Ni iki cyaba cyarateye iyeguzwa ry’abarimu 46 i Nyagatare ?

Yanditswe na Mugabo Jean d’Amour
Kuya 21 Gashyantare 2018 saa 01:59
Yasuwe :
0 0

Hashize ibyumweru bibiri abarezi 46 barimo abarimu abashinzwe uburezi mu mirenge, abayobozi b’ibigo by’amashuri n’ababungirije batangaje ko bahatiwe kwegura ku kazi n’ubuyobozi bw’Akarere ka Nyagatare nubwo ko kabihakana.

Inkuru yasakaye nyuma y’uko batatu mu birukanwe bandikiye ibaruwa Akarere ku itariki ya karindwi basaba ko hateshwa agaciro ibyo basinyishijwe ku ngufu, bagasubizwa ku mirimo bavuga ko bagikunze kandi bashoboye.

Umuyobozi w’Akarere Mupenzi George yavuze ko abo barimu beguye ku bushake bwabo nyuma yo gusobanurirwa amakosa yabo ajyanye n’akazi.

Abarimu bagera kuri barindwi baganiriye na IGIHE bavuze ko bahuye n’akaga ko kwisanga imbere y’itsinda rya Komite Nyobozi y’Akarere, bagasomerwa amakosa buri umwe umwe, ntibahabwe umwanya wo kwiregura ahubwo bagahabwa inzandiko basanze zabateguriwe ngo basinye ko beguye ku mpamvu zabo bwite.

Igitangaje abo barimu bavuga ni uko bagiye bazi ko bitabiriye inama batumiwemo bagombaga kuhagera saa kumi n’ebyiri za mu gitondo, barayitegereza kugeza saa tanu z’amanywa ubwo bamburwaga telefoni, bagategekwa kwegura ku kazi.

Bavuga ko iki gikorwa cyagejeje saa munani z’ijoro kigasiga icyenda banze kwegura ariko nyuma baje nabo kwandika baregura.

Mu cyumweru gishize, Meya Mupenzi yabwiye itangazamakuru ko amakosa yatumye abo barimu basezera harimo imyitwarire idahwitse mu kazi harimo kujya ku kazi basinze, gusiba akazi, isuku nke, imicungire mibi y’ibigo by’amashuri n’umutungo wabyo.

Hari benshi bakomeje gushyira ibitekerezo kuri izi nkuru bibaza niba ubuyobozi bwari bwarangije inzira zose z’ibihano bigenerwa abakozi mu gihe abandi bavuga ko n’uwarangije ibindi bihano byose yandikirwa asezererwa kandi ko Akarere kabyemererwa n’amategeko aho gutegereza ko uwakoze amakosa yegura.

Umunyamabanga Mukuru w’urugaga rw’abarimu mu Rwanda, Harerimana Faustin, nawe yagize ati “Umuntu yakwibaza niba ujya gusezera ku kazi ku mpamvu ze bwite hagomba kubaho inama no kujya kubirahirira imbere y’abayoboi zb’Akarere. Ntibyumvikana ukuntu abantu 46 begurira rimwe ku bushake bwabo, bwacya bakagaruka bavuga ko bashaka gusubizwa mu kazi. Keretse byemejwe ko abo bantu bose bafite ikibazo cyo mu mutwe.”

Ibiro by'Akarere ka Nyagatare karimo ibibazo by'abarimu bakuwe mu kazi mu buryo butavugwaho rumwe

Hari ibyo abarimu bakeka ko bazize

Abenshi mu begujwe bavuga ko bazize kuba hari ibyo bagiye batumvikanaho n’ababakuriye, bagashaka kubikiza babateranya ku bayobozi b’Akarere.

Mukapeti Dorothée wari Umuyobozi w’Ikigo wungirije ushinzwe amasomo ku Rwunge rw’Amashuri rwa Bufunda, yavuze ko mu 2015 yatangiye kutumvikana n’umuyobozi w’ikigo wazanaga abarimu akabaha akazi kandi nta masaha y’akazi bahafite ariko ikibazo kiza gukomera muri Mata 2017 ubwo yatangaga amakuru ku barimu ba “baringa” babiri bari mu kigo n’abandi bahabwaga umushahara utajyanye n’impamyabumenyi zabo.

Yagize ati “Nahamajwe na Visi meya musobanurire imicungire mibi y’ikigo no gusesagura umutungo w’igihugu, maze haje igenzura basanga ni byo na ba barimu barahabakura ariko Umuyobzi w’ikigo arandakarira cyane ndetse arankubita imbere y’abanyeshuri kuko nari mubajije igitabo abakozi basinyamo buri munsi maze agatinya ko nongera kubonamo abarimu badakwiye kuhaba.”

Igenzura rya Minisiteri y’Uburezi ryasanze abarimu ba baringa 128 muri Nyagatare n’abandi benshi batari bafite amasaha ashyitse y’akazi mu 2017.

Mukapeti watangiye umwuga w’uburezi mu 1996 yavuze ko yagejeje ikirego kuri polisi agatanga urwandiko rwa muganga rugaragaza ko yakubiswe akanakomeraka ubwo Umuyobozi w’ishuri yamukubitaga; yanamenyesheje Akarere ko yambuwe akazi maze ubuyobozi burabunga nyuma, asawe imbabazi n’uwamukubise.

Ariko Mukapeti yagejeje ikirego cyo gukubitwa mu Rukiko rw’Ibanze rwa Nyagatare.

Mbere y’uko yeguzwa, Mukapeti yari amaze icyumweru yimuriwe ku Rwunge rw’Amashuri rwa Rwebare aho yari yagizwe mwarimu.

Uretse uwo mugore, Umugabo uvuga ko yashinjijwe ubusinzi akeguzwa, avuga ko yatanzwe n’Umuyobozi w’Ikigo amuziza ko amubaza agahimbazamusyi ka mwarimu kazwi nka “PTA”.

Undi mugore wirukanwe yavuze ko yari mu buyobozi bw’ikigo maze akajya avuguruza Umuyobozi w’ishuri ku mikoreshereze idahwitse y’umutungo w’ikigo, ariko uwo muyobozi akaba asanzwe afitanye ubucuti n’abayobozi b’Akarere yamurezeho ko akererwa akazi.

Mu gihe Urugaga rw’abarimu rugitegereje kugirana ibiganiro n’Akarere kuri iki kibazo, Harerimana yaburiye Akarere ko hazitabazwa inkiko mu gihe ibiganiro byaba ntacyo bigezeho kinyuze aba barimu.

Umwarimu umwe mu birukanwa utuye mu Murenge wa Tabagwe yabwiye IGIHE ko hari bamwe mu bari begujwe batangiye gusubizwa mu kazi guhera ku wa Mbere w’iki cyumweru, aya makuru tukaba tukiyakurikirana.

Ibihano bihabwa abakozi ba leta bakoze amakosa mu kazi

Nk’uko bigaragara mu Iteka rya Perezida ryo mu 2014 rigena uburyo bwo gutanga ibihano ku bakozi ba leta bakoze amakosa mu kazi, amakosa yo mu kazi n’ibihano byayo ku bakozi ba leta biri mu nzego ebyiri.

Amakosa yo ku rwego rwa mbere ahanishwa kwihanangirizwa no kugawa na ho ayo ku rwego rwa kabiri ahanishwa gukererezwa kuzamurwa mu ntera, guhagarikwa ku kazi mu gihe kitarenze amezi atatu adahemberwa no kwirukanwa burundu ku kazi.
Mu bihano bihabwa umukozi wa leta wakoze amakosa ikiremereye kuruta ibindi ni icyo kwirukanwa burundu ku kazi.

Iri teka rigena ko ugihabwa aba yakoze amakosa akomeye arimo nko kwanga kurahira indahiro y’abakozi ba Leta mu buryo buteganywa n’amategeko; guta akazi nta mpamvu izwi cyangwa nta ruhushya mu gihe kigeze nibura ku minsi cumi n’itanu ikurikirana; uhamijwe burundu n’urukiko igihano cy’igifungo gihwanye cyangwa gisumba amezi atandatu, gutanga ibyangombwa mpimbano bishingirwaho kugira ngo umukozi ahabwe akazi.

Gihabwa kandi umukozi wibye mu kazi; wakubise undi muntu ku kazi; uwakoze uburiganya bugamije gutonesha cyangwa kugabanyiriza amahirwe umukandida mu bijyanye n’itangwa ry’akazi; ukoze ihohoterwa rishingiye ku gitsina mu kazi n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza