Ngororero: Abarokotse Jenoside batunze agatoki abo bashinja kuyigiramo uruhare batigeze bakurikiranwa

Yanditswe na N.Kubwimana Janvière
Kuya 7 Nyakanga 2019 saa 02:30
Yasuwe :
0 0

Bamwe mu bari abakozi b’Uruganda rw’icyayi rwa Rubaya rwo mu Karere ka Ngororero baharokokeye Jenoside yakorewe abatutsi mu 1994, batunga agatoki bamwe mu bagize uruhare muri aya mahano bacyidegembya, bagasaba ko inzego zibishinzwe zibakurikirana.

Ibi byagarutsweho ku wa 3 Nyakanga 2019 ubwo abakozi b’uru ruganda, abahinzi b’icyayi n’abandi baturage bo mu Karere ka Ngororero, bari mu gikorwa cyo kwibuka 30 bari abakozi b’uru ruganda n’abandi batandatu bari bahahungiye, bazize Jenoside yakorewe Abatutsi mu 1994.

Havugimana Samuel warokokeye kuri uru ruganda rw’icyayi, yatanze ubuhamya bwagarutse kuri amwe mu mazina y’abahoze ari abayobozi babo bagize uruhare mu iyicwa ry’Abatutsi bari bahahungiye.

Ati “Aha ku ruganda mu gihe cya Jenoside habereye ubwicanyi bukabije, haberaga imyitozo irimo n’indirimbo zirimo inyigisho zuje urwago ku Batutsi. Nibuka ko hari imodoka y’abapolisi yaduhungishirije aha ngo baduhishe, tuhageze uwari umuyobozi wacu witwa Nkinamubanzi Pierre Celestin yanga ko bayikingurira ngo uruganda ni urw’icyayi si urw’inyenzi.”

“Bahise bahuruza Interahamwe zaraje zirabica, ariko inkiko Gacaca zamugize umwere. Hari n’uwitwaga Bimenyimana na Sibomana nabo bayoboraga imyitozo yaberaga aha, turasaba inzego zibishinzwe gukurikirana abo bagabo natwe abatangabuhamya turahari kugira ngo ukuri kujye ahagaragara.”

Uwitwa Sibomana Aimable we yashimiye ubuyobozi bw’uru ruganda bwemeye ko yashyirwa ikimenyetso cya Jenoside yakorewe Abatutsi kubera abahaguye, nyuma y’igihe babisaba.

Ati “Ariko turacyababajwe n’uko abagize uruhare mu iyicwa ry’Abatutsi bari bahungiye aha bagihari batakurikiranwe.”

“Ikindi iyo tugiye kwishyuza imitungo yangijwe, dusiragizwa mu manza ugasanga abakoze ibyo byaha imitungo yabo barayikuyeho ikandikwa ku bandi kandi uko bayikuyeho ntubimenye, rwose turasaba ko hashyirwaho komisiyo yihariye ngo ikurikirane ibi bintu kuko bibangamiye ubumwe n’ubwiyunge bwacu.”

Umuyobozi Wungirije w’Akarere ka Ngororero ushinzwe imibereho myiza y’abaturage, Kuradusenge Janviere, yijeje abatarahabwa ubutabera ko abagize uruhare muri aya mahano bazabibazwa kuko ibyaha bya Jenoside bidasaza.

Ati “Yaba abari mu gihugu imbere n’abari hanze, bazabikurikiranwaho byanga bikunda kuko ubushobozi burahari, mwumvise ko hari n’abatangiye gufatwa, icyaha cya Jenoside ntigisaza hasaza nyiracyo.”

“Naho icy’imitungo yagiye yibaruzwaho n’abandi kugira ngo batazishyura ibyo bangije, nacyo tugiye gufatanya n’abashinzwe iby’ubutaka tumenye inzira byanyuzemo bayikuraho, kugira ngo abangirijwe ibyabo muri Jenoside bishyurwe.”

Umuyobozi w’Uruganda rw’icyayi rwa Rubaya, Mutabazi Jean, avuga ko rwiyemeje ko buri mwaka rugomba gutegura ibikorwa byo kwibuka abari abakozi barwo bazize Jenoside, aho amazina yabo yanditswe ku rwibutso rwahashyizwe mu rwego rwo kubaha icyubahiro.

Yanashimye impinduka zabaye mu bakozi b’uruganda, aho mbere ngo kurukoramo byasabaga kuba uko muri ako gace gusa.

Ati “Ubu duha akazi ingeri zose hirya no hino mu gihugu, ikindi dukora ibikorwa by’iterambere ku baturage nta kurobanura. Nubwo mu buhamya bwatanzwe byumvikana ko hari ibitaragerwaho, tuzakomeza gukora ubuvugizi kuko n’iyo twibutse dutumira inzego zitandukanye zirimo n’iz’umutekano kugira ngo zibidufashemo.”

Uru ruganda kandi rwanagize igikorwa cyo guha inka abafite ababo baguye muri uru ruganda muri Jenoside, mu rwego rwo kubaremera.

Usibye ibikorwa byo Kwibuka bikorwa n’uruganda rw’icyayi rwa Rubaya, runakora ibindi bifasha abaruturiye kwiteza imbere, aho rwatanze amazi meza ku ngo ibihumbi 500 runaha akazi abasaga ibihumbi 10.

Rwubatse kandi amarerero, rutanga imbuto y’icyayi n’inyongeramusaruro ku bahinzi nta kiguzi, ruremera abatishoboye bahabwa amatugo maremare n’amagufi n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza