Hatagize igikorwa mu maguru mashya umuhanda Musanze-Rubavu wacika bitunguranye

Yanditswe na Jean Pierre Tuyisenge
Kuya 21 Nzeri 2016 saa 08:02
Yasuwe :
0 0

Umuhanda Musanze-Rubavu wangirikiye mu Murenge wa Muhoza ku muyoboro w’amazi wa Muhe ahakunze kunyura amanuka ava mu birunga. Ubuyobozi bw’Akarere ka Musanze buvuga ko iki kibazo bwamaze kukigeza ku Kigo cy’Igihugu gishinzwe Iterambere ry’Ibikorwa by’Ubwikorezi (RTDA) bakaba bategereje igisubizo.

Iyangirika rikabije ry’uyu muhanda ryaturutse ku mazi ava mu birunga yangije icyuma kiyayobora, kigahinamirana kugeza aho ataye inzira akishakira iyayo ku ruhande, akaba yinjira mu butaka ku buryo hacukutse bikabije hafi yo kugera aho umuhanda utangiriye.

Manirere Emmanuel ni umwe mu baturage baganiriye na IGIHE wagize ati “Hano hangiritse cyane ahagana muri Werurwe mu mvura yagwaga umusubirizo, twakundaga kuhanyura twahira ubwatsi bw’amatungo, dutungurwa no kubona uyu muhanda ucukuka kandi harimo n’umwobo munini.”

Uwitwa Kazungu we yagize ati “Urebye uburyo hacukutse mu gihe gito kuriya nta burambe iki kiraro gifite isaha iyo ari yo yose cyariduka”.

Bakomeza bavuga ko batewe impungenge n’uko igihe cy’imvura cyegereje hatarakorwa ku buryo hashobora kuzariduka.

Umuyobozi w’Akarere ka Musanze wungirije ushinzwe imari, ubukungu n’iterambere,Habyarimana Jean Damascène, yemeza ko iki kibazo bakizi kandi ko barangije kukigeza ku Kigo cy’Igihugu gishinzwe guteza Imbere Ibikorwa by’Ubwikorezi (RTDA) bakaba ngo bategereje igisubizo.

Yagize ati “Uyu muhanda urenze ubushobozi bw’akarere gusa twamaze kumenyekanisha iki kibazo muri RTDA dutegereje igisubizo, ntibikwiye gutinda kuko twegereje igihe cy’imvura kandi niyo ikomeza kucyangiza.”

Aho iki kiraro cyangirikiye hakunze kugaragara amazi yuzura mu muhanda cyane cyane mu gihe cy’imvura nyinshi, hakiyongeraho n’amazi aturuka mu birunga bikabangamira ingendo za Musanze-Rubavu ndetse zimwe zikanahagarara.

Ku itariki ya 26 Gicurasi 2015, amazi yo mu birunga mu buryo butunguranye yafunze umuhanda Musanze-Rubavu amasaha atatu n’igice nyuma y’uko abawukoresha batunguwe no kuwubona warengewe amazi yari yivanze n’amabuye yamanutse mu birunga.

Iki cyuma cyarihinnye ku buryo amazi anyura ku ruhande agacukura umuhanda
Umuhanda watangiye kwiyasa
Akarere ka Musanze kavuze ko ari ikibazo kirenze ubushobozi bwako ariyo mpamvu kitabaje RTDA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza