Musanze: Ubuzima bwa Nyiransabimana umaze imyaka itatu yikuye mu bukene n΄amakimbirane byarangwaga iwe

Yanditswe na N.Kubwimana Janvière
Kuya 14 Werurwe 2019 saa 06:11
Yasuwe :
0 0

Nyiransabimana Espérance utuye mu Murenge wa Shingiro, Akarere ka Musanze, avuga ko amaze imyaka itatu yigobotoye ubukene bukabije n΄amakimbirane abukomokaho byabaga iwe, ibintu yagezeho nyuma yo gusobanukirwa n΄uruhare rwe mu iterambere ry΄urugo rwe.

Uyu mubyeyi w΄imyaka 52 y΄amavuko afite abana barindwi, amaze imyaka 37 yubatse urugo, ariko irindwi muri yo yayibayemo mu buzima bugoye kuko bari abakene cyane ndetse n΄umugabo we amwinuba kuko icyo yakeneraga cyose yumvaga ko yagihabwa nawe bigatuma bahorana amakimbirane

Mu kiganiro yagiranye na IGIHE, Nyiransabimana avuga ko kuri we yari azi ko umugabo afite ubwenge budasanzwe butuma ari we ugomba gutunga urugo.

Yagize ati “Kera numvaga umugabo afite ubwenge bwihariye butuma ariwe ugomba kumenya ibitunga urugo rwe, ibi byatumye agera ubwo anyinuba kuko icyo nakeneraga cyose namutegaga amaboko, twamaze imyaka irindwi mu bukene n΄amakimbirane byaje gutuma n΄abana bata ishuri, ndagenda ndacupira ku buryo ntatinyukaga kugera aho abandi bari”.

Uyu mubyeyi akomeza avuga ko inama yakomeje kugirwa n΄abaturanyi be babaga mu matsinda yo kubitsa no kugurizanya, ari zo zatumye ava mu buzima bubi yari amazemo igihe kinini.

Yagize ati "Bagenzi banjye babaga mu matsinda yo kugurizanya no kubitsa, baje kungira inama yo kubegera mbanza kubyanga kuko nari mfite isoni z΄uko nasaga nabi, nyuma naje kujyamo ntagira nizigama duke, tugabanye ngura intama iroroka, nkomeza kwizigamira ngura ikimasa, hashize imyaka ibiri nguramo inka ya kijyambere ubu yarabyaye”.

“Ngendeye ku mahugurwa twahawe n΄umushinga wa SCAB mu buhinzi bw΄ibigori n΄ibirayi. Naje guhinga ingano mu mirima naguze, ubu mfite n΄abakozi bamfasha nkanabahemba, ku buryo ku kwezi mu rugo tutabura ibihumbi 300 byinjira".

Ntahobari Innocent umugabo w΄uyu mugore nawe avuga ko yatunguwe no kubona umugore we aba umusemburo w΄ubukungu bw΄urugo rwabo.

Yagize ati "Muri kamere yanjye numvaga ko umugore ari uwo kubyara no kumenya imirimo yo mu rugo, ko nta mushinga yakora ngo uzamure urugo, natunguwe no kubona umugore wanjye ariwe uba umusemburo w΄iterambere dufite ubu, benshi baba batugisha inama z΄uko nabo bava mu bukene, ubu umuryango wacu umeze neza turafatanya ubu twanubatse inzu imeze neza n΄abana bariga, byose bitewe n΄uko umugore yakangutse akiga gukora".

Umuyobozi w΄Inama nkuru y΄Igihugu y΄abagore mu Ntara y΄Amajyaruguru Uwitonze Modeste, avuga ko iyo habayeho impinduka mu muryango zizanywe n΄umugore bibera abandi isomo ryiza.

Ati "Iyo habayeho impinduka z΄iterambere ry΄umuryango rizanywe n΄umugore bibera abandi isomo, natwe turakomeza tukabakurikirana tukabigisha ibyiza byo kwizigamira, tubereka uburyo bava no mu matsinda bakagera ku rwego rwo kubitsa mu mabanki, barimo kugenda babyumva kandi bitanga umusaruro ku mibanire myiza n΄iterambere ry΄umuryango".

Mu mwaka ushize mu Karere ka Musanze habarurwaga imiryango isaga ibihumbi bitandatu ibana mu makimbirane akomoka ku bukene n΄ubuharike, ariko umushinga wa SCAB ufatanije n΄ Akarere bashyize imbaraga mu kwigisha abagore uruhare rwabo mu iterambere ry΄ingo by΄umwihariko bakora ubuhinzi bw΄umwuga, ibintu byagabanyije amakimbirane mu miryango yabo.

Inka ya Nyiransabimana ya kijyambere
Umurima w'ingano wa Nyiransabimana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza