Musanze: Isuku nke mu byatumye akarere kaba aka nyuma mu mihigo

Yanditswe na Uwishyaka Jean Louis
Kuya 30 Nzeri 2016 saa 11:33
Yasuwe : XX
0

Itsinda ry’Abasenateri ryasabye abaturage bo mu Karere ka Musanze, mu Ntara y’Amajyaruguru gukemura ikibazo cy’isuku nke ikibagaragaraho kugira ngo babashe kurangwa n’ubuzima buzira umuze.

Iri tsinda ry’ abasenateri ryabisabye abaturage ku wa Gatandatu tariki ya 24 Nzeri 2016, ubwo bakoranaga umuganda rusange usoza ukwezi, mu Murenge wa Gataraga uherereye mu Karere ka Musanze.

Abasenateri bibukije abaturage batuye muri aka karere ko bakwiye kurangwa n’isuku aho bava bakagera ndetse ko akarere kabo kadashobora kuva ku mwanya wa nyuma ngo kaze ku wa mbere mu mihigo mu gihe ubwabo n’abana babo bakigaragarwaho isuku nke ku mibiri.

Visi Perezida wa Sena y’u Rwanda ,Fatou Harerimana yagize ati “ Ndagira ngo tuganire duhereye kuri gahunda y’isuku kuko ntitwaba aba mbere tugifite isuku nke. Ese reka mbabaze Kuki abana bacu bajya ku ishuri badakarabye cyangwa barwaye amavunja?”

Yakomeje asaba aba baturage guhindura imyumvire bahereye ku kibazo cy’isuku bakajyana n’icyerekezo basabwa kugira ngo n’akarere kabo na ko kazabashe kuba aka mbere mu mihigo.

Umuyobozi w’Akarere ka Musanze, Musabyimana Jean Claude, yashimangiye ko kuba akarere ayoboye karaje inyuma mu mihigo, nta wundi byakwitirirwa uretse abagatuye kuko ari bo bafite mu biganza kuba kashyira mu bikorwa ibyo kiyemeje gukora kakanarenzaho.

Yagize ati “ Kuba hakiri abaturage batagira isuku ku mubiri n’aho batuye ngo banayigirire abana babo, biri mu bikidindiza akarere kacu kuko amahirwe yo kugira ubutaka burumbuka yiyongeraho n’ayo bagenerwa muri gahunda za Leta ariko ntibayakoreshe uko bikwiye.”

Yakomeje avuga ko ubuyobozi buzaharanira gukomeza kongera ibikorwa by’iterambere birimo imihanda, amazi meza n’amashanyarazi ndetse no gukangurira abaturage kurangwa n’isuku ariko ko na bo bagomba kumva ko iyo akarere kabaye aka nyuma bititirirwa umuyobozi wako wenyine, ahubwo ko nabo bibageraho.

Nyuma y’uko abaturage bakanguriwe kwita ku isuku, bemereye ubuyobozi ko bagiye guhinduka mu buryo bugaragarira buri wese kugira ngo akarere kabo na ko kaze mu myanya ya mbere mu kwesa imihigo kiyemeje.

Umuturage utarashatse ko izina rye ritangazwa yagize ati “Kuba batubwiye ko n’isuku nke itugaragaraho iri mu bituma tutesa imihigo nk’uko bikwiye, ubu tugiye kuyitaho tuzarebe ko nibura natwe umwaka utaha akarere kacu kazaza mu Turere twa mbere.”

Senateri Fatou Harerimana yasabye abanya Musanze guca ukubiri n'umwanda
Abasenateri banyuranye bifatanyije n'akarere ka Musanze mu muganda babasaba kugira uruhare mu kwesa neza imihigo
Meya Musabyimana yabwiye abaturage be ko umwanda ukibarangwaho utuma akarere kaza inyuma mu mihigo
Abaturage biyemeje kwtandukanya n'umwanda baharanira gutuma akarere kabo kaza imbere mu mihigo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza