Ni iki u Rwanda ruzungukira mu guha Qatar Airways 49% muri RwandAir?

Yanditswe na Rabbi Malo Umucunguzi
Kuya 7 Gashyantare 2020 saa 04:12
Yasuwe :
0 0

Mu minsi mike ishize nibwo byatangajwe ko Ikigo gikomeye mu bwikorezi bwo mu kirere cya Qatar Airways, kiri mu biganiro n’Ikigo cy’indege cy’u Rwanda, RwandAir, hagamijwe kuguramo 49% by’imigabane.

Ni igikorwa Qatar Airways yasobanuye ko kijyanye na gahunda yihaye yo kongera ibikorwa byayo ku Mugabane wa Afurika.

Minisitiri w’Ibikorwaremezo, Gatete Claver, yavuze ko hakiganirwa ku bufatanye bw’impandre zombi, magingo aya nta kintu kiremeranywaho.

Yabigarutseho ubwo kuri uyu wa Gatanu u Rwanda rwasinyanaga na Somalia amasezerano y’ubufatanye mu bijyanye n’indege (Bilateral Air Service Agreement, BASA).

Yavuze ko RwandAir ari iya leta 100% ariko yifuza umufatanyabikorwa, ubu hatangiye “ibiganiro by’ibanze” na Qatar Airways harebwa niba ubufatanye bushoboka, nyuma hakazatangazwa ibyavuyemo.

Icy’ingenzi ngo ni uko umufatanyabikorwa uzaboneka agomba kuba azanye muri iki kigo ubushobozi buri hejuru mu bijyanye n’amikoro.

Yakomeje ati “Ariko icyo tuvuga ni uko izaguma ari RwandAir uko byagenda kose, twasigaranamo imigabane mike cyangwa ikindi, izakomeza kuba RwandAir, kandi icyo bivuze ni uko nitugira ubushobozi bwinshi, icyo gihe ushobora kugura indege nyinshi, ushobora kongera imizigo utwara, bityo ugashobora gukorera ingendo mu bihugu byinshi bishoboka. Ibyo rero icyo bivuze ni uko umufatanyabikorwa wese uzaza, azazana ubushobozi bwisumbuyeho mu mikoro.”

RwandAir yashinzwe mu 2003 ariko ubu imaze kugera ku byerekezo 29; aho yifashishije indege 12 ifite zirimo Airbus A330 ebyiri nini, igana mu byerekezo binyuranye muri Afurika y’Uburasirazuba, Hagati, Uburengerazuba n’Amajyepfo, mu Burasirazuba bwo Hagati, i Burayi no muri Aziya.

Ibiganiro mu kugura imigabane muri RwandAir bikomeje mu gihe mu Ukukoza umwaka ushize, Guverinoma y’u Rwanda na Qatar Airways, basinye amasezerano y’ubufatanye mu ishoramari mu Kibuga Mpuzamahanga cy’Indege cya Bugesera, bugizwe n’amasezerano atatu, ni ukuvuga yo kubaka, kugira no kubyaza umusaruro iki kibuga kizaba gifite imiterere igezweho.

Ni amasezerano yahaye Qatar Airways 60% muri uyu mushinga, wose hamwe ufite agaciro ka miliyari $1.3.

Biteganyijwe ko iki kibuga gishya cy’indege ubu kirimo guhabwa isura nshya, kizahabwa ubushobozi bwo kwakira abagenzi bagera kuri miliyoni zirindwi ku mwaka, icyiciro cya kabiri kizaha iki kibuga ubushobozi bwo kwakira abagenzi miliyoni 14 ku mwaka kikazatangira bitarenze umwaka wa 2032.

Qatar Airways ni ikigo gifite izina rikomeye ku rwego rw’Isi, ndetse umwaka ushize yegukanye ibihembo bine muri 2019 Skytrax World Airline Awards, birimo igihembo cy’ikigo cy’indege cyiza ku Isi, ‘World’s Best Airline’, ari nacyo kigo rukumbi cyabashije kwegukana ibi bihembo inshuro eshanu 2011, 2012, 2015, 2017 na 2019.

Qatar Airways inaheruka kwegukana imigabane 9.99% mu Kigo International Airlines Group ari nacyo kibarizwamo British Airways na Iberia, mu bucuruzi bufite agaciro ka miliyari $1.7. Ifite kandi imigabane muri LATAM Airlines Group, Cathay Pacific, Air Italy, China Southern Airlines n’ibindi.

Iki kigo gifite indege zisaga 200, zigana mu byerekezo birenga 160 mu migabane itandatu y’Isi.

Minisitiri Gatete ubwo kuri uyu wa Gatanu yashyiraga umukono ku masezerano hagati y'u Rwanda na Somalia
U Rwanda rurimo kuganira na Qatar Airways ishaka kugura 49% muri RwandAir

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza