00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Abagore 24 bafatiwe muri “Kitchen party” barenze ku mabwiriza yo kwirinda Covid-19

Yanditswe na Claude Bazatsinda
Kuya 12 Nyakanga 2021 saa 07:58
Yasuwe :
0 0

Polisi y’Igihugu ikorera mu Karere ka Musanze yataye muri yombi abagore 24 bari mu birori bizwi nka “Kitchen Party” byanakusanyirizwagamo inkunga yo gushyingira umukobwa wabo.

Abatawe muri yombi basanzwe mu Kagari ka Kivugiza mu Murenge wa Muko muri Musanze aho bakusanyaga ibikoresho bizifashishwa mu gucyura ubukwe bw’umwe muri bo.

Bamwe mu bafatiwe muri ibyo birori bemera ko barenze ku mabwiriza ariko ko batari biteze ko bahurira hamwe cyane ko bari babiteguye ngo bitange mu gihe ubukwe buzasubukwa bazabukomeze nta nkomyi.

Umubyeyi w’umukobwa wategurirwaga ibirori yavuze ko yahisemo kwitabaza abandi mu gutegura ubukwe kuko we nta bushobozi yari afite.

Yagize ati “Njye nari mfite umwana ugiye gushyingirwa kuko nari mfite ubushobozi buke abantu bahitamo ko bajya bampa ubufasha. Ni bwo twagerageje kubuhuriza hamwe ngo igihe cy’ubukwe nikigera tuzabe twarabiteguye.’’

“Ntitwari tuzi neza ko tuzahurira hamwe kuko twifuzaga ko uzajya abona ubushobozi azajya abutanga agahita ataha ngo tudahurira hamwe. Ubwo twari muri iki gikorwa twararangaye kugeza ubwo inzego z’umutekano zidufata, twarakosheje ariko turasaba imbabazi ntabwo tuzongera kuko tumaze kubona isomo.”

Uwari wateguriwe ubukwe yavuze ko bakoze icyo gikorwa kandi kitemewe. Ati “Twari mu birori bitemewe noneho turi gukusanya ubushobozi bw’ubukwe twitegura ubwo bazaba bafunguye Covid-19 yagabanutse baradufata. Ubu turasaba imbabazi turabizi neza icyorezo kiri kwiyongera ariko ntabwo twari tuzi ko abantu bazahurira hamwe kuriya.’’

Umwe mu bitabiriye ibi birori yavuze ko yabigezemo atumiwe atari azi neza ko azahahurira n’abandi bantu benshi.

Yagize ati “Njye natumiwe na nyina w’uyu mukobwa kuko turacuruzanya kandi turamukunda cyane. Nagiyeyo umugabo wanjye yambujije; ndicuza kuko nakoze ibitemewe. Ubu ni ubwa mbere mpingutse mu buyobozi, mfite abana bakuru n’umugabo nababwiye aho ndi barumirwa sinzi uko bizagenda nintaha ariko bose ndabasaba imbabazi.’’

Umuhuzabikorwa w’Ibikorwa bya Polisi n’Abaturage mu Ntara y’Amajyaruguru, CIP Alex Ndayisenga, yasabye abaturage gukomeza kubahiriza ingamba zo kwirinda Covid-19 kuko ihari kandi ikomeje guhitana ubuzima bwa benshi.

Yagize ati “Turashimira abaturage n’izindi nzego bakomeje gukorana na Polisi mu guhashya iki cyorezo. Icyo tubasaba ni ukumva neza no kumenya ko icyorezo cya Covid-19 gikomeje kwandurwa no guhitana ubuzima bwa benshi, bagomba gukomeza kubahiriza no gushyira mu bikorwa ingamba zaba zatanzwe kugira ngo duhanga nacyo.’’

Yasabye abaturage kudakorera ku jisho kuko urugamba rwo kurwanya Covid-19 rureba buri wese kandi ko imyitwarire yabo ariyo izatuma bagera ku ntsinzi yacyo.

Ati “Icyo Polisi isaba abaturage ni ukumva neza ko Covid-19 ihari, bakareka gukorera ku jisho ahubwo bakabigira ibyabo kandi ikomeje kwandurwa na benshi ari nako bamwe ibahitana. Bagomba guhindura imyitwarire kuko kubahiriza amabwiriza aribyo bizatuma dutsinda iki cyorezo, Polisi ntizihanganira abarenga ku mabwiriza kuko ni yo nzira dufite yo gutsinda icyo cyorezo.’’

Abagore 24 bafashwe bagomba kujyanwa mu kato bakigishwa mu gihe cy’icyumweru ndetse bakazapimwa niba nta wanduye Covid-19 kuko bahuriye ahantu hamwe batipimishije kandi baturutse mu bice bitandukanye. Bazanacibwa amande y’ibihumbi 10 kuri buri muntu nk’uko amabwiriza y’Inama Njyanama y’Akarere ka Musanze abigena. Biteganyijwe ko uwateranyije ibyo birori we azacibwa ibihumbi 100.

Polisi iheruka gutangaza ko kuva ku wa 23 Kamena kugeza ku wa 2 Nyakanga 2021 hafashwe abantu 737 bari mu bikorwa bitemewe by’utubari n’ibirori mu gihe imibare y’abandura n’abahitanwa na Covid-19 ikomeje kwiyongera mu gihugu.

Abagore 24 bo mu Karere ka Musanze bafatiwe muri “Kitchen party” barenze ku mabwiriza yo kwirinda Covid-19
Umuhuzabikorwa w’Ibikorwa bya Polisi n’Abaturage mu Ntara y’Amajyaruguru, CIP Alex Ndayisenga, yasabye abaturage kubahiriza ingamba zo kwirinda Covid-19 birinda gushyira ubuzima bwabo n'ubw'abandi mu kaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .