Kwamamaza

Ngoma: Abakozi ba IPRC East boroje abatishoboye amatungo y’ibihumbi 750

Yanditswe kuya 27-11-2016 saa 18:01' na IGIHE


Abakozi 120 bakora mu Ishuri rikuru ryigisha Imyuga n’Ubumenyingiro mu Ntara y’Iburasirazuba ( IPRC East ) bibumbiye mu kimina Imanzi boroje amatungo magufi imiryango 25 yo mu Murenge wa Rukumberi mu Karere ka Ngoma, banabigisha ibijyanye no kwizigamira , gukorera hamwe no kwihangira imirimo.

Amatungo yorojwe abaturage ni ihene 25 zifite agaciro k’amafaranga 750 000 Frw). Aba bakozi bibumbiye mu kimina bise Imanzi bakoze iki gikorwa nyuma yo kwifatanya n’abaturage bo mu Murenge wa Rukumberi mu muganda tariki ya 26 Ugushyingo2016, aho bateye imbuto y’imyumbati ku buso bwa hegitari 42 mu kagari ka Ntovi kamwe mu tugize Umurenge wa Rukumberi.

Uhagarariye aba bakozi bibumbiye mu kimina bise Imanzi, Byiringiro Jean Claude, yagize ati “Ihene ni itungo ritagorana kandi ritanga umusaruro mu buryo bwihuse. Aya matungo azanabaha ifumbire, kandi azabafasha gukemura ibibazo byabo bitandukanye byabadindizaga mu iterambere,’’

’’Ibi bijyanye n’umuco twatojwe wo gufasha no gufashanya nk’abanyarwanda bigamije kwishakamo ibisubizo tutarinze gutegereza ibiva hanze.’’

Mu kwigishwa ibijyanye no kwizigamira, abaturage babwiwe ko kwizigamira bishingiye ku kwigomwa ibintu runaka bigateganyirizwa igihe kizaza nk’amafaranga, imyaka ( umusaruro w’ubuhinzi), amatungo n’ibindi.

Ubuyobozi bw’Umurenge wa Rukumberi bwo buvuga ko ariya matungo azafasha abaturage gukemura ibibazo bitandukanye kandi na none ngo azabafasha mu buhinzi kuko bagiye kubona ifumbire izaturuka kuri ayo matungo. Ngo abahawe amatungo ni abari bayakeneye kuko ntayo bagiraga.

Aba bakozi bigishije abaturage ko bagomba kureka kugendera ku mvugo za cyera zishobora kubuza abantu kuzigama. Zimwe muri zo ni imigani nka ‘Urondereza ubusa bukimara’, ‘Amavuta y’umugabo ni amuraye ku mubiri’ n’izindi zumvikanisha ko ibyo umuntu afite byose aba agomba kubikoresha. Iyo myumvire ngo igomba guhinduka abantu bakamenya kwizigamira no muri bike bafite, maze ngo bikaba inkingi yo kwigira no kwiteza imbere.

Ikimina Imanzi kigizwe n’abanyamuryango 120. Ubuyobozi bwacyo buvuga ko nyuma yo kubona ibyiza n’akamaro ko kwibumbira hamwe, abanyamuryango bagize igitekerezo cyo kubishishikariza abanyarwanda binyuze mu buryo bw’ibiganiro ku kwizigamira nk’inkingi yo kwigira no kwiteza imbere.

Mwenedata François utuye mu Murenge wa Rukumberi avuga ko akamaro ko kwizigamira akumva neza kuko we yizigamiye imyaka n’amatungo none ngo ibura ry’imvura ntabwo ryamuhungabanije cyane kuko ngo yagobotswe n’ibyo yari yarizigamiye.

Mukamazimpaka Beata uba mu muryango w’abantu batandatu ni umwe mu bahawe ihene, avuga ko izamufasha kujya atanga ku gihe amafaranga y’ubwisungane mu kwivuza, kubona ay’ishuri, ibikoresho n’ibindi. Amafaranga yo gukoresha ibintu bya ngombwa nk’ibyo ngo hari igihe yajyaga ayabura akabyihorera.

Abahawe ihene bose, nizimara kubyara nabo bazoroza abandi, bityo amatungo agere ku mubare munini w’abayakeneye. Ni ubwa gatatu aba bakozi bafashije abatishoboye mu bikorwa nk’ibi ngarukamwaka.

Abaturage bo mu Murenge wa Rukumberi bashyikirizwa amatungo bagenewe
Byiringiro Jean Claude, ukuriye Ikimina Imanzi ashyikiriza aba baturage inkunga bahawe
Aba bakozi bafatanyije n'abaturage mu muganda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved