Musanze: Imiryango 37 yasenyewe n’imvura iratabaza ngo ibone aho gukinga umusaya

Yanditswe na N.Kubwimana Janvière
Kuya 17 Gashyantare 2018 saa 08:24
Yasuwe :
0 0

Imiryango 37 yo mirenge ya Nyange na Kinigi, Akarere ka Musanze, basizwe iheruheru n’imvura yaguye mu mpera z’icyumweru gishize no kuwa mbere w’iki dusoza, amazi menshi yaturutse mu birunga asenya inzu nyinshi, yangiza n’imyaka.

Iyi mvura yasenye inzu zibarirwa muri 45 harimo zirindwi zasenyutse burundu, hanakomereka abantu batandatu; imirima y’ibirayi ya hegitari zirindwi, ingano zari zihinze ku buso bwa hegitari 50 n’indi mirima y’ibinyomoro birangirika.

Abaturage babwiye IGIHE ko badafite aho kwikinga, basaba ubuyobozi ko bwabafasha kubona aho kuba kuko aho bari ubu bacumbikiwe n’abaturanyi.

Uwitwa Nyiramahoro Dorothée yagize ati “Ubu inzu yanjye yarasenyutse yose n’amabati yarangije kwangirika, nshumbikiwe n’umuturanyi inzu yakagombye kubamo umuryango umwe ubu irimo imiryango ibiri, urumva ko bigoye kuhaba bibaye byiza ubuyobozi bwadufasha kubona aho twikinga mu gihe tugitegereje gusanirwa amazu.”

Bikorimana Evariste nawe ni umwe mubagizweho ingaruka n’ibiza afite umuryango w’abantu batanu yagize ati “kugeza ubu ikitugoye cyane ni ukubona aho tuba, badufasha no kubona ibyo kurya kuko gutunga umuryango ungana gutya biragoye ibyo twari dufite byangijwe n’amazi yatwaye amazu.”

Umuyobozi w’Akarere ka Musanze wungirije ushinzwe imibereho y’abaturage Uwamariya Marie Claire, yavuze ko batabaje MIDIMAR ibifite mu nshinago zayo Ibiza.

Yagize ati “Ikibazo cy’abo baturage turakizi kuko twamaze gukora ibarura ry’ibyangijwe n’ibiza ubu turi gushaka igisubizo kirambye kuri ibi bibazo dufatanije n’abafatanya bikorwa bacu ndetse na MIDIMAR ibifite munshingano zayo kuburyo mugihe gitoya aba baturage bazahabwa amabati naho abadafite ubushobozi bakubakirwa”

Usibye abaturage bo mu Murenge wa Nyange na Kinigi bangirijwe ibyabo, no mu Murenge wa Cyuve mu tugari twa Buruba, Nyange, Ninda na Bukinanyana naho hari inzu zasenyutse.

Ibisenge by'inzu byagurukijwe n'umuyaga
Inzu zimwe zarasenyutse cyane, abaturage bajya gushaka icumbi mu baturanyi

<img256285|center


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza