Kwamamaza

Ibibazo byugarije sosiyete zicuruza ibijyanye n’amashanyarazi

Yanditswe kuya 27-10-2016 saa 08:38' na IGIHE


Bamwe mu bayobozi ba sosiyete zigenga zisakaza serivisi z’ibikomoka ku ngufu z’amashanyarazi mu baturage batangaje ko bagihura n’imbogamizi zituma batazitanga uko bikwiye, ndetse basaba gukorerwa ubuvugizi.

Ibi babigarutseho mu nama nyunguranabitekerezo yahuje Ihuriro ry’Abikorera mu bijyanye n’ingufu z’amashanyarazi (EPD), n’abafatanyabikorwa baryo, Ikigo gishinzwe kongera ingufu (EDCL) na Minisiteri y’Ibikorwa remezo (Mininfra), byari bigamije kureba uruhare rw’abikorera mu kuzamura urwego rw’ingufu mu gihugu, imbogamizi zigaragaramo ndetse n’uburyo bwo kuzishakira umuti urambye.

Iyi nama yateranye ku mugoroba wo kuri uyu wa Gatatu, tariki ya 26 Ukwakira 2016, yari igamije kandi kurebera hamwe uburyo bwo gushishikariza abantu gushora imari mu rwego rw’ingufu mu Rwanda.

Umuyobozi Mukuru wa BBOXX, imwe muri kompanyi itanga serivisi zijyanye n’umuriro ukomoka ku mirasire y’izuba, Justus Mucyo, yabajije icyo inzego bireba ziteguye gukora kugira ngo abikorera nabo bashyire mu bikorwa gahunda zabo nta mbogamizi bahuye nazo.

Yagize ati "Hari imwe mu mishinga itangazwa, ariko ntihite ishyirwa mu bikorwa. Turagira ngo tubaze, icyizere muduha ko ibiva muri ibi biganiro bizatanga umusaruro w’igihe kiri imbere."

Umuyobozi Mukuru wa SynchroPower Systems Ltd ikora ibijyanye no kwiga imishinga ijyanye no gutanga ingufu z’amashanyarazi, Uwihoreye Samuel, nawe yagarutse ku nzitizi bahura nazo, iyo bashaka gutangiza imishinga cyane isaba igishoro cyo ku rwego rwo hejuru.

Yagize ati "Turacyahura n’imbogamizi kuko hari ubwo dutegura imishinga ariko yarangira tukabura amafaranga yo kuyitangiza. Iyo tugerageje kwegera banki usanga amafaranga ushaka kugira ngo umushinga wawe ushyirwe mu bikorwa ntiyaguhe kubera inyungu bagusaba iri hejuru cyane, kubera ingwate usabwa gutanga. Rimwe na rimwe bigatuma uwuha undi muntu ufite ubushobozi akaba ariwe uwukurikirana."

Inzego zahagurukiye gushakira umuti iki kibazo

Mu rwego rwo gushakira umuti bimwe mu bibazo bikigaragara mu kunoza imitangire y’ingufu z’amashanyarazi, Leta yatangije imikoranire n’inzego zitandukanye yo koroshya imitangire ya serivisi ku bagenerwabikorwa, ndetse no gushyiraho uburyo baganira ku mishinga yabo itandukanye.

Bimwe mu bigo mpuzamahanga birimo GIZ yo mu Budage, byiyemeje gutera inkunga imishinga y’intangarugero mu rwego rw’ingufu, ndetse na Banki y’Isi itanga inkunga yayo mu guha imbaraga uru rwego.

Umuyobozi Mukuru wa EPD, Dr Ivan Twagirashema yatangaje ko uru rwego rugeze ku ntambwe nziza, ugereranyije n’aho ruvuye.

Yagize ati "Urebye aho urwego rw’abikorera rugeze mu bikorwa byo gutanga amashanyarazi wavuga ko ari intambwe ishimishije kandi itanga icyizere kuko hari ubufatanye hagati yabo na EPD nk’ihuriro ribahuza na Leta mu kurushaho kunoza imitangire y’iyi serivisi."

Yakomeje agira ati "Ku mpungenge zihari ko uyu mushinga ureba cyane abo mu byaro kandi rimwe na rimwe usanga nta bushobozi bafite, Leta yabitekerejeho ishyiraho uburyo buborohereza kubona inguzanyo ibafasha kubona amashanyarazi."

EPD ni ishami ry’Urugaga rw’Abikorera mu Rwanda (PSF), rikorana n’ibigo byigenga bitanga serivisi z’ingufu, izikomoka ku mashanyarazi, imirasire y’izuba, nyiramugengeri, biogas n’izindi, yatangiye gukorera mu gihugu mu mpera za 2013.

EPD ikorera ubuvugizi abanyamuryango bayo, kubashishikariza kugirana imikoranire na sosiyete zigenga ziturutse hanze y’igihugu, ndetse no kubahuza n’amabanki n’ibindi bigo by’ishoramari bibafasha gushora amafaranga mu mishinga itandukanye ikorerwa imbere mu gihugu.

U Rwanda rufite intego y’uko mu mwaka wa 2017, abaturage bagera kuri 70% bazaba bacanirwa, naho muri 2020, abagera ku 100% bazaba bacana.

U Rwanda rufite umuriro w’amashanyarazi ungana na Megawatts 193, ukoreshwa n’abaturage bangana na 24%.

Intego ihari ni uko mu 2018 abaturage bazaba bafite umuriro w’amashanyarazi aturuka mu mazi bagomba kuba ari 48%, abandi 22% bakazaba bakoresha ubundi buryo bubyara ingufu, burimo imirasire y’izuba, biogas, n’ibindi.

Leta yihaye intego yo kuba yatangiye gutanga ingufu zingana na megawatt 563 muri 2018 binyuze mu mishinga itandukanye.

Abayobozi batandukanye ba sosiyete zicuruza ibijyanye n'ingufu z'amashanyarazi mu biganiro
Umunyamabanga Mukuru wa EPD, Dan Klinck yizeye ko ubufatanye hagati y'inzego zose buzatanga umusaruro
Umuyobozi Wungirije wa EPD, Ndayisaba Edouard
Ibi biganiro byitabiriwe n'abantu bingeri zose
Umuyobozi w'Umushinga Shell Foundation muri EPD, Sanday Kabarebe
Umuyobozi ushinzwe ibijyanye n'ingufu muri EDCL, Kayitare Morris yijeje abikorera ubufatanye mu kuzamura imitangire ya serivisi z'ibikomoka ku mashanyarazi
Umuyobozi wa Synchropower Systems Ltd, Uwihoreye Samuel yatangaje ko hari zimwe mu mbogamizi bagihura nazo
Umuyobozi w'Ishami ry'Ingufu muri Minisiteri y'Ibikorwaremezo (MININFRA), Nyamvumba Robert, atangaza ko imikoranire ya Leta n'urwego rw'abikorera itanga icyizere
Umuyobozi Mukuru wa EPD, Dr. Ivan Twagirashema ashimangira ko urwego rw'abikorera rumaze gutera intambwe igaragara

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved