Kwamamaza

Ni ruhare ki urubyiruko rwagira mu kubaka amahoro no kurwanya amakimbirane mu ngo?

Yanditswe kuya 18-09-2016 saa 21:47' na IGIHE


Buri mwaka Isi yose yizihiza Umunsi Mpuzamahanga w’Amahoro tariki ya 21 Nzeri, wemejwe na Loni nk’inzira yo kurushaho gushyira imbaraga mu bikorwa byo kubaka amahoro mu bihugu n’ababituye bose.

Insanganyamatsiko y’uyu mwaka yahujwe n’intego z’iterambere rirambye kuko ridashoboka mu gihe nta mahoro ahari.

Ijyanye kandi n’icyerekezo 2030 ibihugu biri muri Loni byiyemeje harimo kurandura ubukene hatezwa imbere ubukungu kuri bose.

Mu gihe hirya no hino mu Rwanda hakunze kumvikana amakimbirane mu ngo hakaba ubwo akagera no ku rwego rw’impfu mu bashakanye cyangwa abana, urubyiruko rwagaragaje ko hari uruhare rwagira mu kuyakumira.

Hari mu gikorwa cyateguwe n’Ikigo cy’Ubushakashatsi n’Ubusabane bigamije Amahoro, IRDP, cyahuje urubyiruko tariki ya 18 Nzeri, aho iki kigo cyizihije umunsi w’Amahoro ku cyicaro cyacyo kiri ku Gisozi mu mujyi wa Kigali.

Urubyiruko ruri mu matsinda y’ibiganiro mu mashuri yisumbuye 42 yo mu Ntara zose zigize igihugu rwari rwitabiriye amarushanwa mu biganirompaka n’ibihangano birimo imivugo, indirimbo, ikinamico n’indi baganira ku “ruhare rw’Urubyiruko mu kwimakaza amahoro n’amajyambere arambye” ariko by’umwihariko ku kurwanya amakimbirane mu ngo.

Umuyobozi wungirije w’Ikigo cy’Ubushakashatsi n’Ubusabane bigamije Amahoro, IRDP, Bugingo Irenée, yavuze ko amakimbirane ari ikibazo kiri hirya no hino mu gihugu nk’uko byagaragajwe n’ubushakashatsi iki kigo cyakoze buzashyirwa ahagaragara mu cyumweru gitaha.

Yagize ati “Amakimbirane mu ngo ni ikibazo kiri hirya no hino. Abana tubona mu mihanda, abatwara inda zitateguwe ,abata amashuri ni uko biba byaturutse ku makimbirane yo mu ngo. Kubiganiraho ni ukugira ngo abana na bo babitekerezeho babyumve;ubwabo barabimenya banatange n’inama ku bandi, baba ababakurikira n’abo babana.”

Nubwo abana bakiri mu mashuri baba bakiri bato, Bugingo ahamya ko bafite ibitekerezo bikomeye nk’iby’abakuru kuko bitegereza ibibera iwabo n’aho batuye, bikaba bishobora no kugenderwaho mu bushakashatsi.

Bugingo ati “Nubwo bigaragara ko ari bato bafite ibitekerezo bikomeye,ntaho bitandukaniye n’iby’abantu bakuru,ibyo tubona na bo barabibona nubwo babivuga mu magambo yabo. Ukora ubushakashatsi areba ibyiciro bitandakunye .Iyo tuganiriye n’abana tugasanga bahuje n’ababyeyi twe nk’abashakashatsi tuvuga ko ibyo twabwiwe bifite ireme.”

Bamwe mu banyeshuri bitabiriye aya marushanwa bagaragaje ko nubwo ahanini amakimbirane mu ngo akomoka ku bwumvikane buke bw’ababyeyi, hari n’uruhare rw’abana.

Rimwe na rimwe ngo hari abana bararikira ibyo badashobora kubona mu miryango yabo bikaba byatuma bahava bakajya mu buzima bwo mu muhanda n’ahandi.

Kayitesi, Umunyeshuri waturutse mu ishuri ryisumbuye APAGE Musha mu Ntara y’Uburasirazuba yavuze ko uruhare rw’urubyiruko ari ukugira inama bagenzi babo bagira imico mibi yatuma batumvikana n’ababyeyi bagakurikiza impanuro bahabwa.

Mukurarinda Deogratias wiga mu Iseminari nto ya Ndera (St Vincent),yavuze ko abana bakwiye kuganira hagati yabo birinda koshyanya, buri wese akabaho ubuzima buhwanye n’ubushobozi bwe cyangwa ubw’umuryango we.

Uwitwa Clemence waturutse kuri Mater Dei Nyanza, yavuze ko hari ubwo abana bahembera amakimbirane biturutse ku myitwarire idahwitse no kutubaha avuga ko abana bakwiye kwibuka indangangaciro z’umuco nyarwanda zirimo kwicisha bugufi no kubaha, bakirinda guhugira ku mbuga nkoranyambaga ngo bibabuze kuzuza inshingano zabo.

Ubushakashatsi bwakozwe na IRDP ku makimbirane yo mu miryango buzashyirwa ahagaragara umunsi umwe nyuma yo kwizihiza Umunsi Mpuzamahanga w’Amahoro, ni ukuvuga tariki ya 22 Nzeri uyu mwaka, nyuma bukazamenyekanishwa kugeza mu nzego z’ibanze zegereye abaturage.

Bimwe mu bitera amakimbirane mu ngo birimo ubukene, uburere n’umuco w’abantu, uko bagiye bashing imiryango, umuvuduko w’iterambere igihugu kigezeho n’ibindi nk’uko ubuyobozi bwa IRDP bubitangaza.

Muri aya marushanwa,yasorejwe ku rwego rw’igihugu yitabiriwe n’abatoranyijwe mu turere, hakaba hahembwe batatu ba mbere muri buri cyiciro.

Mu makinamico hahembwe itsinda ryaturutse i Gicumbi, iry’umujyi wa Kigali na Rwamagana.Mu mivugo hahembwe, abaturutse i Rwamagana, Gicumbi na Nyanza;mu ndirimbo hahembwe abaturutse mu Mujyi wa Kigali, Rwamagana na Nyanza na ho ku nkuru ishushanyije hahembwe , Kigali, Rwamagana na Nyanza n’ibindi.

Umuyobozi wungirije w’Ikigo cy’Ubushakashatsi n’Ubusabane bigamije Amahoro, IRDP, Bugingo Irenée
Bamwe mu banyeshuri bari bitabiriye amarushanwa baturutse mu Ntara zigize u Rwanda
Bamwe mu bakozi ba IRDP bakurikiranye uko amarushanwa yagenze
Abanyeshuri bitabiriye amarushanwa ubwo bahabwaga amabwiriza y'uburyo ari bugende
Clemence wiga muri Mater Dei i Nyanza asanga hari ubwo abana bahembera amakimbirane mu miryango
Imwe mu nyubako ya IRDP ku Gisozi mu mujyi wa Kigali

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved