Ni iki kihishe inyuma y’abantu b’inzaduka nka Idamange?

Yanditswe na IGIHE
Kuya 1 Werurwe 2021 saa 07:14
Yasuwe :
0 0

Mu kwezi gushize, abantu hirya no hino ku mbuga nkoranyambaraga bacitse ururondogoro, batangarira umugore witwa Idamange Iryamugwiza Yvonne, wari umaze iminsi ashyira ibiganiro ku rubuga rwa YouTube byuzuyemo amagambo atamenyerewe , arimo ayagaragajwe nko gupfobya Jenoside yakorewe Abatutsi mu 1994, ndetse n’andi yo gusebya ibikorwa bya Leta y’u Rwanda.

Kuri bamwe, imvugo za Idamange zuzuyemo ubuyobe n’ubuhakanyi budasanzwe, zabibukije imvugo rutwitsi zagize uruhare rukomeye mu gukwirakwiza inyigisho zagejeje kuri Jenoside yakorewe Abatutsi mu Rwanda.

Ku bandi, uyu mugore yafashwe nk’uri gukoresha uburenganzira bwe bwo gutanga ibitekerezo bye. Ku rundi ruhande, ibyakozwe na Idamange ni ibintu bitari bisanzwe kuko byari bimenyerewe ku basanzwe baba hanze y’u Rwanda, ariko mu gihugu imbere si ibintu byari bimenyerewe cyane.

Murashi Isaïe, umwanditsi w’ibitabo akaba n’inararibonye mu mateka, yabwiye IGIHE ko ibikorwa bya Idamange biri muri gahunda ngari y’abantu bagifite umugambi mubisha wo guhakana no gupfobya Jenoside yakorewe Abatutsi mu 1994, binyuze mu gukomeza gushyigikira amatwara y’ingengabitekerezo ya Parmehutu.

Ati “Ikiganiro cya Idamange cyashyizwe mu rwego rwa politiki kandi rutari rwo, ariko iyo ubyitegereje, ibya Idamange ni ibintu bisanzweho, ariko bigenda bihindura isura, bigenda bihindura imikorere n’imigenzereze. Idamange mushyira mu rwego rumwe na ba Kizito na ba Sankara, bahindutse ibikoresho by’abantu bagendera ku ngendabitekerezo ya Parmehutu, ingengabitekerezo yo kurimbura Abatutsi”.

Ibi bivugwa na Murashi bishobora kwemezwa n’ibyavuzwe ko mbere gato y’uko Idamange atangira ibikorwa byo gukwirakwiza ibihuha n’amakuru mahimbano, ko ngo yaba yarabanje kugirana imikoranire n’abantu basanzwe badahisha ingengabitekerezo ya Jenoside ndetse banayikwirakwiza mu bandi.

Mu bo bivugwa ko bagiranye imikoranire ya hafi mbere gato yo gutangira ibikorwa bye, harimo Ingabire Victoire ndetse n’abandi Banyarwanda baba hanze y’u Rwanda, basanzwe bazwiho kugira ingengabitekerezo ya Jenoside no kuyipfobya.

Murashi yavuze ko n’ubwo FPR yahagaritse Jenoside yakorewe Abatutsi, ariko ingengabitekerezo yayo yagumyeho, ndetse ibikorwa na Idamange bikaba biyihishamo mu rwego rwo kongera gucamo Abanyarwanda ibice.

Ati “FPR yirukanye imashini [abantu bashyize cyangwa bafashije mu ishyirwa mu bikorwa rya Jenoside] ariko ntabwo yirukanye ingengabitekerezo kuko ntawe urasa ingengabitekerezo. Iyo ngengabitekerezo rero yagumyeho, yewe na ya mashini icika intege, ariko igumaho ijya mu buhungiro, ubu rero niyo irimo gukora”.

Ibya Idamange ntaho bihuriye n’uburenganzira bwo kuvuga icyo umuntu ashaka

Mu gihe hari abarimo kwibaza uburemere bw’icyaha cyakozwe na Idamange, abandi bateye hejuru bavuga ko ibyo uwo mugore yavuze biri mu burenganzira bwe bwo kuvuga icyo ashatse, kuko ari kimwe mu biranga amahame ya demokarasi.

Murashi avuga ko n’ubwo abantu bakwiye kwisanzura bagatanga ibitekerezo byabo, badakwiye kurengera bitwaje demokarasi gusa, kuko hari n’ubwo ikoreshwa n’ibihugu by’amahanga mu kwangiza inyungu za Afurika.

Ati “Uburenganzira na demokarasi byavuye mu bakoloni. Iwabo bafite uko bikora, ariko iyo bigeze iwacu, usanga bita agaciro [...] Ugasanga umuntu aravuze ngo Coronanavirus ni igihuha […] rero ubyitegereje, usanga [hari ubwo] abanyamahanga bakoresha demokarasi kugira ngo badusenye”.

Impungenge ku ngengabitekerezo iri kototera u Rwanda

Murashi yavuze ko ibirimo gukorwa n’abarimo Idamange kandi bakabikorera mu Rwanda aho kubikorera hanze y’u Rwanda nk’uko byari bimenyerewe, biteye impungenge cyane.

Yagize ati “Biteye impungenge cyane rwose, biteye impungenge ku buryo ni ibintu tugomba gufatirana hakiri kare, tukabirwanya hakiri kare, tukumvisha Abanyarwanda ko aya ari amayeri yo gusenya u Rwanda […] amayeri yashinzwe na Parmehutu”.

Yongeyeho ko ibi bigize umugambi munini wo kugandisha abantu kugira ngo bakore ibikorwa bigayitse, igihugu cyuzuremo akavuyo.

Yagize ati “Ubu rero noneho byajyaga bikorwa hanze, batinyutse noneho kuza mu Rwanda. Aya ni yo mayeri n’ubundi [akoreshwa] na Nahimana [Thomas] aravuga ngo bafate abantu babanige, bafate [umuyobozi] b’isobo, bafate ab’umudugudu, bafate abapolisi barwane nabo, urumva ni umugambi wo gusenya igihugu, umugambi wo kurwanya Leta mu buryo butinyutse”.

“Ba Idamange rero barimo kubasiba mu mutwe kugira ngo bazatinyuke batinyure abandi bantu, ni ko Ingabire Victoire yaje guhangana n’igihugu imbere kuko hanze ni amagambo gusa ariko barashaka gushyira mu bikorwa. Niyo mpamvu rero ibyo Idamange akora biteye akaga, biteye kwibaza kandi tugomba kubirwanya tukagaragaza ko ari abantu basenya u Rwanda”.

Yanavuze kandi ko uyu murongo w’imitekerereze ari wo utuma aba bantu bakwiza ibindi bihuha birimo ko Perezida Kagame yitabye Imana, kugira ngo bakange abantu babahungange, n’uwo baba bazi neza ko ibyo bavuga ari ibinyoma byambaye ubusa.

Barabizi ko babeshya

Murashi yavuze ko mu rugamba rwo guca ingengabitekerezo ya Jenoside, Abanyarwanda bakwiye no gukomeza kwigishwa ko ibikorwa n’abagifite iyo ngengabitekerezo ari ibinyoma bisa kandi babikora babizi.

Ati “Tugomba guca politiki yo kubeshya, aho umuntu ahimba ibinyoma, akabikinga abantu mu maso kugira ngo yibonere inyungu ze. Ibyo birahari cyane, ba Idamange ni uko bimeze, ba Kizito ni ko byari bimeze kuko ntibyumvikana ukuntu waririmba Jenoside yakorewe Abatutsi, ejo noneho ngo uririmbe iyakorewe Abahutu”.

Yongeyeho ko Abanyarwanda badakwiye kugwa mu mutego wo kubeshywa kugira ngo bariya bantu bibonere inyungu zabo.

Ati “Bariya bantu bari hanze bose ni bakuru, barabizi ko babeshya…ariko kubera ingengabitekerezo n’ibintu byabaye mu Rwanda, bakomeza kubeshya kugira ngo bibonere inyungu… Ntabwo ushobora kuba wari umuntu ukomeye muri FPR hanyuma ugahinduka ikindi kintu, biriya ni ibintu biteye ubwoba. Hanyuma bakirirwa bavuga ko bashaka gusenya agatsiko [kayoboye u Rwanda] kandi bari bakarimo”.

Yavuze ko ibikorwa n’abo bantu harimo ababa bakuriye inyungu z’nda zabo gusa, aho kuba inyungu rusange nk’uko babivuga.

Murashi avuga nyuma y’urugamba rw’umuheto, ubu hari kurwanywa urugamba rw’ibitekerezo.

Yagize ati “Tugeze mu rugamba rukomeye rw’ibitekerezo kandi ababirimo babirimo batabyumva […] bafite aho ibitekerezo byabo biroroshye, ikinyoma cyabo kukigaragaza biroroshye. Ubu rero turi mu rugamba rwo kugarura u Rwanda rwubashye kandi rukomeye”.

Iyi nararibonye kandi yasabye abarimo urubyiruko cyane cyane, gufata iya mbere mu guhangana n’abaharabika igihugu.

Idamange yatawe muri yombi biturutse ku magambo yatambukije ku rukuta rwe rwa Youtube

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .