YouTube kuko iyo uvuze ibintu byinshi, ukagira abantu benshi bagukurikira, baguha amafaranga kuri YouTube.”

“Rero ni imirongo mishyashya iriho, ni uburyo bushyashya bwo kurwanya leta, ni uburyo bushya bwo kurwanya Jenoside burahari cyane, ku buryo n’abitwa ngo barayirokotse bapfa kubijyamo batazi ibyo ari byo, bagenda bahuzagurika abandi babikorana ubushake.”

-  FARG yamurihiye amashuri na yo yamwamaganye

Umuyobozi w’Ikigega kigenewe Gutera Inkunga Abacitse ku Icumu batishoboye, FARG, Uwacu Julienne, yabwiye IGIHE ko biteye agahinda kuba hari abantu bagihakana Jenoside kandi yaremewe n’Isi yose.

Yavuze ko kuba Jenoside yarakozwe Isi yose irebera n’ibimenyetso byayo bikaba bihari, ariko igapfobywa n’uwayirokotse ari ishyano.

Yagize ati “FARG rero by’umwihariko nk’ikigega cya Leta cyashyiriweho gufasha abacitse ku icumu rya Jenoside batishoboye, kubona umuntu nka Yvonne, icya mbere abayobozi b’iki gihugu bashyizeho uburyo bwose bwo gutuma abarokotse Jenoside bongera bakabaho, bafashwa muri gahunda zitandukanye. Yvonne ni umwe mu bafashijwe, uretse kubona umutekano, uretse guhumurizwa, Yvonne yarihiwe amashuri.”

“Kuba ashobora gutinyuka agatesha agaciro ineza igihugu cyamugiriye, ni ukuba “nyamwanga iyo byavuye”, ni ukuba ingayi, ni ukubura uburere, byaratubabaje, turabyamagana kandi tukanavuga ko inzego zishinzwe kureba uko amategeko yubahirizwa zikwiye kuba zimukurikirana ku byaha biri mu magambo yirirwa atangaza ku mbuga nkoranyambaga.”

Uwacu yavuze ko abacitse ku icumu muri rusange badakwiye kuzigera na rimwe bibagirwa ibyo banyuzemo, n’uburyo bongeye gusubizwa ubumuntu, kandi ngo n’uwaba agifite ibibazo Leta yiteguye kumuba hafi.

Ati “Abacitse ku icumu, icya mbere bakwiye kuzirikana amateka yabo, bakazirikana ububi bwa Jenoside, bakazirikana abatumye bayirokoka n’ibyiza byose bakorewe kugeza uyu munsi, n’uwaba agifite ibibazo bitarakemuka, agashaka uburyo bwiza bwo gusaba ko ikibazo cye cyumvikana.”

Idamange Ryamugwiza Yvonne yavukiye mu Karere ka Kamonyi ari naho yize, akarangiriza amashuri yisumbuye muri Ecole Musambira arihirwa na FARG, icyo gihe yarerwaga na mukuru we, we ugihabwa ubufasha butandukanye bugenerwa abacitse ku icumu rya Jenoside batishoboye.

Arangije amashuri yisumbuye yashakanye na Eng Mabumba Oswald, babyarana abana bane, gusa kuri ubu ntibakibana kuko uyu mugabo we asigaye aba muri Sudani y’Epfo.

Eng Mabumba kandi aherutse gutangaza ko yitandukanyije n’ibitekerezo by’uwahoze ari umugore we, avuga ko we n’abana babo ari abaturage bakunda u Rwanda batifatanyije n’imitekerereze ya Idamange.

Benshi mu bacitse ku icumu bagaragaje ko bifuza ko Idamange yakurikiranwa ku cyaha cyo gupfobya Jenoside, kuko uwayirokotse akayipfobya aba yifatanyije n’abayikoze.

Amategeko asobanura gupfobya Jenoside nk’imyitwarire iyo ari yo yose igambiriwe kandi igaragajwe mu ruhame mu buryo ubwo ari bwo bwose, igamije kugabanya uburemere cyangwa ingaruka ya Jenoside no koroshya uburyo Jenoside yakozwemo.

Ibitekerezo n'imvugo bya Idamange Yvonne byamaganiwe kure n'abacitse ku icumu
Umuyobozi w’Umuryango ubumbiye hamwe abapfakazi ba Jenoside Yakorewe Abatutsi, AVEGA Agahozo, Mukabayire Valérie, yavuze ko bamaganye Idamange n'abandi bose nka we
Umuyobozi wa FARG, Uwacu Julienne, yavuze ko babona ibiri gukorwa Idamange ari ukuba ingayi no kwirengagiza aho igihugu cyavuye
Umushakashatsi Murashi yavuze ko Idamange ashobora kuba afite abamushuka, bakamujyana mu murongo wo gupfobya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .