Kwamamaza

Musenyeri Ngirabanyiginya ushimirwa kunga Abanyarwanda yashyinguwe(Amafoto)

Yanditswe kuya 9-09-2016 saa 17:51' na Ntakirutimana Deus


Musenyeri Dominiko Ngirabanyiginya yashyinguwe hagarukwa ku butwari bwamuranze mu buzima bwe, burimo guharanira gahunda yo kwibutsa abanyarwanda ko ari umwe ubwo mu mashuri harimo isubiranamo ry’abitwazaga amoko, mu 1973.

Ngirabanyiginya yashyinguwe muri Diyoseze ya Nyundo mu karere ka Rubavu, ku wa Gatanu tariki ya 9 Nzeri 2016.

Benoît Karenzi, umwe mu bize mu iseminari, yavuze ko Musenyeri Ngirabanyiginya yababereye umurezi mwiza ubwo yayoboraga Seminari ya Nyundo, icyo gihe mu 1973 akaba yaricaje abanyeshuri bigaga mu iryo shuri akababwira ko bigana nk’abanyarwanda, bagomba kwibagirwa icyo bita amoko, ahubwo buri umwe akabona Umunyarwanda bahuje igihugu kandi bakwiye kubahana.

Alexis Habiyambere, Musenyeri wa Diyoseze ya Nyundo ucyuye igihe yavuze ko Musenyeri Ngirabanyiginya yaranzwe n’ubutwari budasanzwe bwo kwibutsa abantu n’abakirisitu muri rusange kugira ukwemera kutari akazuyazi, ahubwo bagomba kurangwa n’uguhamye, gukunda abantu n’ibindi.

Ngirabanyiginya kandi ngo yateje imbere Diyoseze ya Nyundo mu myaka 19 yamaze ayoborwa na Musenyeri Habiyambere, mu bijyanye n’uburezi ndetse no kongera kuyubaka nyuma ya Jenoside yakorewe Abatutsi mu 1994.

Mu bantu yareze harimo abayobozi batandukanye mu nzego za leta nka Minisitiri w’Urubyiruko n’Ikoranabuhanga, Jean Philbert Nsengimana, ndetse n’abasenyeri bane.

Yavuze ko yari umuntu wizerwa kurusha abandi bigaragazwa n’imirimo itandukanye yagiye ahabwa irimo kuyobora Seminari nto ya Nyundo gushingwa amasomo, ndetse no kwitangira uburezi muri rusange.

Yamushimiye kandi kuba yaratangije Fanfari, kugeza ubu igaragara mu mashuri yo mu Rwanda muri Seminari nto ya Nyundo gusa. Mu rwego rwo kumwibuka yasabye ko iyo Fanfari igomba gukomerwaho ntizime, ikajya ihora yibutsa ubutari bwamuranze.

Musenyeri Rukamba Philippe, Umushumba wa Diyoseze ya Butare, akaba na Perezida w’inama y’Abepisikopi mu Rwanda,yavuze ko atabona uko agereranya Musenyeri Ngirabanyiginya bitewe n’ibikorwa byamuranze. Yavuze ko umuntu abaye agereranywa n’igiti yaba ari inganzamarumbo.

Ati “ Musenyeri Ngirabanyiginya yaba ari igiti cy’ingazamarumbo cyagabye amashami menshi inyoni zikacyarikamo."

Yavuze ko mu buzima bwa Ngirabanyiginya yahoraga yibutsa abantu kurangwa n’ubwiza bw’umutima no kunogera Imana.

Yamushimiye ubwitange bwamuranze mu guhumuriza abaseminari mu 1973, akabigisha ko batagomba gushyira amoko imbere, ahubwo bagomba kwimika ubunyarwanda.

Ku bijyanye n’umuziki, Musenyeri Habiyambere na Rukamba bavuze ko yahesheje kiriziya ishema ndetse n’igihugu bashyira indirimbo nyarwanda mu majwi, bifashishije amanota ya muzika,ndetse n’indirimbo yahimbye ubu zioreshwa mu kiriziya.

Rukamba ati” Musenyeri Ngirabanyiginya kumuvuga ni ukumushimira imbere y’Imana kubera ibyiza yadukoreye.[...] yakundaga kwibutsa gukorera ibintu ku gihe kandi vuba mu buryo bwiza.”

Musenyeri Yohani Damascene Bimenyimana, umushumba wa Diyoseze ya Cyangugu yavuze ko yibukira Ngirabanyiginya ku mpanuro yahoraga atanga yibutsa urubyiruko ko rugomba kubahiriza igihe mu byo rukora.

Mu rwego rwo kumushimira imbaraga yashyize mu kwitangira seminari ya Nyundo yigishagamo, yayishyinguwemo.

Musenyeri Ngirabanyiginya yavukiye i Rutarabana mu karere ka Muhanga muri Diyoseze ya Kabgayi mu 1937. Yatangiye amashuri abanza mu 1947 i Kabgayi. Mu 1954 yize amashuri yisumbuye muri seminari ya Mutagatifu Pie X ku Nyundo.

Yakomeje muri Seminari nkuru ya Nyakibanda mu 1959. Mu 1961 yagiye i Roma aho yize amasomo y’iyobokamana muri Kaminuza kimenyabose muri ayo masomo yitwa Université Urbanienne de Rome. Yaherewe ubupadiri i Roma mu 1964.

Mu 1973 yabaye Umuyobozi mukuru wa Seminari ya Nyundo, nyuma yaje gukora imirimo itandukanye muri iyo seminari, irimo kuba ushinzwe amasomo, kwigisha muzika n’ikilatini n’ibindi.

Yagizwe Musenyeri na Papa Jean Paul II mu 2003, yitabye Imana tariki ya 7 Nzeri 2016, yishwe n’indwara y’igisukari(Diabete) yamuteye n’indwara y’umutima, akaba yari afite imyaka79.

Umuhango wo gushyingura Musenyeri Nyirabanyiginya witabiriwe n'abanyeshuri bo mu Iseminari
Abakristu bitabiriye uyu muhango
Abanyeshuri bo kuri Groupe Scolaire Notre Dame de l'Afrique
Abanyamuziki barezwe na Musenyeri Ngirabanyiginya
Imbaga y'abakirisitu yitabiriye misa yo gusezera bwa nyuma kuri Musenyeri Ngirabanyiginya
Musenyeri Habiyambere asaba ko umurage wa Fanfari wa Ngirabanyiginya utazima
Musenyeri Ngirabanyiginya asezerwaho bwa nyuma mu Kiliziya
umwe mu bagize umuryango wa Musenyeri Ngirabanyiginya wawuvugiye
Abasenyeri bakikije umurambo wa Ngirabanyiginya
Abapadiri bari bitabiriye uyu muhango ari benshi
Musenyeri Habiyambere Alexis, umwe mu bayoboye Musenyeri Ngirabanyiginya
Isanduku ya Musenyeri Ngirabanyiginya ikikijwe n'abapadiri baturutse imihanda yose
Imodoka itwaye umurambo wa Musenyeri Ngirabanyiginya ikikijwe n'abihayimana n'abalayiki
Imbuto za Musenyeri Ngirabanyiginya
Abasenyeri bari bitabiriye misa yo gusezera kuri mugenzi wabo
Abasenyeri bari bafite ikiniga
Abasenyeri bari barenzwe n'agahinda
Musenyeri Rukamba ati"Ngirabanyiginya yakoze byinshi byiza"
Abasenyeri bamusezeraho bwa nyuma
Ngirabanyiginya yashyinguwe muri Seminari nto yitiriwe Mutagatifu Pie
Mu nzira igana ku gushyingura
Nyuma y'umuhango wo gushyingura

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved