Ngororero : Abahinzi barataka igihombo batewe n’indwara ya MLND

Yanditswe na Uwishyaka Jean Louis
Kuya 20 Ukwakira 2016 saa 09:20
Yasuwe :
0 0

Abahinzi b’ibigori bo mu Murenge wa Kabaya, mu Karere ka Ngororero, baravuga ko bahinze maze imbuto yabo ikibasirwa n’indwara ya kirabiranya ifata ibigori izwi ku izina rya MLND (Maize Lethal Necrosis Disease), byatumye nta cyo basarura.

Ubwo bari mu Kiganiro urubuga rw’abaturage n’abayobozi, gitegurwa n’Umuryango w’Abanyamakuru baharanira amahoro ‘Paxpress’ cyabaye tariki ya 13 Ukwakira 2016, abo bahinzi bo mu Tugari dutandukanye two muri uwo murenge bavuga ko uku kurumba kwatewe n’udusimba tubirya bikuma, bikarumba ntibagire icyo basarura.

Musengimana Innocent, utuye mu Kagari ka Gaseke, avuga ko yarwaje iyi ndwara ntagire icyo asarura. Ati “Mu kigori hagati haba harimo nkongwa.Umusaruro nari niteze si wo nabonye kubera iyo ndwara.”

Barutande Marie, na we ni umuhinzi uvuga ko iyo ndwara yafashe ibigori yahinze bituma umusaruro ubura.

Yagize ati “Mu ruti rw’ikigori usanga harimo udusimba twinshi tw’umukara. Ibyo nari nahinze byose nabitemeye hasi, baranatubwiye(abafashamyumvire b’ubuhinzi) ngo nta wabiha inka byazitera indwara.”

Umukozi ushinzwe ubuhinzi mu Murenge wa Kabaya, Ndikubwimana Fulgence, avuga ko iki kibazo ubuyobozi bukizi.

Yagize ati “Indwara ya kirabiranya ifata ibigori, ikwirakwizwa n’udukoko tuguruka, yibasiye cyane akagari ka Ngoma n’aka Nyenyeri. Iyo yafashe umurima nta kintu ushobora gukuramo. Icyo kibazo turakizi, ubu twafashe ingamba zitandukanye zo kuyirwanya.”

Zimwe mu nama zigirwa abahinzi aho iyi ndwara yafashe,ni ukutongera kuhasubiza ibigori mu gihembwe gikurikiyeho, ahubwo ngo bashobora kuhahinga ibindi bihingwa.

Ikindi ngo abahinzi baba bakwiye kurandura ibigori byagaragaje ibimenyetso by’iyo ndwara, bagacukura, bakabirenzaho itaka, hakabaho no gutera umuti ku bigori byasigaye kugira ngo udukoko dutera iyo ndwara ntitubigereho.

Indwara ya kirabiranya ifata ibigori, yatangiye kugaragara mu Ntara y’Amajyaruguru by’umwihariko mu Karere ka Musanze mu mwaka wa 2013. Yakomereje mu Ntara y’ i Burengerazuba mu turere twa Rutsiro, Karongi, Rubavu na Ngororero.

Iyo ndwara ituma ibigori byuma ku buryo umuhinzi adasarura
Aba bahinzi bavuga ko nta cyo bigeze basarura bitewe n'iyi ndwara ya MLND

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza