00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Hagiye gutangizwa ikoranabuhanga rizajya riha amakuru y’iteganyagihe abahinzi

Yanditswe na Claude Bazatsinda
Kuya 21 Ugushyingo 2021 saa 05:17
Yasuwe :
0 0

Abahanga mu by’ubuhinzi bagizwe n’itsinda ryaturutse mu Budage, Ikigo cy’Igihugu Gishinzwe guteza imbere Ubuhinzi n’Ubworozi, RAB, Ikigo cy’Igihugu cy’Iteganyagihe Meteo Rwanda n’abandi bafatanyabikorwa batandukanye, bagiye gutangiza ikoranabuhanga mu buhinzi rishingiye ku iteganyagihe riha umuhinzi amakuru.

Ni ikoranabuhanga rizwi nka "Smart Agriculture" rizakoresha telefone y’umuhinzi y’ubwoko ubwari bwo bwose. Azajya abona amakuru y’iteganyagihe ry’aho yakoreye ubuhinzi bwe, bitume amenya ibyemezo yafata ku buhinzi bwe yaba gutera imiti, gufumbira, gusarura n’ibindi bigamije kongera umusaruro no kugabanya imvune umuhinzi yagiraga.

Ni umushinga abahinzi bifuje ko wakwihutishwa, kuko wabagabanyiriza bimwe mu bihombo bahuraga nabyo kubera kubura amakuru nyayo ku iteganyagihe.

Ngirabatware Innocent, umwe bakora ubuhinzi wo mu Murenge wa Musanze mu Kagari ka Rwambogo, avuga ko mu buhinzi bakora bakunze guhura n’igihombo biturutse ku kuba akenshi bashingiraga ku makuru y’iteganyagihe rusange rimwe na rimwe ntabe yo kuko usanga aba ari ay’akarere kose.

Yagize ati “Hari ubwo umuhinzi yabyukaga abona izuba riva cyane, ukegura ipombo ukajya gutera imiti, waba ugeze hagati ukabona ikirere gihindutse ako kanya imvura ikagwa, wa muti wose ukigendera, ugatera nka gatatu mu cyumweru kandi ukwiye gutera rimwe”.

Iribagiza Marie Chantal na we yagize ati “Twe nk’abahinzi icyo twifuza ni uko iri koranabuhanga ryakwihutishwa kandi rigakoreshwa kuko turumva ari ryiza. Rizajye rikoreshwa no kuri telefoni nto zisanzwe, akandi kurusho ni uko tuzajya tumenya amakuru y’iteganyagihe ry’umudugudu bitandukanye na mbere twashingiraga kury’akarere kose, bityo bidufashe kwita ku bihingwa bacu”.

Umuyobozi Mukuru wa Ines Ruhengeri, Padiri Dr Hagenimana Fabien, avuga ko rizafasha abahinzi kugabanya imvune bahuraga nazo, kongera umusaruro no kugabanya igishoro bashoraga mu buhinzi.

Yagize ati “Iri koranabuhanga rizibanda ku gutanga amakuru y’iteganyagihe azamanuka akagera ku muhinzi aho ari hose, amenye amakuru yose y’imihindagurikire y’ikirere. Ryitezweho kandi guteza imbere ubuhinzi budashingiye ku isuka nziza cyangwa ibigango by’ubuhinzi, ahubwo bagakoresha ubwenge. Rizakoreshwa muri telefone iyo ariyo yose umuhinzi afite bidasabye Smart phone ."

Umuyobozi Mukuru wungirije w’Ikigo cy’Igihugu gishinzwe guteza imbere ubuhinzi n’ubworozi, Bucagu Charles, yavuze ko iri koranabuhanga rizaba rigamije kunoza amakuru yajyaga atangwa na Meteo ku mihindagurikire y’ikirere, aho amakuru yizewe azajya atangwa ku muhinzi aho aherereye, bikamufasha gufata ibyemezo bihamye ku buhinzi bwe.

Yagize ati "Iri koranabuhanga rizanoza neza amakuru yajyaga atangwa na Meteo kuko amakuru y’imihindagurikire y’ikirere yatangwaga mu buryo bwaguye, akagerwaho bitewe n’imiterere y’ahantu, hamwe imvura ikagwa ahandi ntigwe."

"Aha rero tuzakora urubuga ruzajya rutanga amakuru yizewe azamanuka agere hasi ku muhinzi aho ari, abashe gufata ibyemezo bihamye ku buhinzi bwe, bimufashe kugera ku ntego y’umusaruro uhagije, yoroherwe na bwa buhinzi bumugeze kuri byinshi by’iterambere."

Kugeza ubu inyigo y’umushinga w’iri koranabuhanga rya Smart Agriculture, ugiye kugeragerezwa mu Karere ka Musanze ku gihingwa cy’ibirayi no mu Karere ka Kayonza ku gihingwa cy’ibigori, bikaba biteganyijwe ko nutanga umusaruro uzakwirakwizwa mu gihugu hose ku bihingwa byose.

Inzego zitandukanye zagize uruhare mu ikorwa ry'iri koranabuhanga rigamije guteza imbere ubuhinzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .