Kwamamaza

Ni ryari leta izarekeraho guha abakobwa amahirwe yihariye mu mashuri?

Yanditswe kuya 19-09-2016 saa 12:36' na IGIHE


Guverinoma y’u Rwanda ishyize imbere guha abakobwa amahirwe angana mu burezi, hagamijwe kuziba icyuho kimaze igihe cy’ihezwa ry’abakobwa, gishingiye ku miryango yumvaga ko umukobwa agomba kuguma mu rugo agatekera basaza be, agakora n’indi mirimo y’imuhira.

Leta ifite uburyo bwo kutagendera ku manota amwe hagati y’abahungu n’abakobwa boherezwa mu mashuri ya leta biga bacumbikirwa, abakobwa bagafatirwa ku inota riri hasi y’abahungu, bamwe bakabifata nko gushyigikira utatsinze ndetse bakibaza niba bizagira iherezo.

Nko mu 2015 impuzandengo y’inota fatizo mu bari bagiye mu mashuri yisumbuye, ku bakobwa yari 21 mu gihe ku bahungu bafatiye ku manota 18. Mu cyiciro rusange, abakobwa bafatiwe kuri 51 mu gihe abahungu yari 45 (uko impuzandengo iba nini niko amanota aba yabaye make.)

Aha umuntu yakwibaza impamvu nk’umuhungu agira 46 akabura ishuri kandi umukobwa wagize 51 akaribona nta mpungenge.

Mu kiganiro na IGIHE, umuyobozi Mukuru w’Ikigo cy’Igihugu cy’Uburezi, Dr Gasana Janvier, yagaragaje ko ubusanzwe inota fatizo ry’abatsinze ku bakobwa n’abahungu ari rimwe, ngo kuba iry’abakobwa rijya hasi bigaterwa n’umubare w’imyanya ibigo by’amashuri bibakira biba bifite.

Yagize ati “Hari ibigo by’amashuri byinshi byakira abakobwa gusa cyangwa n’ibyakira abahungu n’abakobwa icyarimwe. Niba imyanya y’abakobwa ihari amanota bafatirwaho aramanuka kugeza ubwo tugera ku inota rituma ibona abayijyamo, ariko ntibivuze ko baba batatsinze kuko n’abatemererwa kujya kwiga mu bigo bibacumbikira baba batsinze.”

Ubu buryo ariko ngo si bushya kuko bwariho kuva abanyeshuri batangira kwiga bacumbitse mu bigo bigamo, ahubwo ngo abantu bari bataramenya uko bikorwa.

Gasana yakomeje agira ati “Ntibyareka kubaho kuko imyanya y’abahungu ntingana n’iy’abakobwa. Kuringanira ntabwo ari ugushyiraho irati. Icy’ingenzi ni uko abantu babona amahirwe angana.Tuzakomeza gusobanurira Abanyarwanda impamvu bikorwa.”

Abahungu bararusha abakobwa gutsinda

REB ivuga ko umubare w’abakobwa bari mu mashuri n’ubusanzwe uruta abahungu, ndetse ibarura rusange ry’abaturage ryo mu 2012 ryerekanye ko abagore mu Rwanda ari 52% by’abaturage bose.

Ibi bituma impuzandengo y’umubare w’abatsinda ibizamini bya leta iba igaragaza ko abakobwa batsinze ikizamini cya leta ari benshi buri ngihe baruta abahungu, ariko uwo mubare ntutanga ibisobanuro byuzuye ku mitsindire y’umukobwa muri iki gihe.

Nk’abanyeshuri batsinze ikizamini gisoza icyiciro rusange mu 2013 bari 85% by’abakoze uwo mwaka bose, 50.28% bari abakobwa na ho 49.72% ari abahungu. Abatsindiye ku inota ryo hejuru bari 10%, abahungu biganje kuri 64.30%, naho abakobwa ari 33.70%.

Mu 2014 abatsinze ikizamini gisoza amashuri yisumbuye bari 89.1%, abahungu muri rusange ari 51.1% mu gihe abakobwa bari 48.9%. Muri uwo mwaka abatsinze ikizamini gisoza amashuri abanza, abakobwa bari 54.75% abahungu baba 45.25%, abahungu biharira inota ryo hejuru.

Mu 2015 naho abatsinze ikizamini gisoza amashuri abanza, abakobwa bari 54.67% mu gihe abahungu ari 45.33%. Abatsindiye ku inota ryo hejuru bari 4.04%, muri uwo mubare hakabamo abahungu 58.2 % mu gihe abakobwa ari 41.8%.

Mu cyiciro rusange ho abakobwa batsinze ari 51.70 % n’abahungu 48.30%, gusa abatsindiye ku inota ryo hejuru bangana na 10%, barimo abahungu 64.38% n’abakobwa 35.32 %.

REB iri gukora ubushakashatsi

Gasana Janvier uyobora REB yakomeje avuga ko iyi mibare igaragaza ko hari ingufu zigikeneye gushyirwa mu guteza imbere umwana w’umukobwa, hakitabwa ku bibazo byaba bigishingiye ku mateka y’u Rwanda yakomeje guheza igitsina gore.

Ati “Haracyari aho usanga mu cyaro bagira nk’akazi bavuga bati umukobwa nagakore, ejobundi azarongorwa anagende! Hari nk’aho biga bataha, ugasanga ku mugoroba umukobwa niwe uhihibikana yoza ibyombo afasha nyina, mu gihe nk’umuhungu aba asubiramo amasomo cyangwa yagiye kwikinira umupira.”

Gasana yavuze ko hari inzego bakomeza gukorana mu gushishikariza ababyeyi n’abana akamaro k’uburezi bw’umwana w’umukobwa,harimo nka Minisiteri y’Uburinganire n’Iterambere ry’Umuryango (MIGEPROF), Inama y’Igihugu y’Abagore, Urwego rushinzwe guharanira iyubahirizwa ry’Ihame ry’Uburinganire n’izindi.

Yakomeje agira ati “Hari ubushakashatsi turimo ducukumbura ngo turenge ibibazo bihari turebe impamvu zibitera, niba ari abarimu b’abagabo babigisha bituma batabiyumvamo cyangwa izindi mpamvu. Gusa iyo urebye mu masomo asanzwe nk’indimi usanga nta kibazo, ariko byagera nko mu masiyansi, imibare n’ibindi, bigafata indi ntera.”

MIGEPROF isaba ko kwita ku burezi bw’umukobwa byongerwa

Minisiteri y’Uburinganire n’Iterambere ry’Umuryango (Migeprof) isanga gufatira ku inota ryo hasi ku bana b’abakobwa biri mu murongo wo kuziba icyuho cyabayeho hagati y’abakobwa n’abahungu kubera amateka igihugu cyanyuzemo.

Minisitiri w’Uburinganire n’Iterambere ry’Umuryango, Dr Gashumba Diane, yagize ati “Tubona ari imbaraga zashyizwe mu guteza imbere umwana w’umukobwa kimwe n’izindi gahunda zigamije guteza imbere uburinganire kandi bigararagara ko abakobwa na bo bashoboye.”

Ku gihe iyi gahunda yumva yazarangirira, yakomeje agira ati “Numva twakwicara nk’inzego zitandukanye tukareba aho imibare yo kuzamura abana b’abakobwa igeze kimwe n’izindi ngamba zashyizwe mu kubazamura n’uburyo babyumva. Iyo uhereye ku mibare ni bwo umenya aho werekeza.”

Guverinoma ikomeza gukora byinshi mu gusakaza uburezi budaheza, ndetse abakobwa nubwo badatsinda ku rwego rwo hejuru, ntibagaragara cyane mu mibare y’abata ishuri nk’uko bimeze kuri basaza babo.

U Rwanda ruheruka kuza ku mwanya wa mbere muri Afurika n’urwa 7 ku Isi mu kuziba icyuho mu buringanire, na gahunda yo kurandura ivangura ryose rishingiye ku gitsina, abagabo n’abagore bakagira uburenganzira bungana mu rugendo rw’iterambere, Isi ikaba yarihaye intego yo kugera ku buringanire busesuye bitarenze 2030.

Umuyobozi w'Ikigo cy'Igihugu gishinzwe Uburezi, Gasana Janvier

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved