Ngoma:Abarokotse Jenoside yakorewe abatutsi barasaba ababiciye kubabwiza ukuri

Yanditswe na Baryaherezahe Léonce
Kuya 4 Kanama 2019 saa 08:24
Yasuwe :
0 0

Tatiki ya 01 Kanama 2019 mu murenge wa Rukumberi ho mu karere ka Ngoma mu gikorwa cy’ubumwe n’ubwiyunge, abagororwa 14 bafungiye muri gereza ya Bugesera basabye imbabazi mu ruhame abo biciye ababo muri Jenoside yakorewe abatutsi 1994.

Kwimakaza ubumwe n’ubwiyunge mu Banyarwanda, ni inzira ihamye Leta y’ u Rwanda yashyizeho nyuma yo guhagarika Jenoside,aho abakoze Jenoside bemera icyaha bakirega bakanagisabira imbabazi mu ruhame.

Muri uyu muhango wo Gusaba imbabazi, abagororwa 14 bahagaze mu ruhame basaba imbabazi abarokotse Jenoside .

Habimana Emmanuel bitaga Cyasa,afite imyaka 62. Yakatiwe igihano ya burundu. Ni umwe mu bari bakuriye Interabamwe muri Sake.

Avuga ko mu mwaka 2000 yafashe iya mbere agatangira urugendo rwo gusaba imbabazi kuko ibyo yakoze yumvaga bimuremereye.

Habimana yagize ati”Icyaha cya Jenoside nakoze cyarambabaje ndacyemera, ndacyirega, nkisabira n’imbabazi ndetse mfata n’umwanzuro wo kubikangurira n’abandi twafatanije kugikora kugira ngo dutange n’umusanzu wo kurwanya abapfobya bakanahakana Jenoside yakorewe Abatutsi.”

Muyoboke Stephanie warokotse Jenoside, yavuze ko kuba yari amaze imyaka 25 atazi abamwiciye umuryango n’aho washyinguwe, byamuteraga agahinda katadashira.
Yavuze ko amaze kumenya iby’urupfu rwa se na nyina byatumye aruhuka umutima maze atanga imbabazi.

Muyoboke yakomeje asaba aba bateye iyi ntambwe gukomeza gukangurira n’abinangiye kubabwiza ukuri kw’ababo bishwe n’aho imibiri yabo iherereye kugira ngo ishyingurwe mu cyubahiro.

Umuyobozi ushinzwe ibikorwa muri Komisiyo y’igihugu y’ubumwe n’ubwiyunge, Mugaga Johnson, yashimiye abitabiriye uyu muhango wo gusaba imbabazi,ashimira abagororwa bemeye bakirega bakaba baje no gusaba imbabazi ndetse anabahamagarira kurushaho kuvugisha ukuri ku bwicanyi bakoze muri Jenoside kuko aribyo abanyarwanda bakeneye.

Mugaga yagize ati “Gusaba imbabazi ni ubutwari bushingiye ku kwicisha bugufi kandi gutanga imbabazi ni ubutwari bushingiye ku bupfura.”

Yakomeje kandi asaba Urwego rw’Igihugu rushinzwe imfungwa n’abagororwa(Rcs),abanyamadini n’indi miryango ishinzwe kwimakaza ubumwe n’ubwiyunge muri za gereza ariko bakarushaho gukangurira abagororwa basaba imbabazi kuvugisha ukuri ko mu mutima kuko ariko gukenewe n’umuryango Nyarwanda.

Muri uyu muhango abagororwa 14 nibo basabye imbabazi mu ruhame. Abagororwa ibihumbi 6000 nibo bamaze kwandika amabaruwa basaba imbabazi,1800 bamaze guhuzwa n’abo biciye ababo muri Jenoside banababwa imbabazi.

Abakoze Jenoside bavuze ko gusaba imbabazi byabaruhuye umutima
Umwe mu bakoze Jenoside (ibumoso) ahobera uwarokotse Jenoside nyuma yo kwirega no gusaba imbabazi
Abagororwa 14 nibo basabye imbabazi barazihabwa mu ruhame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza