Kwamamaza

Ni iki gituma u Rwanda rukomeje kuba intangarugero mu rwego rw’ubuzima?

Yanditswe kuya 3-10-2016 saa 20:19' na IGIHE


Umudage Jean-Olivier Schmidt ukorera Ikigega Nterankunga cy’Abadage, GiZ, yagaragaje uko gahunda zirimo Mutuelle de Santé n’imicungire myiza mu rwego rw’ubuzima bikomeje gutuma ruba intangarugero n’ishuri ku bindi bihugu bya Afurika n’Isi muri rusange.

Schmidt ni umwe mu bagize uruhare rukomeye mu gufasha u Rwanda gushyiraho uburyo bwa Mutuelle de Santé mu 1999. Kuri ubu, ubu bwisungane bukoreshwa na 81% by’Abanyarwanda bangana na miliyoni 11.3. Abandi bagera ku 10% bakoresha ubwishingizi bwa gisirikare cyangwa ubw’abakozi ba Leta.

Avuga ko kuba nibura 91% by’Abanyarwanda bafite ubwishingizi bw’ubuzima ari intambwe u Rwanda rusiga abandi muri Afurika.

Ashingiye ku mibare, Schmidt, yemeza ko rwavuye mu icuraburindi rya Jenoside yakorewe Abatutsi mu 1994 rukaba rumaze kuba intangarugero mu kwita ku buzima bw’abaturage barwo.

Nko mu 1990 abagore 1400 ku 100 000 bapfaga babyara, mu gihe muri 2015 bagabanutse bakagera kuri 290 ku 100 000, ibi bituma u Rwanda ruza ku mwanya wa mbere muri Afurika ku kugera ku ntego z’ikinyagihumbi zigamije kugabanya imfu z’abagore bapfa babyara.

U Rwanda rwanateye intambwe ikomeye mu kugabanya indwara zandura n’imfu z’abana. Hagati ya 2000 na 2011, ikigero cy’abicwaga n’igituntu bavuye kuri 48 ku bantu 100 000 bagera kuri 12. Gahunda y’ubwishingizi bw’ubuzima ikaba yagize uruhare rufatika muri izi ntambwe zose.

Atangazwa n’uburyo u Rwanda ari igihugu gikennye kigizwe n’icyaro aho umuturage yinjiza amadolari 690 ku mwaka, ariko kikabasha kubaka urwego rw’ubuzima rwiza. Kimwe cya kabiri cy’ingengo y’imari y’ubuzima mu Rwanda iracyaturuka mu bagiraneza b’abanyamahanga.

Inkunga z’amahanga zifite uruhare rwa 30-40% by’ingengo y’imari yose ya Guverinoma y’u Rwanda. Abaterankunga baramutse bakuyemo ayabo, nta gushidikanya ko urwego rw’ubuzima rushobora guhungabana.

Ikindi gishobora kuba gifite uruhare rukomeye mu iterambere ry’urwego rw’ubuzima, ni igitsure cyo kutareberera ruswa bigatuma umutungo ushyirwamo ucungwa neza.

Ku bwa Schmidt, inkunga z’amahanga ntabwo arizo zituma igihugu gikora neza kuko hari n’ibindi bihugu bizihabwa ariko bigakora nabi.

Agaruka kuri politiki y’abajyanama b’ubuzima babihuguriwe neza aho mu midugudu yose bahuguriwe gutanga ubufasha bw’ibanze, byaba ari ikibazo kibarenze bagafasha abarwayi kugera kwa muganga.

Kugeza ubu mu Rwanda habarurwa abajyanama b’ubuzima bagera ku 45 000. Banafasha kandi mu bukangurambaga bwo gushishikariza abaturage gutanga ubwisungane mu kwivuza.

Schmidt avuga ko u Rwanda rwerekanye uko igihugu gishobora guteza imbere vuba urwego rw’ubuzima kigahangana n’indwara zituruka ku bukene nka diarrhea n’umusonga zica ariko kuzitaho bihendutse.

Icyakora avuga ko ikibazo gikomeye gisigaye mu kuvura indwara z’akarande nka kanseri n’umutima zikomeje kwiyongera cyane by’umwihariko mu bantu bakuze. Ibi byo birakomeye cyane kandi biranahenze kuzirwanya. Icyakora ibyo u Rwanda rumaze gukora ni intangiro nziza zigaragaza ko no guhangana n’iki kibazo bizashoboka.

U Rwanda ni isomo kuri Afurika

Akurikije bimwe mu bimaze kugerwaho mu rwego rw’ubuzima, Schmidt, avuga ko hari byinshi ibindi bihugu bya Afurika bigomba kwigira ku Rwanda. Nibura umuturage umwe muri batatu bo muri Ghana bahabwa ubwishingizi n’ikigo cy’igihugu cy’ubwishingizi bw’ubuzima n’ibigega by’abaturage.

Tanzania irimo kugerageza kongera umubare w’abaturage bari muri gahunda y’ubwishingizi bw’ubuzima ibifashijwemo na GiZ, n’ibigo nterankunga bya Leta Zunze Ubumwe za Amerika na Suède. Abaturage 20% bo mu byaro nibo bonyine bafite ubwisungane mu kwivuza muri icyo gihugu.

Ibindi bihugu nka Mali na Senegal byatangije gahunda nto y’ubwisungane mu kwivuza mu myaka 20 ishize ariko ntacyo bimariye abaturage bitewe n’uko Guverinoma zitabishyizemo ingufu.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved