Never Again Rwanda yatangije umushinga uzongera uruhare rw’umuturage mu bimukorerwa

Yanditswe na David Eugène Marshall
Kuya 17 Gicurasi 2018 saa 12:08
Yasuwe :
0 0

Hakunze kumvikana uturere twagaragaweho gusigara inyuma mu mihigo n’iterambere ryatwo kubera kudasangiza imigabo n’imigambi abadutuye ngo bayigiremo uruhare mu buryo bufatika.

Ibi byigaragaje mu isuzuma ry’imihigo y’uturere yo mu 2016, aho Akarere ka Musanze kabaye aka nyuma, kisuzumye gasanga byaratewe no guhiga kadafatanyije n’abaturage. Mu mwaka wakurikiyeho, iri kosa ako karere kararikosoye, gahita kabona umwanya wa kabiri mu mihigo ya 2017.

Ni muri urwo rwego Umuryango udaharanira Inyungu, Never Again Rwanda, ku bufatanye n’uwitwa ‘Interpeace’ byahuje ingamba bitangiza umushinga ugamije gushimangira uruhare rw’umuturage mu guhitamo ibimukorerwa.

Ibi bikorwa byatangijwe ku mugaragaro kuri uyu wa Gatatu bizamara imyaka ibiri n’igice.

Komiseri muri FPR Inkotanyi, Gasamagera Wellars, umwe mu batanze ikiganiro, yavuze ko n’ubwo intego zigamijwe muri gahunda ya Never Again Rwanda ari ukwimakaza umuco w’uko abaturage bagomba kugira uruhare mu byemezo bibafatirwa, ngo hakwiye kwitabwa no ku baturage bagifite imyumvire iri hasi, bumva ko gufatanya n’ubuyobozi byabakururira ibyago.

Gasamagera yatanze ubuhamya bw’uko hagati ya 1999 na 2000 ubwo igihugu cyatangizaga gahunda yo kwegereza ubuyobozi abaturage ari ibintu batumvaga, bamwe bagakeka ko Leta ishaka kubakorera urusyo bashingiye ku ruhare rubi byavugwaga ko bamwe bagize muri Jenoside yakorewe Abatutsi mu 1994.

Aha niho yahereye asaba abayobozi gushyira imbaraga mu kwimakaza icyizere cy’imiyoborere myiza mu mitima ya bamwe bashenguwe n’ubutegetsi bubi bwahozeho.

Umuyobozi w’Ishami rikurikirana itangwa rya Serivisi, Imiyoborere myiza n’Ihuriro ry’Abafatanyabikorwa mu Iterambere (JADF) mu Rwego rw’Igihugu rw’Imiyoborere (RGB), Judith Kazaire, yasabye ko uyu mushinga mushya abaturage n’abayobozi bawibonamo kugira ngo uzagire akamaro.

Ati “Ubushakashatsi bwakozwe na RGB bwagaragaje ko uruhare rw’abaturage mu miyoborere ruri hejuru ya 76.4%, ariko icyerekezo cy’igihugu ni uko tugera kure kurushaho. Icyo twasaba n’uko ari abaturage, uturere twatoranijwe ndetse n’abawushyira mu bikorwa bawugira uwabo, umushinga ukazadusigira ingaruka nziza ziyongera ku bikorwa bisanzwe.”

Umuyobozi w’Ishami rishinzwe Imiyoborere myiza n’Uburenganzira bw’Abaturage muri Never Again, Ntahobari Noël, yasobanuye ko ubusanzwe ibikorwa byabo byibanda ku guhuriza abaturage mu matsinda mato, bo ubwabo bakishyiriraho urutonde rw’ibibazo bafite bakurikije ibiremerereye kurusha ibindi, hagakurikiraho kubahuza n’abayobozi mu rwego rwo gufatira hamwe ingamba zigamije kubonera ibisubizo ibyo bibazo.

Ambasaderi w’Umuryango w’Ubumwe bw’u Burayi mu Rwanda, Nicola Bellomo, yashimye iyi gahunda avuga ko ari ingirakamaro.

Yagize ati “Twizeye ko uyu mushinga uziye igihe mu gushimangira ko imiyoborere myiza mu Rwanda itagarukira mu nzozi nziza igihugu gifite gusa, ko ahubwo birushaho kuba ukuri kwigaragaza kurushaho iyo abaturage bafatanyirije hamwe n’abayobozi babo mu kugena no gushyira mu bikorwa ibyemezo biturutse mu nyigo n’ingamba bafatiye hamwe.”

Uturere uyu mushinga uzibandaho ni Gasabo, Nyagatare, Musanze, Rutsiro na Huye.

Abayobozi batandukanye bitabiriye iyi nama
Umuyobozi mukuru wa Never Again Rwanda, Dr. Joseph Ryarasa Nkurunziza, ageza ijambo ku bitabiriye inama ku ruhare rw'umuturage mu bimukorerwa
Umuyobozi w’Ishami rikurikirana itangwa rya Serivisi, Imiyoborere myiza n’Ihuriro ry’Abafatanyabikorwa mu Iterambere (JADF) mu Rwego rw’Igihugu rw’Imiyoborere (RGB), Judith Kazaire
Komiseri Gasamagera Wellars yasabye abayobozi kurushaho kubaka icyizere mu mitima y'abo bayobora
Ambasaderi w’Umuryango w’Ubumwe bw’u Burayi mu Rwanda, Nicola Bellomo, yashimye iyi gahunda avuga ko ari ingirakamaro
Umuyobozi w’Ishami rishinzwe Imiyoborere myiza n’Uburenganzira bw’Abaturage muri Never Again, Ntahobari Noël, yasobanuye ko ibikorwa byabo byibanda ku guhuriza abaturage mu matsinda
Nyuma y'inama, abayitabiriye bafashe ifoto y'urwibutso

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza