Kwamamaza

Musanze: Abagore bakora ubuhinzi barasabwa kugira igenamigambi rihamye

Yanditswe kuya 25-09-2016 saa 11:15' na Bazatsinda Jean Claude


Abagore bibumbiye mu matsinda akora ibijyanye n’ubuhinzi bakunze guhura n’ibibazo bitandukanye birimo kutagira gahunda ihamye mu byo bakora n’igenamigambi ry’igihe kirekire bishobora kubazitira mu iterambere ryabo ndetse na sosiyete babarizwamo.

Abenshi mu bakora umwuga w’ubuhinzi bahitamo kugabana inyungu bavana mu musaruro babona kugira ngo babashe gukemura ibibazo byo mu ngo zabo.

Bamwe mu bahinzi bahuguwe n’Impuzamiryango itegamiye kuri Leta iharanira iterambere (CCOIAB), kuri uyu wa Gatanu, tariki ya 23 Nzeri 2016 batangarije IGIHE ko zimwe mu mpamvu nyamukuru zituma umusaruro ubonetse bawujyana mu ngo ari ukugaragariza abagabo ko nabo bakora bagamije guteza imbere imiryango yabo.

Mukashyaka Clarisse yagize ati “Akenshi usanga umusaruro tubonye duhita tuwugabana buri wese agatwara uwe aho kuwushyira hamwe ngo ugwire, tuba tugira ngo umugabo ubona ugenda buri munsi abone ko hari icyo usarura.”

Espérance Nyirahabiyambere we atangaza ko babaga mu matsinda ariko badafite umuco wo kwizigamira.

Yagize ati “Twabaga mu matsinda ariko nta ntego wasangaga dufite, ubu twamenye gutegura umushinga no kwizigamira kandi twiteguye no kugana amabanki ngo twongere amikoro yacu dutere imbere.”

Umukozi wa CCOIAB, Wihogora Aloysia, ukurikiranira hafi amatsinda y’abagore bakora ibijyanye n’ubuhinzi, yabasabye kwibumbira mu makoperative no kugira umuco wo kuzigama, kugira ngo babashe gukorana na za banki.

Yagize ati “Akenshi usanga abagore baba mu makoperative ariko nta buzima gatozi bafite, ibyo byakomezaga kudindiza iterambere ryabo. Amakosa bakoraga wasangaga uyoboye koperative ariwe ufatwa nka koperative bigatuma bibasubiza inyuma cyane.”

Wihogora akomeza avuga ko hakiri n’abagore bakitinya ku bijyanye no gukorana na banki bityo akabasaba gukanguka bagakora bakiteza imbere ubwabo n’igihugu muri rusange ndetse bakagira n’igenamigambi rihamye.

Nkuko imibare ibigaragaza abanyarwanda basaga 80% bakora ubuhinzi, aho abenshi usanga ari abagore, ngo baramutse bitabiriye gukora ubuhinzi bwa kijyambere impuzamiryango CCOAIB, igaragaza ko iterambere ry’ingo nyinshi ryakwihuta, bakihaza mu biribwa ndetse bagasagurira amasoko yo hanze.

Ikiciro cyahawe amasomo kigizwe n’abagore 39 baturuka mu Turere twa Musanze, Karongi, Nyanza,Nyamagabe ndetse na Gisagara.

Abagore bibumbiye mu matsinda akora ubuhinzi basabwe kwizigama
Abagore bibumbiraga mu itsinda bakaganira ku masomo bahawe
Nyuma y'amahugurwa bafashe ifoto rusange

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved