00:00:00 IGIHE NETWORK KN KINYARWANDA EN ENGLISH FR FRANCAIS

Ngoma: Umunyerondo uheruka gucibwa ikiganza n’abajura yahawe inka

Yanditswe na Hakizimana Jean Paul
Kuya 7 Ukwakira 2021 saa 04:47
Yasuwe :
0 0

Umugabo ukora irondo ry’umwuga witwa Mbonigaba Innocent uherutse gucibwa ikiganza n’abajura bo mu Karere ka Ngoma, ari mu abaturage 104 bahawe inka, yitezweho kumufasha mu mibereho ye.

Iyi nka yayihawe mu miryango 104 yorojwe muri gahunda ya Girinka mu Karere ka Ngoma kuri uyu wa Kane tariki ya 7 Ukwakira 2021. Abaturage bahawe inka ni abo mu cyiciro cya mbere n’icya kabiri by’ubudehe mu rwego rwo kubafasha kwiteza imbere.

Mbonigaba Innocent yavuze yaciwe ikiganza n’abajura tariki ya 10 Nzeri ubwo bari ku irondo bagatabazwa n’abaturage ko babibye inanasi mu kujya kubafata ngo barabirukankanye we bamutema ikiganza kivaho.

Yavuze ko kuva ubwo kugeza n’ubu acyivuza ku Bitaro bya Kibungo ashimira ubuyobozi bwakomeje kumuba hafi bukaba bunamuhaye inka ihaka izamufasha mu kwita ku muryango we.

Ati "Mfite abana babiri ariko natekerezaga ko bashobora kuzajya mu mutuku bitewe n’uko ntakibasha kubashakira ibyo kurya bihagije ariko ubu ndashimira ubuyobozi bwaduhaye inka aho igiye kumfasha mbone amata n’ifumbire."

Undi muturage witwa Rugina Christophe utuye mu Murenge wa Zaza we yahawe inka yabyaye mu gitondo ubwo yari agiye kuyishyikirizwa. Rugina yavuze ko ari ibyishimo bikomeye kubona atomboye inka igahita ibyara avuga ko igiye kumufasha mu iterambere.

Ati "Ndishimye cyane sinabona uko mbivuga gufata inka igahita ibyara, ubu rero ngiye kuyifata neza ku buryo izangirira umumaro nkava mu cyiciro cya kabiri ndimo nibura nanjye nkajya mu cyiciro cy’abadafashwa.

Twahirwa Laurent ufite imyaka 71 we yavuze ko ari bwo bwa mbere yoroye inka mu buzima bwe, avuga ko azayifata neza ikamugirira umumaro agakomeza gusaza neza.

Umuyobozi w’Akarere ka Ngoma wungirije ushinzwe iterambere ry’ubukungu, Mapambano Nyiridandi Cyriaque, yasabye abahawe inka kuzifata neza zikabateza imbere.

Ati "Icyo dusaba abaturage ni uko izi nka baba bagabiwe n’Umukuru w’Igihugu bazifata neza mu buryo bushoboka bwose kuko tuba tubahaye inka zihaka zatoranyijwe, zasuzumwe; nta mpamvu n’imwe yatuma zitabagirira umumaro."

Yavuze ko kuri ubu bafite abazihawe mbere bagenda bitura bagenzi babo bigafasha Akarere kugira abaturage benshi boroye inka zibafasha mu kubona amata n’ifumbire.

Kuri ubu Akarere ka Ngoma karateganya ko muri uyu mwaka w’imihigo hazatangwa inka 900 ziganjemo izizakurwa mu kwitura, kuva mu 2006 gahunda ya girinka itangiye muri aka Karere hamaze gutangwa inka 10.724.

Umunyerondo waciwe ikiganza ari mu kazi yahawe inka yishimira ko abana be bagiye kujya banywa amata
Abandi baturage basaga 100 batishoboye borojwe inka mu Karere ka Ngoma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .