00:00:00 IGIHE NETWORK KN KINYARWANDA EN ENGLISH FR FRANCAIS

NEC yatangaje ingengabihe y’amatora y’inzego z’ibanze

Yanditswe na Muhonzire Sylvine
Kuya 1 Ukwakira 2021 saa 01:07
Yasuwe :
0 0

Komisiyo y’igihugu y’amatora, NEC, yatangaje igihe amatora y’inzego z’ibanze n’ay’inama z’igihugu azabera nyuma y’uko ayari ateganyijwe muri Gashyantare 2021 asubitswe kubera icyorezo cya Covid-19.

Aya matora azaba hubarijwe amabwiriza yose yo kwirinda Coronavirus, aho ateganyijwe kuba mu matariki atandukanye y’Ukwakira n’Ugushyingo kuko hazatorwa imyanya ya komite zitandukanye guhera ku rwego rw’Umudugudu kugera ku rw’Akarere.

Guhera ku itariki ya 11 Ukwakira kugera ku ya 20, hazabaho igikorwa cyo kwakira kandidatire z’abifuza kujya mu nama Njyanama z’Uturere, nyuma y’iminsi itandatu ni ukuvuga kwa 26 Ukwakira hatangazwe kandidatire zemejwe ku mwanya w’ubujyanama mu Turere.

Hagati ya tariki 3 na 12 Ugushyingo, nibwo aba bakandida baziyamamaza hifashishijwe ikoranabuhanga, maze amatora nyir’izina kuri iyi myanya abe kuwa 26 Ugushyingo 2021 mu gihe aya Biro z’inama njyanama z’Uturere na ya Komite Nyobozi z’Uturere azaba kuwa 19 Ugushyingo 2021.

Andi matora ateganyijwe harimo aya Komite Nyobozi y’Umudugudu azaba kuwa 23 Ukwakira, aya Biro y’Inama Njyanama y’Akagari azaba kuwa 30 Ukwakira, aya Biro y’Inama Njyanama y’Umurenge yo azaba ku itariki 6 Ukwakira 2021, ariko akabera rimwe n’amatora ya komite y’Inama z’igihugu ku Murenge.

Amatora y’abagize komite y’inama z’igihugu ku Karere yo azaba ku itariki 9 Ugushyingo.

Aya Komite Nyobozi y’Inama y’Igihugu y’Abagore n’iy’abantu bafite ubumuga ku Ntara n’Umujyi wa Kigali azaba kuwa 22 Ugushyingo naho ku munsi ukurikiyeho kuwa 23 Ugushyingo habe Amatora ya Komite Nyobozi z’Inama z’Igihugu ku rwego rw’Igihugu.

Ibyavuye mu matora yo ku rwego rw’Akarere, Intara n’Igihugu bizatangazwa bitarenze kuwa 26 Ugushyingo, bikurikirwe na raporo rusange y’amatora izatangazwa mbere y’uko umwaka wa 2021 urangira naho bitarenze kuwa 31 Mutarama 2022 iyi Komisiyo izaba yatanze urutonde rw’abatowe mu nzego zose n’ibibaranga.

Manda y’abazaba batowe bose izatangira muri Gashyantare 2022, aho izamara imyaka itanu nta gihindutse.

Aya matora yose azatwara miliyari 3 z’amafaranga y’u Rwanda nkuko biherutse gutangazwa na NEC.

Amatora y'inzego z'ibanze ategerejwe gutangira mu Ukwakira 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .