Musanze: Bahangayikishijwe n’ubujura bwo mu ngo bukomeje kwiyongera

Yanditswe na Claude Bazatsinda
Kuya 5 Gashyantare 2021 saa 10:13
Yasuwe :
0 0

Bamwe mu baturage bo mu Mujyi wa Musanze no mu nkengero zawo, bavuga ko bahangayikishijwe n’abantu bakomeje kubacucura utwabo harimo ibikoresho byo mu ngo n’imyaka iba itarera neza, bagasaba ko inzego zibishinzwe zabakurikiranira ikibazo kuko kibakenesha.

Ibibazo by’ubujura bwo gucukura inzu, kuzica inzugi, kwiba imyaka mu mirima no kwiba amatungo, cyagiye gikunda kumvikana mu Mujyi wa Musanze ariko abahatuye bavuga ko cyafashe indi ntera muri iyi minsi, kandi ko bidafatiwe imyanzuro abenshi cyabasigira ubukene bukabije.

Abaganiriye na IGIHE, icyo bahurizaho ni uko ubu bujura bubakorerwa bakeka ko bwaba bukorwa n’abanyerondo bashyizweho kuko aba bajura baba bambaye imyenda yabo, bagasaba ko bahabwa abanyerondo baturanye kuko bo baba babazi.

Umwe muri bo ni Hakizimana Thacien wo mu Kagari ka Kabeza mu Murenge wa Cyuve, yagize ati "Ndebera nk’uyu murima wanjye nawukuragamo imifuka itanu y’ibigori kuko kuva nabaho sinigeze nsarura ibigori bitarera, ubu se ntureba ibyo nakuyemo ko bitazavamo n’imifuka ibiri! Barabimaze kandi sinjye gusa n’abandi bari kubisarura bitarera babitanguranwa n’ibisambo".

Nikuze Jeannine wo mu Kagari ka Ruhengeri we avuga ko aba bantu bamwibye ndetse ko abo yarabutswe bari bambaye imyenda y’abanyerondo.

Ati "Njye banyibye hakiri kare ubwo twatahaga saa tatu, bari bambaye imyenda y’abanyerondo kandi iyo baza kuba ari ab’inaha nari kubamenya neza. Icyo dusaba Leta ni uko aba banyerondo baba ab’iwacu kuko bariya ntabwo tubazi ngo tubatandukanye n’ibisambo".

Nizeyimana Claude wo mu Kagari ka Mpenge mu Murenge wa Muhoza nawe avuga ko yatashye ajya iwe akabona abanyerondo akumva ko nta kibazo, ariko yaje gutungurwa n’uko bari bamuteze bakwamwambura.

Ati "Nari mvuye mu kazi bwije kuko ndi mucoma, nababonye imbere yanjye ndakomeza numva nta kibazo, nabagezeho baramfata banyaka amafaranga agera ku bihumbi 40 Frw, bandekuye niruka nanatabaza ariko ntawantabaye kuko abari ku irondo ni bo banyibye. Turasaba inzego zibishinzwe ko zaduha abo tuzi neza batuye ino".

Umwe mu bakuriye aba banyerondo bavugwaho kuba harimo abahungabanya umutekano bagakora ubujura, Nshimiyimana Mark, yahakanye aya makuru, gusa agaragaza ko nawe ashyigikiye iki cyifuzo cy’abaturage cy’uko bakorana n’abanyerondo bahaturiye n’ubwo biba bitoroshye kubona abakora uyu murimo w’ubwitange mu gice cy’umujyi.

Yagize ati "Ayo ni amakuru mabi kuko ababivuga baba bashaka kwihisha inyuma y’ihungabana ry’umutekano, urumva nanjye ngerageza gukorana na bo nijoro kandi tubageraho kenshi cyane batabizi. Sinakoresha abantu bica umutekano kandi mu nshingano dufite harimo kuwurinda".

Yongeyeho ati "Icyo cyo kuba hakoreshwa abanyerondo batuye muri ako gace, nanjye ndagishyigikiye gusa twe duha akazi abanyarwanda bose ntawe uhejwe, n’ubwo usanga abakunze kuboneka aba ari abo hirya mu mirenge yo mu cyaro kuko bikigoye kubona abakora umurimo nk’uwo usaba ubwitange bo mu Mujyi".

Umuyobozi w’Akarere ka Musanze, Nuwumuremyi Jeannine, avuga ko batazihanganira ubu bujura kandi ko uwo buzagaragaraho azabihanirwa n’amategeko.

Ati "Ubujura bwo burahari ariko ntawe tuzihanganira kuko amategeko arahari kandi azakomeza kubahirizwa. Icyo dusaba abaturage ni ukurushaho kuba maso bagatangira amakuru ku gihe aho babona icyuho cy’umutekano muke bakahavuga".

Mu gitabo cy’amategeko agena ibyaha n’ibihano byabyo mu Rwanda cyo kuwa 30 Kanama 2018, mu ngingo ya 166, ivuga ko ’Umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2), n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW), cyangwa imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano’.

Ibigori biri gusarurwa mu mirima bitarera, ibiteza ababihinze igihombo gikomeye
N'imirima iri hafi ya ba nyirayo iri gusarurwa itarera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .