Musanze: Ikigo Nderabuzima cya Muhoza cyakira abasaga 500, bamwe bataha batavuwe

Yanditswe na Ishimwe Israel
Kuya 13 Nzeri 2016 saa 08:49
Yasuwe :
0 0

Abagana Ikigo Nderabuzima cya Muhoza barinubira serivisi bahabwa kuko bahamara amasaha arenga umunani ndetse ngo hari n’abataha batavuwe, ubuyobozi bwacyo bwo buvuga ko abarwayi basaga 500 cyakira ku munsi barenze ubushobozi bwabo.

Iki Kigo Nderabuzima giherereye mu Murenge wa Muhoza mu karere ka Musanze, gifite ibyumba bitanu byo gusuzumiramo abarwayi ku buryo umuforomo umwe yakira abarwayi basaga 70 ku munsi.

Bamwe mu baganiriye na IGIHE bavuga ko gutinda kuvurwa bibagiraho ingaruka kuko hari abahaza bamaze kuremba cyane bitewe no gutegereza igihe kirekire.

Nsanzimana Clement yagize ati “Nahageze ku munsi w’ejo saa cyenda ntaha batankoreye; ubu nabwo sinari nagerwaho ngo mvurwe. Gutinda ku mirongo usanga biterwa n’abarwayi benshi baza hano. Hari n’igihe haza n’umuntu akagutanga wabaza akakubwira ko yahageze ejo agataha na we atavuwe. Nta wamenya neza niba cyaba ari ikimenyane,gusa gutinda hano natwe biratubangamira cyane kubera uburwayi n’umunaniro tuhakura.”

Undi muturage witwa Uwiragiye Consolate yagize ati “ Nazanye umwana nka saa tatu ariko bigeze ku mugoroba ntaravurwa, kubera umubare w’abarwayi bari hano.”

Mu bagana iki kigo nderabuzima, hari abavuga ko umwanya munini bamara ku mirongo na wo ubatera umunaniro ukabije.

Kanakuze Espérance yagize ati “ Hari igihe umuntu amara amasaha menshi ahagaze ku murongo bikaba byamuviramo umunaniro ukabije ndetse bigatuma arushaho kuremba.”

Umuyobozi w’Ikigo Nderabuzima cya Muhoza, Nirere Léopold avuga ko ubuyobozi bw’ibitaro bukora ibishoboka byose ngo batange serivisi nziza ariko baracyazitirwa n’ikibazo cy’abaforomo bake ugereranyije n’umubare w’ababagana.

Yagize ati “Uyu ni umurenge w’Umujyi ku buryo twakira abantu baturutse mu duce dutandukanye, tugerageza no gukora amasaha y’ikirenga ariko abatugana baracyari benshi. Usanga twakira abasaga 350 barwaye n’abandi baza kwipimisha inda, abagana serivisi z’ubujyanama no kwipimisha Sida. Iyo urebye usanga umubare w’abagana ibitaro byacu barenga 500 ku munsi.”

Umuyobozi w’Akarere ka Musanze wungirije ushinzwe imibereho myiza y’abaturage, Uwamariya Marie Claire yatangaje ko bafashe icyemezo cyo kongera umubare w’amavuriro mato yunganira Ikigo Nderabuzima cya Muhoza.

Yagize ati “Uyu mubare ni munini koko ariko turi kugerageza kongera amavuriro mato mu tugari ku buryo azunganira iki kigo mu gihe hataraboneka ikindi kigo nderabuzima.”

Yakomeje asaba abaturage kujya bagana n’ibindi bigo Nderabuzima byegereye umujyi kuko byo ababigana bakiri bake kandi bifite ubushobozi bwo kubakira.

Kuri ubu Akarere ka Musanze gafite Ikigo Nderabuzima muri buri murenge mu mirenge 15 ikagize.

Ikigo Nderabuzima cya Muhoza ntigifite ubushobozi bwo kwakira abarwayi 350 babagana ku munsi
Abaturage bategereje kwakirwa

bazatsinda@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza