Ni iyihe mpamvu abanyamahanga bishimira gufungirwa mu Rwanda?

Yanditswe na Uwishyaka Jean Louis
Kuya 8 Nzeri 2016 saa 07:56
Yasuwe :
0 0

Benshi mu banyamahanga bafungiwe mu Rwanda bishimiye uburyo u Rwanda rwita ku burenganzira bw’ikiremwamuntu by’umwihariko ku mfungwa n’abagororwa baba bari mu magereza atandukanye yo mu gihugu.

Nubwo gufungwa ari igihano kitoroshye bitewe n’igihe runaka ufungwa aba yakatiwe, hari abafungiwe mu Rwanda baharata imyato, ku bwo kwitabwaho no gufungwa mu buryo bukurikije amategeko mpuzamahanga.

Tariki 6 Gashyantare 2015 uwabaye Perezida wa 22 wa Liberia kuva kuwa 2 Kanama 1997 kugeza ku wa 11 Kanama 2003, Charles Ghankay Taylor yasabye ko urukiko rwo muri Liberia kumwemerera akoherezwa gufungirwa mu Rwanda nyuma y’uko rumuhanishije igifungo cy’imyaka 50,nyuma yo kumuhamya ibyaha 11 birimo iby’intambara, ubwicanyi no gufata abagore ku ngufu, gusa yaje kubyangirwa ajyanwa muri gereza ya Frankland mu Bwongereza.

Ubu busabe bwatumye abasesenguzi ba politiki bibaza impamvu bamwe mu banyamahanga bifuza kuza gufungirwa mu Rwanda.

Umuvugizi w’urwego rw’igihugu rushinzwe imfungwa n’abagororwa, CIP Hillary Sengabo aganira na IGIHE yavuze ko impamvu abanyamahanga bishimira gufungirwa mu Rwanda ari uko baba bahizeye imiyoborere myiza ndetse n’umutekano usesuye ugereranyije n’ibindi bihugu.

Yagize ati “Nta kabuza baba bizeye umutekano n’imiyoborere myiza basanga ugereranyije n’ibindi bihugu.”

Umuvugizi w’Urwego rw’Igihugu rushinzwe Imfungwa n’Abagorwa, CIP Sengabo Hillary

Umunya Sierra Leone Moinina Fofana wari ufungiye mu Rwanda ubwo yasohokaga muri gereza ya Mpanga, yemeje ko yafunzwe neza hubahirijwe amategeko mpuzamahanga.

Uyu yari yarakatiwe gufungwa imyaka 15 nyuma yo guhamwa n’ibyaha by’ubwicanyi, iby’intambara ndetse n’ibyaha byibasiye inyokomuntu byose byakozwe mu ntambara yabaye muri Sierra Leone kuva mu 1991 kugeza mu 2002.

Byashimangiwe kandi na Amb.Michel Arrion wari Intumwa y’Umuryango w’Ibihugu by’u Burayi mu Rwanda, mu ruzinduko yakoreye kuri gereza ya Mpanga ku tariki 21 Gicurasi 2013, aho yavuze ko yatangajwe n’uburyo imfungwa n’abagororwa bo muri iyo gereza bafashwemo agereranyije nabo mu bindi bihugu bihana imbibi n’u Rwanda.

Yagize ati “Gereza ya Mpanga itubereye ikimenyetso cyerekana ishusho y’uburenganzira bwa muntu mu Rwanda ndetse n’uko amafaranga ava hanze y’igihugu akoreshwa mu birebana n’imibereho y’imfungwa n’abagororwa”.

Ibyo yabishingiye ku kinyabupfura yabonanye imfungwa n’abagororwa bafungiye muri iyo gereza avuga ko usibye kuba bahagororerwa ngo banahigira n’indi mirimo yazabagirira akamaro mu gihe bazaba barangije ibihano bakatiwe n’inkiko.

Bamwe mu banyamahanga boherejwe gufungirwa mu Rwanda ni abari abayobozi b’umutwe wa Sierra Leone’s Armed Forces Revolutionary Council (AFRC), harimo Alex Tamba Brima, Ibrahim Bazzy Kamara , Santigie Borbor Kanu ndetse n’abayobozi b’umutwe warwanyaga Leta ya Sierra Leone (Sierra Leone Civil Defence Forces (CDF), Moinina Fofana na Allieu Kondewa.

Moinina Fofana umwe mu bafungiye mu Rwanda aturuka muri Sierra Leone

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza