Kwamamaza

Ni iki cyihishe inyuma yo kwitwara neza ku Rwanda muri raporo zo koroshya ubucuruzi?

Yanditswe kuya 21-11-2016 saa 07:52' na IGIHE


Raporo ku koroshya ubucuruzi ‘Doing Business Report’ yakozwe na Banki y’Isi ku mwaka wa 2017 ikareba ku bihugu 190, iherutse gushyira u Rwanda ku mwanya wa kabiri muri Afurika no ku wa 56 ku Isi ruvuye ku wa 62 rwariho muri raporo iheruka ya 2016.

Ibi bigaragaza ko ku rwego rw’Isi u Rwanda rwazamutse imyanya itandatu. Mu kiganiro The New Times yagiranye n’Uhagarariye ishami rikora iyo raporo muri Banki y’Isi, Dr. Rita Romalho, yagaragaje zimwe mu mpamvu zituma iterambere ry’u Rwanda rikomeje kuzamuka kuri iyi raporo ngarukamwaka n’icyakorwa ngo bikomeze.

Romalho yavuze ko mu myaka 14 bamaze bakora iyi raporo, u Rwanda rumaze gutera intambwe ishimishije aho rumaze gukora amavugurura agera kuri 47 yatumye ruri mu bihugu bihagaze neza. Avuga ko u Rwanda ari kimwe mu bihugu icumi byakoze impinduka mu mfuruka zose z’ubucuruzi, rukaba aricyo gihugu cyahinduye byinshi muri Afurika yo munsi y’ubutayu bwa Sahara, naho ku Isi yose kikaba icya kabiri nyuma ya Georgia.

Agaruka ku mavugurura yibanzweho muri uyu mwaka arimo kwandika imitungo y’abantu no gushyira imbaraga mu masezerano no koroshya ubucuruzi bwambukiranya imipaka. Mu myaka 14 muri ibi byiciro byose u Rwanda rwitwaye neza cyane mu kwandika imitungo y’abantu aho byavuye ku mwaka urenga bikaba mu minsi 12 gusa.

Izindi mpinduka zigaragaje cyane mu kubona inguzanyo aho u Rwanda ruhagaze neza kurusha ibindi bihugu ku Isi.

Romalho asanga hari impamvu ikomeye ifasha u Rwanda gukomeza kwesa imihigo mu byiciro bitandukanye biteza imbere abaturage n’igihugu muri rusange.

Agira ati “Ubushake bwa Guverinoma bwo gukora impinduka no kuba guverinoma ishyize imbere impinduka byarafashije. U Rwanda rwakoze impinduka no mu bindi byinshi birenze ibyo dusuzuma. Umuhate wabo wo gutera imbere ndetse n’igitutu gituruka ku bikorera, bituma biba ngombwa ko horoshywa uburyo bwo gukora ubucuruzi ku baturage.”

Mu bihugu bigize umuryango wa Afurika y’Iburasirazuba, EAC, u Rwanda nicyo gihugu kigaragara ko gihagaze neza muri raporo nk’izi, Romalho asanga bizafasha ibindi bihugu bihuriye mu miryango itandukanye gukora amavugurura anyuranye aho kuba byarugiraho ingaruka runaka.

Yemeza ko u Rwanda ari igihugu gito gikeneye kwihuza n’ibindi kugira ngo bifatanye bityo rugire isoko rinini ry’ibyo rukora kandi rukabasha guhangana.

Ati “Ndatekereza ko kuba u Rwanda rwarateye imbere mu myaka mike ishize, bitera guhangana mu muryango wa EAC bigatuma ibihugu nabyo bishaka gutera imbere. Urebye nka Kenya ni iya mbere mu byakoze amavugurura muri uyu mwaka mu gukora ubucuruzi, ndahamya ko hari impamvu nyinshi babihisemo, no kuba kandi bari kumwe n’igihugu kitwara neza nk’u Rwanda bishobora kugira uruhare.”

Akomeza avuga ko mu karere kose hari ibihugu byagaragaje imbaraga mu gutangira ubucuruzi, kubona inguzanyo no guteza imbere ibikorwa remezo byoroshya ubucuruzi bwambukiranya imipaka.

Romalho asanga u Rwanda hari ibyo rukwiye kwitaho kugira ngo rukomeze gutera imbere birimo kurengera ba rwiyemezamirimo n’abacuruzi bato, guhangana n’ikibazo cy’ibigo bihomba bitageze ku ntego zabyo no mu kwaka impushya zo kubaka.

Dr. Rita Romalho

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved