Musenyeri Birindabagabo yizeye ko 2018 izarangirana n’ibiyobyabwenge mu Rwanda

Yanditswe na Ferdinand Maniraguha
Kuya 12 Kamena 2018 saa 07:45
Yasuwe :
1 0

Musenyeri wa Diyosezi ya Gahini mu Itorero ry’Abangilikani mu Rwanda, Birindabagabo Alexis, yatangaje ko akurikije ingamba zafatiwe ibiyobyabwenge, ngo uyu mwaka uzarangira byabaye amateka mu Rwanda.

Yabitangaje kuri iki Cyumweru mu kiganiro Intambwe Iganje cyatambutse kuri Televiziyo Rwanda cyitabiriwe n’abayobozi mu nzego zitandukanye zirimo amadini, Guverinoma, Polisi y’Igihugu, urubyiruko n’abandi.

Polisi y’u Rwanda yatangaje ko mu 2017 yakiriye ibirego 3941 by’abakoresha n’abacuruza ibiyobyabwenge, bingana na 18% y’ibyaha byakozwe muri uwo mwaka.

Inzego z’ubuzima mu Rwanda zerekana ko mu Bitaro bya CARAES-Ndera byita ku bafite uburwayi bwo mu mutwe bufite aho buhurira n’ibiyobyabwenge hakiriwe abarwayi 994 mu 2010, mu gihe mu 2017 hakiriwe 1.960, ibi kandi bikiyongera ku bashegeshwe na byo bitabwaho mu bigo Ngororamuco.

Ahereye ku bukanguramba bwatangijwe mu minsi ishize bugamije guca ibiyobyabwenge, Musenyeri Birindabagao, yavuze ko afite ibyiringiro ko ibiyobyabwenge bizarangirana n’umwaka wa 2018.

Yagize ati “Icyabuze cyari ubufatanye kandi abanyarwanda bafite ibanga rikomeye kuko iyo bahagurutse bagafatanya uba uzi ko ikibazo kigiye kurangira.Ni nacyo kintera ibyiringiro by’uko uyu mwaka wa 2018 tugomba kurangiza ibiyobyabwenge, tukabihindura amateka.”

Birindabagabo yavuze ko igikenewe ari ugusobanurira abaturage ububi bw’ibiyobyabwenge n’ubwiza bwo kubirandura, hafatwa ingamba zikomeye ku babicuruza.

Ati “Iyo ikintu gicuruzwa ntigishobora kuba ibanga. Njye numva twagombye gushyira imbaraga cyane ku babicuruza kubera ko abana bararogwa, hari abarozi. Tugomba rero gushaka abarozi kugira ngo abana bacu bakurire mu gihugu kitabamo uburozi.”

“Niba umuntu yakoresheje ibiyobyabwenge akagaragara, biroroshye gukurikirana ukamenya ngo yabifashe kwa nde? Numara gushyikira wa wundi, biroroshye kumenya ngo yabiranguye kwa nde? Icyo gihe buri munyarwanda wese abigize intego ye, ntiyagombye gusinzira atamenye ngo ni nde wandogeye umwana? Mfite ibyiringiro ko ibiyobyabwenge uyu mwaka urarangira bihindutse amateka.”

Umuvugizi wa Polisi y’u Rwanda, CP Théos Badege, yavuze ko aho ibiyobyabwenge byinjirira akenshi abaturage baba bahazi ariyo mpamvu basabwa gufatanya n’inzego zose hakagaragazwa n’ababikora.

Yavuze ko urwego rumwe rutabyishoboza kuko abacuruzi b’ibiyobyabwenge bahindura amayeri buri munsi.

Ati “Abantu bacuruza bashakamo amafaranga. Aragenda akavuga ati ‘Njyewe ndashaka amafaranga ninyabona ni byiza’. Urayabona ariko kanaka cyangwa umwana we uri kumwica.”

Yongeyeho ati “Duhize guca ibiyobyabwenge mu midugudu yacu, waba uzi ko uciye ibiyobyabwenge n’ibindi byaha bibikomokaho nk’urugomo, ubujura, ibyaha byo gusambanya abana no gufata ku ngufu n’ibindi.”

Ubushinjacyaha bukuru bugaragaza ko kuva mu 2012 abantu 2196 bahaniwe ibyo byaha bifitanye isano n’ibiyobyabwenge, naho mu 2017 bagera kuri 5 584.

Minisiteri y’urubyiruko iheruka gutangaza ko mu Rwanda urubyiruko rusaga ibihumbi 16 n’abakuze basaga 5000 bakoresha ibiyobyabwenge.

Musenyeri Birindabagabo yizeye ko ibiyobyabwenge mu Rwanda bizarangirana na 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza