Ntibyumvikana uburyo ugira ikigega cy’ibiryo, abana bawe bakagwingira- Gihana

Yanditswe na Ishimwe Israel
Kuya 24 Ugushyingo 2016 saa 09:46
Yasuwe :
0 0

Umuyobozi w’Umuryango Nyarwanda udaharanira inyungu, ushinzwe kwita ku buzima (Society for Family Health Rwanda- SFH), Manasse Gihana, yavuze ko bibabaje kubona u Rwanda ruhagaze neza mu kwihaza mu biribwa ariko rukagira ibibazo by’imirire mibi iri hejuru, agereranya no kugira ikigega cy’ibiryo ariko abana bawe bakicwa n’inzara.

Imibare igaragaza ko 38% by’abana bari munsi y’imyaka itanu bahura n’ibibazo by’imirire mibi mu gihe u Rwanda rugeze kuri 80% mu kwihaza mu biribwa.

Ibi yabivuze kuwa Kabiri, tariki ya 22 Ugushyingo 2016, mu muhango wo gusoza amahugurwa y’iminsi ibiri yahuje inzego zihagarariye Inama y’Igihugu y’Abagore mu karere ka Gasabo, yari agamije kubakangurira gukoresha imbaraga n’ijambo bafite mu igenamigambi hagashyirwamo amafaranga yo kuzamura imirire.

Uyu muyobozi yaboneyeho no gusaba abagore gukoresha ijambo bafite mu nzego zifatirwamo ibyemezo iki kibazo kigakemuka.

Yagize ati “Igitera ikibazo si ukubura ibyo kurya ahubwo ni ubumenyi buke. U Rwanda rufite umutekano mu byo kurya ugera kuri 80% ariko rukagira abana bagwingiye 38% ubwo ibyo wabihuza ute? Ni nko kuba ufite ikigega cyuzuye ibyo kurya ariko abana bawe bakicwa n’inzara.”

Yakomeje abasaba ko no mu igenamigambi ry’umuryango bajya bateganya amafaranga yo kugura amata, imboga n’ibindi biribwa bigira uruhare mu kurwanya imirire mibi.

Gihana yatanze urugero ko iyo umwana yahuye n’imirire mibi mu muryango bimugiraho ingaruka mu bwenge no mu mikurire ugasanga imyaka afite ntihwanye n’igihagararo ndetse n’ubwenge bwe ugasanga ari buke.

Nzabamwita Thérèse uhagarariye Inama y’Igihugu y’Abagore (CNF) mu Murenge wa Jabana, avuga ko akuye byinshi mu kuzuza inshingano zabo yahuje no kugira ubukangurambaga bwo gutegura indyo yuzuye.

Ati “Ntabwo twari tuzi inshingano zacu nka CNF mu kurwanya imirire mibi, twasanze gutegura indyo yuzuye bidasaba ibintu twihingira mu karima k’igikoni. Tuzafasha abandi kumenya uko bategura indyo yuzuye.”

Mu Karere ka Gasabo gusa, abana bagwingiye bari ku kigero cya 22%, akaba ariko Karere kahereweho gahugurwa gukemura ikibazo cy’imirire mibi ndetse no kwirinda umwanda.

SFH irateganya no kuzagera ku tundi turere tw’igihugu, igamije kurushaho gukora ubukangurambaga bwo kurwanya imirire mibi.

Umuyobozi w’Umuryango Nyarwanda udaharanira inyungu ushinzwe kwita ku buzima, SFH, Manasse Gihana
Nzabamwita Thérèse uhagarariye Inama y’Igihugu y’Abagore (CNF) mu Murenge wa Jabana avuga ko amahugurwa bahawe azabafasha kwigisha bagenzi babo
Bamwe mu bahagarariye Inama y’Igihugu y’Abagore (CNF) mu Karere ka Gasabo bahuguwe
Aya mahugurwa y'iminsi ibiri yitabiriwe n'abantu batandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza