00:00:00 IGIHE NETWORK KN KINYARWANDA EN ENGLISH FR FRANCAIS

Ni iki gikurikiraho nyuma yo kubohorwa kwa bimwe mu bice by’Intara ya Cabo Delgado?

Yanditswe na Ndahayo Emmanuel
Kuya 16 Kanama 2021 saa 04:50
Yasuwe :
0 0

Mu rukerera rwo ku itariki ya 8 Kanama, ahagana saa cyenda z’igitondo, ingabo z’u Rwanda zatangiye urugendo rurerure rugana mu Mujyi wa Mocímboa da Praia kubohora aka gace kari karigaruriwe n’abarwanyi bavuga ko bakorana na Al Shabaab.

Umujyi wa Mocímboa da Praia ni wo wa nyuma wari usigaye mu maboko y’inyeshyamba mu Ntara ya Cabo Delgado. Nyuma yo kubohoza Uyu Mujyi unakorerwamo ubucuruzi buhambaye, ku buryo nyuma y’uko ubohowe, benshi batabuze kugaragaza ko iri ari ryo herezo ry’iyi ntambara yari imaze imyaka itanu.

Icyakora nubwo urugamba rwo kuvana izi nyeshyamba mu mijyi ikomeye rusa nk’urumaze gufata isura nziza, birashoboka ko gutangira kubyina indunduro yarwo bimeze nko kwikirigita ugaseka, kuko ibimenyetso byerekana ko izi nyeshyammba zigifite ubushobozi bwo guteza ibibazo birimo guhungabanya abaturage bari gutahuka, ndetse zikaba zishobora kongera kwisuganya mu gihe nta gikozwe.

Mu kiganiro yahaye IGIHE ubwo ingabo z’u Rwanda zari zimaze kubohoza icyambu cya Mocímboa da Praia, Brig Gen Pascal Muhizi uri mu bayoboye ingabo z’u Rwanda ziri muri Mozambique, yavuze ko nyuma yo kubohoza ibice byinshi by’Intara ya Cabo Delgado, intego y’ingabo z’u Rwanda igiye kuba gukurikirana inyeshyamba mu bice zagiyemo byiganjemo amashyamba akikije ibice zambuwe.

Ibi byumvikanisha ko mu by’ukuri urugamba rutararangira, kuko imiterere y’ahantu hari kubera urugamba hagizwe n’amashyamba y’inzitane ku buryo ari yo yabaye ibirindiro by’iyi mitwe nyuma yo kwirukanwa mu mijyi.

Umwe mu bakurikirana iby’uru rugamba, yavuze ko kuvuga ko urugamba rwarangiye ari ukwibeshya cyane cyane ko imiterere y’Intara ya Cabo Delgado ishobora guha urwaho inyeshyamba.

Ati “Igice cy’imirwano ni kinini kuko kiruta u Rwanda inshuro eshatu, kandi kirimo amashyamba menshi y’inzitane. Inyeshyamba zishobora gufata icyemezo cyo kuyihishamo no kuyakoreramo. Icyiza ni uko ingabo na Polisi byacu bafite inararibonye ikomeye mu kurwanira muri ibyo bice bigoye.”

Uyu musesenguzi kandi yavuze ko nubwo ingabo z’u Rwanda zabohoje Intara ya Cabo Delgado, ibyo bitavuze ko amahoro n’umutekano byabonetse.

Intara ya Cabo Delgado yabohowe imaze imyaka itanu ari isibaniro ry’imirwano yatumye abaturage barenga ibihumbi 800 muri miliyoni ebyiri zituye Cabo Delgado bahunga, abandi barenga ibihumbi 3100 baricwa muri iyi ntambara yahungabanyije ubukungu bw’icyo gihugu kiri mu bikennye cyane ku Isi.

Ibi bibazo byatangiye ahagana mu 2017, ubwo insoresore z’abashomeri batuye mu Ntara ya Cabo Delgado zateraga hejuru zamagana ubuzima bw’ubukene babayemo, bakaza kwigabiza ikigo cya gisirikare bakagikuramo intwaro bajyanye ku rugamba batangiye gukoresha barwanya ingabo za Leta.

Iri tsinda ryakomeje kwisuganya gahoro gahoro ritangira no kwaguka, ndetse riza kwerura rivuga ko rishingiye ku mahame akaze y’idini ya Islam, ari nabyo byatumye iryari itsinda ry’urubyiruko rihinduka umutwe w’iterabwoba mu buryo bweruye.

Mu 2019, nyuma y’uko uyu mutwe utangiye kugirana imikoranire n’umutwe w’iterabwoba wa IS wigeze guca ibintu muri Iraq na Syria, Leta Zunze Ubumwe za Amerika zashyize uyu mutwe wo muri Mozambique ku rutonde rw’imitwe y’iterabwoba, ndetse uyu mutwe uza kwerekana ko udafite imikino muri Werurwe uyu mwaka, ubwo wicaga abantu 12 ubakase amajosi, ibintu ubusanzwe bimenyerewe kuri IS ya nyayo mu Burasirazuba bwo Hagati.

Ibi ariko byari nko gukoza agati mu ntozi, kuko byaharugurukije Perezida Phillip Nyusi ubundi utarakozwaga ibyo gufashwa n’ingabo z’amahanga mu guhangana n’iki kibazo, feri ya mbere ayifatira i Kigali mu ruzinduko rwabanje kugirwa ibanga ariko rukaza kumenyekana nyuma, impande zombi zikemeza ko mu byaganiriweho harimo n’ibijyanye n’umutekano, na cyane ko ibihugu byombi bisanganywe amasezerano mu by’umutekano.

Nta minsi yaciyeho abasirikare bakuru b’u Rwanda batari muri Mozambique, basuzuma neza ikibuga n’imiterere y’inyeshyamba, birangira kuwa 9 Nyakanga abasirikare n’abapolisi 1000 buriye RwandAir, mi minsi micye bafata agace ka Sagal, banahashinga ibirindiro.

Kugeza icyo gihe, benshi muri twe ntitwari tuzi igihe iyi ntambara izamara, kuko no mu gihe cyo kohereza ingabo, Umuvugizi w’Ingabo z’u Rwanda, Col Ronald Rwivanga, yavuze ko ikibajyanye ari ukwirukana umwanzi, kandi ko igihe bizatwara kitazwi, mu gihe ibihugu nka Afurika y’Epfo na yo ifite ingabo muri Mozambique, yatangaje ko ubutumwa bwayo buzamara amezi atatu gusa.

Icyakora mu gihe kitageze ku kwezi, ingabo z’u Rwanda zimaze kubohoza imijyi yose yo mu Ntara ya Cabo Delgado, uwa nyuma ukaba wari Mocímboa da Praia, Umujyi ukomeye cyane kuko ufatwa nk’Umurwa Mukuru wa Cabo Delgado, ukaba ari nawo ubarizwamo icyambu n’ikibuga cy’indege.

Kuri ubu ingabo za Leta ya Mozambique, ku bufatanye n’ingabo z’Umuryango w’Iterambere, SADC, ndetse n’ingabo z’u Rwanda, ziri kugenzura ibice byose byagenzurwaga n’inyeshyamba.

Ingabo z'u Rwanda zizakomeza guhangana n'imitwe y'iterabwoba ikiri kwihishahisha mu mashyamba ari mu Ntara ya Cabo Delgado
Ingabo z'u Rwanda zabohoye Mocimboa da Praia zifatanyije n'iza Mozambique

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .