Musenyeri Edouard Sinayobye yahawe inkoni y’ubushumba bwa Diyoseze ya Cyangugu

Yanditswe na Sitio Ndoli
Kuya 25 Werurwe 2021 saa 02:33
Yasuwe :
0 0

Nyuma yo gutorwa na Papa Francis ku wa 6 Gashyantare, Musenyeri Edouard Sinayobye yatangiye inshingano zo kuyobora Diyoseze ya Cyangugu iri mu Karere ka Rusizi mu Burengerazuba bw’u Rwanda.

Ni inshingano Musenyeri Sinayobye yahawe kuri iyi tariki ya 25 Werurwe, umunsi wanahuriranye n’umunsi mukuru wa Bikira Mariya, ubwo yamenyeshwaga ko azabyara umwana w’umuhungu kandi akamusama ataryamanye n’umugabo.

Kuri uyu munsi, Musenyeri Sinayobye yasengewe ndetse anayobora igitambo cya Misa cya mbere nka Musenyeri. Mu rwego rwo gusohoza ubutumwa bwe, Musenyeri Sinayobye yavuze ko azagendera ku ntego igira iti “Ubuvandimwe muri Kirisitu”.

Muri uyu muhango, abandi basenyeri bose ba Kiliziya Gatolika mu Rwanda bari bahari, ndetse yimitswe na Musenyeri Rukamba ukurikiye Inama y’Abepiskopi mu Rwanda.

Mu bandi basenyeri bari bahari harimo Cardinal Kambanda Arikiyepiskopi wa Kigali n’Umuyobozi wa Diyosezi ya Kibungo, Musenyeri Mgr. Andrzej Józwowicz, Intumwa ya Papa mu Rwanda, Musenyeri Filipo Rukamba, Umwepiskopi wa Butare na Perezida w’Inama y’Abepiskopi Gatolika mu Rwanda na Musenyeri Smaragde Mbonyintege, Umwepiskopi wa Kabgayi.

Hari kandi Musenyeri Servilien Nzakamwita, Umwepiskopi wa Byumba, Musenyeri Anaclet Mwumvaneza, Umwepiskopi wa Nyundo, Musenyeri Vincent Harolimana, Umwepisikopi wa Ruhengeri, Musenyeri Thaddée Ntihinyurwa, Arikiyepisikopi wa Kigali uri mu kiruhuko na Musenyeri Celestin Hakizimana, Umwepisikopi wa Gikongoro wanayoboraga Diyosezi ya Cyangugu.

Mu bandi bari bitabiriye uyu muhango barimo Padri Tumaini wari uhagarariye Diyosezi ya Bukavu yo muri Repubulika Iharanira Demokarasi ya Congo. Hari kandi abapadiri benshi, biganjemo aba Diyosezi ya Cyangugu, Abihayimana batandukanye n’imbaga y’abalayiki yaje kwakira Umushumba mushya.

Minisitiri w’Ubutegetsi bw’Igihugu, Gatabazi Jean Marie Vianney, yari ahagarariye Leta, ndetse mu bandi bitabiriye uyu muhango harimo abasenateri, abadepite n’abayobozi b’uturere. Inzego zihagarariye amadini n’amatorero atandukanye na zo zari zihagarariye.

Muri uyu muhango, Musenyeri Sinayobye yahawe inyigisho na bagenzi be, arasabirwa, arambikwaho ibiganza, avugirwa isengesho ry’Iyeguriramana, ari na ryo rikuru rikorwa muri iyi mihango, rikaba ikimenyetso cy’uko uwari padiri ahindutse Musenyeri.

Abapadiri bo muri Diyoseze ya Cyangugu kandi bashimiye Musenyeri mushya wabo, bamusezeranya kuzamwubaha.

Musenyeri Sinayobye yavuze ko yishimiye kuba yahawe izi nshingano, ati "Banyambitse impeta, ubwo nkazagomba guhora nyambaye iteka, ni ikimenyetso cy’uko ngiranye isezerano ridahinyuka n’umuryango w’Imana wa Diyoseze ya Cyangugu. Iyo mpeta si ikimenyetso gusa, iherekejwe n’inema Imana iduhaye ngo njyewe n’uwo tugiranye isezerano, Diyoseze ya Cyangugu, tuzahore turi umwe muri Kirisitu".

Yongeyeho ati "Diyoseze ya Cyangugu tugiranye isezerano, ni umugeni mwiza Imana yandambagirije, naramushimye. Mpamagariwe kuyikunda no kuyitangira nk’umubiri wanjye bwite. Ku bakirisitu ba Cyangugu, nanjye ndi umugeni Imana ibahaye".

Musenyeri Sinayobye Edouard yasabye abakiristo ba Diyosezi kuzafatanya bagakorana muri byose.

Ati “Ubwo mwaje kunshyigikira mwaje no guhamya inshingano zo kumba hafi muri byose, ntimuzazuyaze kungira inama, kunkebura no kunkosora. Kariya kajambo gakoreshwa ngo ‘Nyiricyubahiro’ ntikazatume mutambera abajyanama.”

Yakomeje agira ati “Ni ugushimira bikomeye cyane mu nzego bwite za Leta, nzajya mbasabira ngo Imana ihore ibamurikiye kandi aho dukorera hose muzahasange umutima mwiza dufatanye no gushaka icyagira akamaro ku Munyarwanda wese.”

Filipo Rukamba, umushumba wa Diyoseze ya Butare ndetse akaba n’umuyobozi mukuru w’inama y’Abepesikopi mu Rwanda yashimiye Musenyeri mushya wa Cyangugu ku butumwa yakoze muri Diyosezi ya Butare, amusaba kuba inshuti no kuba hafi abababaye ndetse amwizeza ubufatanye.

Ati “Ubutumwa bwose wakoze mu gufasha Diyosezi ya Butare ku kwita ku bapadiri, abiyeguriye Imana kimwe n’abantu mwahuye ukabafasha ku buryo bwinshi bizatuma ugira umutima wumva vuba ibyo diyosezi ukeneye, wita ku mfubyi n’abapfakazi, abakene n’abatishoboye kimwe n’abanyantege nke bityo bose bazaze bagusanga bakwisanzuyeho.”

Minisitiri w’ubutegetsi bw’igihugu Jean Marie Vianney Gatabazi mu butumwa yahawe na Perezida wa Repubulika Paul Kagame. Yasabye Musenyeri Sinayobye kubakira ku mbaraga asanze muri Diyosezi ndetse no kubakira ku mbaraga n’ubumwe n’amahoro biri mu gihugu.

Ati “Hari izindi mbaraga musanze muri Diyosezi, muzubakira ku bumwe n’amahoro n’umutekano dufite mu gihugu cyacu mu kubungabunga abakiristo.”

Byari ibyishimo ubwo Musenyeri Sinayobye yimikwaga
Musenyeri Sinayobye yubitse inda nk'ikimenyetso cy'uko yemeye inshingano yahawe
Musenyeri Sinayobye arahirira inshingano zo kuba umweposkopi
Ubwo Musenyeri Sinayobye yimikwaga
Minisitiri Gatabazi yitabiriye uyu muhango
Ubwo abasenyeri bageraga ahabereye imihango yo kwimika Musenyeri Sinayobye
JPEG - 228.7 kb
Abapadiri ba diyoseze ya Cyangugu bari babucyereye
JPEG - 249.1 kb
Korali Marie Rene yahimbiye Musenyeri mushya indirimbo
Minisitiri Gatabazi yashimiye Musenyeri Sinayobye amwizeza ubufasha bwa Guverinoma y'u Rwanda
Musenyeri Celestin yashimiwe uburyo yayoboye diyoseze ya Cyangugu nyuma y'urupfu rwa Musenyeri Jean Damascene Bimenyimana
Musenyeri Sinayobye yasabye abakiristo ba Diyoseze ya Cyangugu ubufatanye
Musenyeri Sinayobye ari gutanga ukarisitiya kuri Meya wa Nyamasheke
Musenyeri Sinayobye yahawe impano n'abapadiri ba diyosezi ya Cyangugu
Musenyeri Sinayobye asoma Misa mu muhango wo ku mwimika
Uyu muhango witabiriwe n'abakiristo bake hubahirizwa amabwiriza yo kwirinda Covid-19
Perezida w'inama y'abepiskopi mu Rwanda, Philipe Rukamba yahaye Musenyeri Sinayobye impano mu izina ry'abapadiri ba Diyosezi ya Cyangugu
Ni umuhango wo kwimika Musenyeri Sinayobye witabiriwe n'abantu batandukanye barimo abanyamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .