Ni gute Umujyi wa Kigali witeguye guhuza abaturage bari mu kajagari n’abashoramari bahakenera?

Yanditswe na Habimana James
Kuya 26 Kamena 2019 saa 08:51
Yasuwe :
0 0

Kuri uyu wa Kabiri Umujyi wa Kigali wahurije hamwe abashoramari n’abikorera kugira ngo bashyire ingufu mu kubaka amacumbi aciriritse no kurandura ahakigaragara akajagari muri rusange.

Icyerekezo cy’uyu mujyi ni ukuba Umujyi utarangwamo akajagari kandi wubatsemo inzu ziciriritse ku baturage bafite ubushobozi buke.

Ikibazo cy’ingutu uyu mujyi wahuye nacyo mu bihe byatambutse ni uburyo imiturire itigeze itunganwa, abenshi bakaba bagituye mu kajagari.

Mu gukemura iki kibazo, Umujyi wa Kigali ukunze kwifashisha abashoramari ngo bubake inzu z’icyitegerezo aho baba batuye bo bagashakirwa ahandi bajya gutuzwa.

Gusa ibi byagiye biba imbogamizi kuko aba baturage banga kuhava bakavuga ko bashaka ingurane y’amafaranga.

Urugero rwa hafi ni abaturage ba ka Kangondo I na Kangondo II i Nyarutarama mu Karere ka Gasabo ahazwi nka ‘Bannyahe’ banze kwimukira mu nzu bubakiwe mu Karere ka Kicukiro.

Ubwo yabazwaga niba ibi bidashobora kuba imbogamizi ku bashoramari bafite gahunda yo kwimura abaturage mu Mujyi wa Kigali, Umuyobozi w’uyu mujyi, Rwakazina Marie Chantal, yavuze ko abaturage batinangiye ahubwo ikigomba gushyirwamo imbaraga ari ukubaganiriza.

Yagize ati “Uko uyu munsi twaganirije abashoramari ni nako tuzaganiriza abaturage tukabereka akamaro kabyo, kwinangira birashoboka ariko twizera ko iyo ukoze ibiganiro abaturage bakumva neza cyane iyo gahunda imufitiye akamaro.”

Umuyobozi w’Ishami rishinzwe Iterambere n’Ubukungu mu Mujyi wa Kigali, Rwomushana Augustin, we yabwiye IGIHE ko ubu Umujyi wa Kigali ufite abashoramari bagera kuri 700 bari mu nzego zitandukanye z’ishoramari.

Yavuze kandi ko ishoramari ryagiye ritera imbere kuko ubu umujyi ufite inyubako z’ubucuruzi zirenga 400, zikaba ari inyubako zituma Umujyi wa Kigali utera imbere.

Hamwe mu ho Umujyi wa Kigali wabwiye abashoramari ko hakeneye gushorwa imari hari ukubaka amacumbi aciriritse yo kugura cyangwa gukodesha mu rwego rwo guteza imbere imiturire, gutunganya cyangwa kubaka ahagenewe imikino no kwidagadura (recreational centers and areas), kubaka imihanda yo midugudu itunganije mu Mujyi wa Kigali ndetse n’andi mahirwe atandukanye.

Robert Bapfakurera uyobora Urugaga rw'Abikorera ubwo yagezaga ikiganiro ku bitabiriye
Umuyobozi w'Umujyi wa Kigali, Rwakazina Marie Chantal, yavuze ko bagiye kuganiriza abaturage ku buryo basobanurirwa amahirwe ari mu kuba bakwimurwa ku batuye mu kajagari
Iyi nama ihuza abashoramari n'Umujyi wa Kigali iba buri mwaka hagamijwe kubereka ahari amahirwe mu gushora imari mu Mujyi wa Kigali
Umujyi wa Kigali wasabye abashoramari kwibanda cyane mu gucyemura ikibazo cy'amacumbi aciriritse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza