Ni nde nyirabayazana w’idindira ryo kwagura ibitaro bya Nyanza?

Yanditswe na Kanamugire Emmanuel
Kuya 30 Kanama 2016 saa 01:09
Yasuwe :
0 0

Ubuyobozi bw’Ibitaro bya Nyanza bwishyuye rwiyemezamirimo amafaranga yose atararangiza imirimo y’inyubako yari yahawe ahita agenda, mu gihe we [Rwiyemezamirimo] avuga ko imirimo yagombaga gukora yongerewe ntiyahabwa amasezerano akaba yarishyuwe ibihwanye n’ibyo yakoze.

Ibi bibazo biri mu byaba byaratumye uwayoboraga ibitaro bya Nyanza n’abandi bakozi babiri kuri ubu baraburiwe irengero.

Muri Mata 2015, ubuyobozi bw’Ibitaro bya Nyanza bwemeje ko bugomba gusana ‘Clinic’ kugira ngo bubone ibyumba byo mu rwego rwo hejuru ‘VIP Rooms’ byazajya byakirirwamo abarwayi kubera ko hari abazaga bakabura ibyumba byihariye barwariramo.

Hatazwe isoko ritsindirwa na Sun Hill Ltd, igirana amasezerano n’ubuyobozi bw’ibitaro tariki ya 15 Kamena 2015. Mu masezerano hari hakubiyemo ko bagomba gusana iyo ‘Clinic’ mu gihe cy’amezi atatu uhereye igihe amasezerano yasinyiwe. Bakubaka ibyumba umunani, bigatwara miliyoni 15.684.500 z’amafaranga y’u Rwanda.

Rwiyemezamirimo amaze amezi abiri atangiye imirimo, ubuyobozi bw’ibitaro bwaje kubona ko ‘plan’ bari bakoze bagomba kugira ibyo bayihinduraho. Icyo gihe biva ku byumba umunani bijya ku byumba 11, bumvikana na rwiyemezamirimo ko bamwongera miliyoni 3.135.900 angana na 20% nk’uko biteganywa n’amategeko agenga itangwa ry’amasoko.

Rwiyemezamirimo yishyuwe amafaranga yose atarangije inyubako

Imirimo igeze hagati rwiyemezamirimo yasabye ko bamwishyura igice cya mbere, yongera gusaba andi mafaranga ku nshuro ya kabiri avuga ko nta bikoresho afite, itsinda ribishinzwe ryemeza ko bamwishyura miliyoni 16. 347. 894. Tariki ya gatatu z’ukwezi kwa Kanama 2015 , yasabye andi mafaranga, bakora inyigo y’imirimo yari imaze gukorwa babona ko igeze kuri 86,3%, bemera ko bamuha andi mafaranga.

Dr Ngiruwonsanga Pascal, Umuyobozi w’agateganyo w’Ibitaro bya Nyanza yagize ati “Mu kwezi kwa 9, nyuma y’ukwezi bamuhaye igice cya kabiri byaje kugaragara ko n’ayarasigaye yaje kuyaka kugira ngo akomeze imirimo. Ubuyobozi bwariho icyo gihe bwarayamuhaye yose. Ni ukuvuga ngo rwiyemezamirimo yishyuwe amafaranga yose angana na miliyoni 18.820.400, kandi imirimo itararangira. Muri raporo bagaragaza ko imirimo yari yarangiye ariko mu by’ukuri kuri ‘terrain’ imirimo itararangira.”

Uyu muyobozi yakomeje avuga ko muri raporo nta hantu bigaragara ko imirimo yarangiye 100%, ahubwo handitswe ko bimwe mu bikorwa byari biteganyijwe byarangiye 100%, ariko ntaho bashyize imirimo yari isigaye gukorwa kugira ngo inyubako ibe yuzuye.

Ati “Isesengura twakoze twasanze inyubako igeze kuri 65% mu gihe bo bari bavuze ko (abayoboraga ibitaro bwa mbere) ko inyubako igeze kuri 86,5% ariko turateganya kuzashaka inzobere ikadukorera inyigo igaragaza ibyakozwe ndetse n’ibitarakorwa.”

“Ubuyobozi bwakoze amakosa abiri”

Dr Ngiruwonsanga Pascal, avuga ko abayoboraga ibi bitaro mbere y’uko aza hari amakosa bakoze. Ati “Ikosa rya mbere ryakozwe ubwo inyigo yakorwaga yagera hagati bakongera bakayisubiramo. Inyigo rero idateguye neza, n’ibikorwa na byo akenshi usanga bitegenda neza. Irindi kosa ryakozwe ni uburyo ubuyobozi bwagiriye icyizere rwiyemezamirimo bamwishyura amafaranga yose kandi atararangiza imirimo.”

Habuze ubwumvikane hagati y’ubuyobozi bw’ibitaro n’akanama gashinzwe gutanga amasoko

Dr Ngiruwonsanga avuga ko mu busesenguzi bakoze batavuga ko umukozi ushinzwe amasoko, Mushimiyimana Yvette yakoze amakosa.

Ati “Ikintu cyagaragayemo nuko hatabayemo ubwimvikane hagati y’akanama gashinzwe gutanga amasoko n’ibitaro. Icyo navuga bamukoresheje nk’ikosa ni uko kuri raporo yakorwaga kugira ngo rwiyemezamirimo yishyurwe na we yasinyagaho nk’umuntu wari uri mu kanama gashinzwe kwakira inyubako.”

Dr Ngiruwonsanga akomeza avuga ko mu ntangiriro z’uku kwezi imirimo y’inyubako izasubukurwa nyuma yo gukora raporo y’ibyakozwe n’ibisigaye igashyikirizwa inzego zibakuriye.

Mushimiyimana Yvette, yirinze kugira icyo adutangariza agira ati “Ibyo ubuyobozi bwababwiye ntacyo narenzaho kuko ni bo bafite inshingano zo kuvugira ikigo.”

Umuyobozi w’Akarere ka Nyanza, Ntazinda Erasme, yatangarije IGIHE ko iki kibazo bacyizi bakaba barimo kugikurikirana. Ati “Habayeho gutanga amasoko mu buryo butanoze, bongereyeho imirimo mu buryo butari buciye mu mucyo noneho birangira rwiyemezamirimo abitaye atabirangije. Ubu turi gushaka uburyo byasubirwamo noneho niba ari isoko rishya rigatangwa.”

Akomeza avuga ko hagiye gukorwa igenzura hakarebwa ababigizemo uruhare kugira ngo bakurikiranwe.

Kugeza ubu uwahoze ayobora ibitaro bya Nyanza, Dr Kagabo Hakizimana Leon, hamwe n’uwari ushinzwe icungamutungo ndetse n’uwari ushinzwe imiyoborere bari baratorotse bakaba bari gushakishwa.

Umuyobozi w’Akarere ka Nyanza avuga ko mu imikoreshereze mibi y’umutungo muri ibi bitaro ari yo yatumye bacika ariko bashobora kuba baratinyaga ko n’iby’iyi clinic bizagaragara.

Rwiyemezamirimo ati “Nishyuwe amafaranga ahwanye n’ibyo nakoze”

Mukwiye Bernard, umuyobozi wa ‘Sun Hill Ltd’ yari yatsinziye isoko ryo kubaka iyi ‘Clinic’ yemera ko yishyuwe. Ati “Nibyo koko narishyuwe ariko nishyuwe amafaranga ahwanye n’ibyo nari maze gukora. Inyigo bakoze basanze yarakozwe nabi, batwemerera ko inyigo nshyashya turi bubahe bari buyemere. Duhagarika akazi dutegereje ko baduha ibaruwa yemeza iyo nyigo ya kabiri kugira ngo dukomeze imirimo. Ingorane yahabaye ni uko twabuze ibaruwa itwemerera ko imirimo yiyongereye izishyurwa kugira ngo dukomeze inyubako tuyirangize.”

Akomeza avuga ko aramutse abonye ibaruwa igaragaza ko hari indi mirimo yiyongereye ku isoko yatsindiye nta kabuza yakomeza akubaka.

Ati “Njye icyo nshaka ni uko ikigaragaza ko uburyo bazanyishyura miliyoni eshatu na magana atandatu z’imirimo yiyongereyeho nkazabona uko nishyuza.”

Mukwiye avuga ko mu bitaro bya Nyanza hafungiraniwe ibikoresho bye bifite agaciro k’amafaranga y’u Rwanda agera muri miliyoni ebyiri, akaba agiye kubandikira abibasaba kugira ngo ajye kubikoresha ahandi.

Dr Ngiruwonsanga Pascal, Umuyobozi w'agateganyo w'Ibitaro bya Nyanza
Umucanga na sima biri ku mbuga za Clinic yahagaritswe ituzuye
Ibitaro bya Nyanza
Rwiyemezamirimo yahagaritse imirimo y'iyi nyubako

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza