Kwamamaza

Musanze: Abagore bahangayikishijwe n’abagabo babo bajya gupagasa muti wa mperezayo

Yanditswe kuya 2-09-2016 saa 16:09' na Emma-Marie Umurerwa


Abagore bo mu Murenge wa Nyange, mu Karere ka Musanze baravuga ko bahangayikishijwe bikomeye n’abagabo babo bajya gupagasa muri Uganda bagaherayo, abagore babo basize mu Rwanda bagategereza ko bagaruka bagaheba.

Kubera kubura imirimo mu gace batuyemo, ngo bamwe mu bagabo bafata icyemezo cyo kujya gupagasa(gushaka akazi gaciriritse) muri Uganda, igihugu gituranye n’aka karere.

Ikibabaje abagore bamwe bo muri aka gace ngo ni uko hari abagabo bagenda bagiye gupagasa ariko ntibibuke gutaha.

Umugore utifuje ko izina rye ritangazwa, avuga ko umugabo we amaze imyaka itanu agiye gupagasa muri Uganda, none ngo akaba yarategereje ko agaruka araheba.

Yagize ati “Yansigiye abana batanu, ajya gupagasa kubera ko inaha twabonaga akazi karabuze. Ikimbabaje ni uko nategereje ko agaruka ngaheba.”

Uyu mugore akomeza avuga ko atazi neza agace umugabo we aherereyemo, ariko ngo amakuru afite ni uko ari mu Karere kari hafi y’umupaka wa Cyanika.

Abagabo bagera Uganda bagashaka abandi bagore

Mukakibibi Leocadie, avuga ko hari abagabo bashakira abandi bagore aho baba bagiye gupagasa.

Ati“Baragenda bagashakirayo abandi bagore ntibibuke abo basize inaha.”

Ubuyobozi bugaragaza nyirabayazana w’ikibazo

Nteziryayo Epimaque, umuyobozi ushinzwe irangamimerere n’ibibazo by’abaturage mu Murenge wa Nyange, avuga ko gushaka abagore benshi ari imwe mu mpamvu itera iki kibazo.

Yagize ati “Abaturage b’ino aha barabyara cyane. Nk’ubu Umurenge wa Nyange utuwe n’abaturage bagera ku bihumbi 28, kuri kirometero kare (Km2) usanga ari hafi 600. Abantu ni benshi cyane wajya kureba ubutaka basaranganywa, ugasanga ni buto cyane bigatuma babona nta byo kubahaza bafite bagahitamo kujya gupagasa mu Bugande mu rwego rwo gushaka imibereho. Barabyara cyane kandi ubutaka butiyongera.”

Uyu muyobozi akomeza avuga ko aba baturage bagifite umuco wo gushaka abagore barenze umwe, ibi ngo bigatuma barushaho kororoka.

Ati “Umugabo iyo ashatse umugore wa mbere aba akeneye ko amubyarira, yashaka uwa kabiri akumva na we akeneye kumubyarira, ibyo rero bigatuma umugabo agira abana 20 cyangwa 30.Umugore umwe ugasanga ari kumwubakira mu mbuga y’undi, udafite imbuga akamushyira mu gikoni.”

Ikikibazo gihangayikishije ubuyobozi

Nteziryayo akomeza avuga ko kuba abaturage bajya gupagasa muri Uganda bigira ingaruka zitandukanye.

Ati “Ni ikibazo kuko hari abajya gupagasa Uganda bakagumayo, abandi na bo babura ubushobozi bwo kwishyurira mituweli abagize umuryango kubera ko aba ari benshi bakagenda.”

Akomeza avuga ko uku gushaka abagore benshi binagira ingaruka ku bana kuko usanga hari abava mu ishuri abandi bakajya kuba inzererezi kubera kutabona ibibatunga bihagije.

Si ibi gusa kandi kuko muri uyu Murenge hanagaragara umubare utari muto w’abagabo babana n’abagore batarasezeranye imbere y’amategeko.

Abagore bo mu murenge wa Nyange bavuga ko abagabo babo bajya gupagasa bagaherayo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved