Kwamamaza

Musenyeri Ngirabanyiginya yitabye Imana

Yanditswe kuya 7-09-2016 saa 07:21' na Ntakirutimana Deus


Musenyeri Dominiko Ngirabanyiginya wari Musenyeri w’Icyubahiro muri Diyosezi ya Nyundo yitabye Imana mu ijoro rishyira kuri uyu wa Gatatu tariki ya 7 Nzeli azize uburwayi.

Amakuru agera kuri IGIHE ni uko Musenyeri Ngirabanyiginya yazize uburwayi yari amaranye igihe kitari gito.

Yavukiye muri Paruwasi ya Kabgayi muri Diyosezi ya Kabgayi mu 1937; atangira iseminari nto mu 1952, ahabwa ubupadiri mu 1964 nyuma aza kuba umurezi mu iseminari kuva mu 1967.

Mu 2013 ubwo yizihizaga yubile y’imyaka 75 amaze avutse ndetse ahawe n’isakaramentu rya batisimu, Musenyeri Alexis Habiyambere yavuze ko Mgr Dominiko ari inararibonye Diyosezi ya Nyundo yagize ndetse ko ishimira Imana kuba yaramubahaye ikanamurinda.

Yavuze ko Mgr Dominiko akwiye gushimirwa indirimbo ze nyinshi za liturujiya ndetse n’iz’ibitaramo, kuba yarabaye umuntu muzima akemerera Imana yamutoye akayumvira muri byose akicisha bugufi.

Musenyeri Ngirabanyiginya mu mateka y’u Rwanda

Ngirabanyiginya ni umwe mu banyamuziki bakomeye u Rwanda rwari rufite, ku bijyanye no gucuranga inanga byavugwaga ko nta wamuhigaga.

Kuba indirimbo nyarwanda zishobora gucurangwa mu majwi ni urugamba yarwanye,we na bagenzi barimo Rugamba Cyprien, Matayo Ngirumpatse, Iyamuremye, Boniface Musoni, Mathias Gahinda n’abandi bahimbye indirimbo bakanazicuranga muri muzika ikoreshwa ku Isi, hose bahereye ku ndirimbo za kiliziya.

Umuhate wabo wahaye agaciro indirimbo z’Ikinyarwanda kuko kugeza mu mwaka wa 1935, nta ndirimbo nyarwanda n’imwe yari yanditse ku manota uretse injyana zanditswe na Padiri witwa Arnaux zo mu mihango yo kubandwa aha havugwa nk’iyitwa “Icyo nkundira imandwa ya Rugagi”, cyangwa “ Bitsama ndarara.”

Mu gitabo cya ‘Singizwa Nyagasani’ cyifashishwa muri Kiriziya Gatolika nk’uko mu yandi madini bifashisha kantike[Cantique] harimo indirimbo nyinshi zahimbwe na Musenyeri Ngirabanyiginya.

Fanfari ya Nyundo yamamaye mu Rwanda

Musenyeri Ngirabanyiginya yashize ‘fanfari’ itsinda ry’abaririmbyi baririmba indirimbo yose ishoboka ku Isi bibafishishije ibyuma bya muzika.

Ni muri urwo rwego itsinda yashize mu iseminari nto ya Nyundo rimaze kwamamara. Kuri ubu iryo tsinda rigizwe n’urubyiruko rwiga mu iseminari nto ya Nyundo rizenguruka igihugu ryifashishwa mu birori.

Urugero rwa hafi ni bo bacuranze mu muhango wa yubile y’imyaka 100 Seminari nto ya Mutagatifu Leon y’i Kabyayi muri 2013, ndetse no kwimika Musenyeri Mwumvaneza Anaclet wa Diyoseze ya Nyundo.

Ubuhamya bw’abazi Musenyeri Ngirabanyiginya

Ubwo Musenyeri Ngirabanyiginya yizihizaga yubile y’imyaka 50 amaze ahawe ubupadiri yavuzwe imyato n’abamuzi.

Musenyeri Vincent Harolimana wa Diyoseze ya Ruhengeri yavuze ko ari umwe muri benshi barezwe na Ngirabanyiginya bamaranye imyaka 11 ari abayobozi n’abarezi muri seminari nto ya Nyundo.

Yavuze ko yabaye indorerwamo bakwiye kwireberamo nk’abasaseridoti, wabatoje kumenya gukora icyo bagomba gukora, kandi ku gihe.

Musenyeri Thaddée Ntihinyurwa, Arikiyepisikopi wa Kigali we yamushimiye ko yakomeje kuba indakemwa.

Ati “Musenyeri Dominiko mu myaka 50 amaze ari umusaseridoti yagerageje kuba indahemuka ku masezerano yagiranya n’uwamutoye.

Icyo gihe Musenyeri Ngirabanyiginya yasabye urubyiruko rw’abaseminari n’urw’u Rwanda muri rusange kwirinda kuba ibirumbo, ahubwo ko bagomba guharanira kuba abanyarwanda nyabo.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved