Musanze: Murekezi amaze imyaka 4 atarahabwa ingurane y’ubutaka bwe bwubatswemo ihunikiro

Yanditswe na Ishimwe Israel
Kuya 6 Nzeri 2016 saa 07:15
Yasuwe :
0 0

Murekezi Gabriel wo mu Murenge wa Remera mu karere ka Musanze amaze imyaka ine asaba ingurane y’ahubatswe ihunikiro ry’imbuto n’aharemera isoko rya Nyirabisekuru atarayihabwa.

Murekezi utuye mu Mudugudu wa Nyirabisekuru, mu Kagari ka Murandi ho mu Murenge wa Remera avuga ko ahubatswe inzu y’ubucuruzi ndetse n’igice isoko riremeramo ari mu isambu yahoze ari iye, ikaza kubakwamo ariko ubuyobozi ntibumwishyure.

Yagize ati “Hashize imyaka isaga ine niruka ku ngurane y’ubutaka bwanjye batwaye ariko nta gisubizo ndabona, nandikiye inzego z’ubuyobozi kugera no ku Ntara ariko ikibazo cyanjye cyakomeje kunanirana.”

Murekezi agaragaza ko n’amazi aturuka kuri iyi nyubako yangiza bimwe mu bikorwa bye kuko amanukira mu gikari cy’aho atuye agakomeza mu rutoki atembana imyaka.

Ubuyobozi bw’akarere ka Musanze buvuga ko iki kibazo kigiye gukemuka ndetse mu gihe cy’ibyumweru bibiri uyu muturage azaba yamaze guhabwa ingurane.

Umuyobozi w’Akarere ka Musanze wungirije ushinzwe ubukungu n’iterambere, Habyarimana Jean Damascène yagize ati “Habayeho kutumvikana n’ubuyobozi bw’umurenge kuko bwashakaga ubutaka bunini nyuma biza kugaragara ko butagikenewe ariko bitarenze ibyumweru bibiri azaba yishyuwe kuko ibisabwa byose n’amafaranga yo kumwishyura yateganyijwe mu ngengo y’imari y’uyu mwaka.”

Murekezi yari yaratangiye gukurikirana ingurane mu 2012 ubwo ubuyobozi bw’Umurenge wa Remera bwubakaga ihunikiro ry’imyaka mu isambu ye ahegeranye n’aharemera agasoko kuva mu 1998.

Nubwo kagendaga gasatira ubundi butaka kubera kwaguka nyira bwo yasaga n’uwabyihoreye kugeza ubwo iyi nzu yubatswe.

Guverineri w’Intara y’Amajyaruguru, Bosenibamwe Aimé yandikiye ubuyobozi bw’Akarere ka Musanze kuwa 17 Ugushyingo 2015, abasaba gukemura ikibazo cya Murekezi bitarenze ibyumweru bibiri bakimara kubona ibaruwa ye.

Icyo gihe, Umunyamabanga Nshingwabikorwa w’Umurenge wa Remera,Nsengiyumva Télésphore yari yatangaje ko iki kibazo kizaba cyakemutse mu gihe kitarenze ibyumweru bibiri kuko amafaranga y’ingurane yari yarateganyijwe mu ngengo y’imari y’umwaka ushize wa 2015-2016, ariko kiracyari cyose.

Remera ni umwe mu mirenge 15 igize akarere ka Musanze, benshi mu bawutuye bakora ibikorwa byiganjemo iby’ubuhinzi n’ubworozi.

Murekezi Gabriel umuturage usaba ingurane y'isambu ye yubatswemo ihunikiro ry'imyaka n'aharemera isoko

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza