00:00:00 IGIHE NETWORK KN KINYARWANDA EN ENGLISH FR FRANCAIS

Musenyeri Rukamba yashinze ikigo kizigisha imyuga abangavu batewe inda imburagihe

Yanditswe na Prudence Kwizera
Kuya 10 Ugushyingo 2021 saa 11:29
Yasuwe :
0 0

Nyuma yo kubona ko ubuzima bw’abangavu bukomeje kujya ahabi kubera guterwa inda imburagihe kandi bakomoka mu miryango itishoboye, kuri ubu bamaze gushyirirwaho ikigo kizabafasha kwiga imyuga izabafasha kwiteza imbere.

Icyo kigo cyitwa Centre des Jeunes Saint Vincent de Paul gihereye mu Kagari ka Gatoki mu Murenge wa Save, kigamo abagera kuri 80 baturuka mu turere twa Huye na Gisagara.

Umuyobozi wa Caritas ya Diyoseze ya Butare, Padiri Gilbert Kwitonda, arasobanura ko gushinga icyo kigo byaturutse ku gitekerezo cy’Umushumba wa Diyoseze ya Butare, Musenyeri Philippe Rukamba.

Ati “Iki gikorwa cyavuye ku gitekerezo cya Musenyeri Philippe Rukamba, Umwepiskopi wa Diyoseze ya Butare amaze kubona ko hari abakobwa benshi babyariye iwabo akabona imibereho yabo n’iy’abo bana, agira igitekerezo rero cyo kubafasha kwiga imyuga izabafasha kubaho.”

Yasobanuye ko kugeza ubu bigisha abakobwa bagera kuri 80 imyuga irimo kudoda imyenda, gutunganya imisatsi n’ibindi bijyanye n’ubwiza bw’abantu, ariko nibasoza kwiga bazakira abandi kuko ababyifuza ari benshi.

Bamwe mu bakobwa batangiye kwiga iyo myuga bavuga ko hari byinshi bamaze kumenya kandi bayitezeho urufunguzo rw’ubuzima.

Dusenge Marie Louise ati “Maze kumenya kudoda imyenda y’ubwoko butandukanye kandi nifitiye icyizere ko nzatera imbere kuko naje kwiga uyu mwuga mbishaka.”

Zawadi Immaculée na we avuga ko yiga gutunganya umusatsi kandi yatangiye kubona ibiraka aho atuye.

Ati “Aho ntuye mu Rwanza natangiye kubona ibiraka byo gutunganyiriza abantu umusatsi bakampa amafaranga. Urumva ko nimara kubimenya neza mfite n’ibikoresho nzajya nkorera amafaranga menshi.”

Bahabwa n’inyigisho zirimo kwirinda ingeso mbi kandi bagatozwa no gutegura indyo yuzuye ndetse n’abana babo bakitabwaho iyo babazanye kwiga.

Ikindi bakorerwa ni uguhabwa inyigisho zibafasha kwakira ibyababayeho kuko hari abo bakira barahungabanye.

Bazamara umwaka wose biga bafashwe no gushinga amashyirahamwe bazajya bakoreramo ndetse bahabwe n’ibikoresho.

Umunyamabanga Nshingwabikorwa w’ Umurenge wa Save, Ntiyamira David, yashimye umusanzu icyo kigo kiri gutanga mu kuzamura imibereho myiza y’abaturage by’umwihariko abakobwa babyariye iwabo.

Yavuze ko cyunganira gahunda ya Leta yo gusubiza mu ishuri abangavu batewe inda imburagihe, abasaba kwiga bashyizeho umwete.

Abakobwa batewe inda imburagihe bashyiriweho ikigo kizabafasha kwiga imyuga
Abiga muri iki kigo ni abaturuka mu miryango itishoboye
Bigishwa gutunganya imisatsi mu buryo bugezweho
Bijejwe ko nibarangiza kwiga bazafashwa kwishyira hamwe bahabwe n'ibikoresho
Bishimira ko hari byinshi bamaze kumenya kandi babyizeho urufunguzo rw'ubuzima
Kuri ubu Centre de Jeunes Saint Vincent de Paul yigamo abagera kuri 80 baturuka mu Turere twa Huye na Gisagara
Mu byo bigishwa harimo no guca inzara kinyamwuga
Padiri Gilbert Kwitonda yashimye uburyo ubuzima bw'abakobwa batewe inda imburagihe buri guhinduka bwiza
Padiri Gilbert Kwitonda yabwiye abakobwa batewe inda imburagihe ko nibiga neza bazagira ubuzima bwiza
Umuyobozi wa Caritas ya Diyoseze ya Butare, Padiri Gilbert Kwitonda, arasobanura ko gushinga icyo kigo byaturutse ku gitekerezo cya Musenyeri Philippe Rukamba
Yabasabye gukomeza kwifata neza no kwirinda kongera guterwa
Icyo kigo cyitwa Centre de Jeunes Saint Vincent de Paul gihereye mu Kagari ka Gatoki mu Murenge wa Save

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .