Musanze: Abagabo batinyutse kwifungisha urubyaro burundu bahamya ko ari urufunguzo rw’ubuzima bwiza

Yanditswe na N.Kubwimana Janvière
Kuya 28 Kamena 2019 saa 04:26
Yasuwe :
0 0

Bamwe mu bagabo bo mu Karere ka Musanze, batinyutse gufata icyemezo cyo kuboneza urubyaro bakoresha uburyo bwo kwifungisha burundu (vasectomie), bemeza ko ari nk’urufunguzo rw’ubuzima bwiza ku miryango yabo.

Kugeza ubu uburyo bwifashishwa ku bagabo mu kuboneza urubyaro ni ugukoresha agakingirizo, kwiyakana mu gihe cy’imibonano mpuzabitsina no kwifungisha burundu, ari nabwo buryo abaganga bemeza ko bwizewe cyane.

Kuva mu 2010 mu Rwanda hashyizweho gahunda yo gukangurira abagabo kwitabira gahunda zo kuboneza urubyaro bakoresha uburyo bwo kwifungisha burundu, mu rwego rwo kugabanya umubare w’abaturage ugenda wiyongera cyane ugereranyije n’ubukungu bw’igihugu.

Bamwe mu bagabo bahisemo kwifungisha burundu bagamije kuboneza urubyaro, bemeza ko ari gahunda nziza yababereye urufunguzo rw’ubuzima bwiza mu iterambere ry’imiryango yabo.

Uwitwa Nshimiyimana Jean Bosco yavuze ko akimara kumva ko haje uburyo bwo kwifungisha burundu ku bagabo yabanje kubitinya, yumva ko hari ingaruka byamugiraho mu kunoza inshingano z’abashakanye, ariko amaze kubyara abana umunani nabo batabayeho neza yiyemeza kubugana.

Ati “Maze amezi icyenda mbikoze, ubu umugore yararuhutse nawe yabonye umwanya wo kwiyitaho tunafatanya guhahira umuryango wacu, nta kibazo na kimwe nagize nk’uko nabikekaga, ni gahunda yambereye urufunguzo rw’iterambere ry’umuryango wanjye”.

Mugenzi we witwa Bigirimana Valens avuga ko amaze kugira abana bane we n’umugore bahisemo uburyo bwo kuboneza urubyaro bakagerageza ubw’umugore bikanga, agahitamo kujyayo.

Ati “Narifungishije burundu kuko twumvaga abana dufite bahagije. Nubwo hakiri bagenzi bacu bakibitinya bibwira ko bizabagiraho ingaruka cyangwa ari iby’abagore gusa, siko bimeze. Kuboneza urubyaro bireba umugore n’umugabo, bikanatuma babona umwanya wo kwita ku miryango yabo nk’uko twe twatangiye kubigeraho”.

Umuyobozi w’ibitaro bya Ruhengeri Dr Muhire Phirbert, avuga ko kwifungisha burundu ku bagabo baboneza urubyaro byoroha cyane kuruta ko abagore babikora, kandi ko nta ngaruka na ntoya bitera.

Avuga ko iyo umugore yifuje gufungisha burundu urubyaro bisaba ubwitonzi bwinshi n’ubuhanga, kandi bimusaba kujya mu bitaro, mu gihe ku bagabo bitarenza n’iminota 30 kuko ni ugufunga udusabo tujyana intaga, ubundi agasabwa kumara amezi atatu adakora imibonano mpuzabitsina, nyuma yaho gahunda zose zo kubaka urugo zigenda neza nk’uko bisanzwe.

Ati “Abakivuga ko hari ingaruka mbi byabatera ni imyumvire idahwitse kuko n’abagabo babyitabira baracyari bake, ariko bumve ko ntacyo byahindura ku buzima bwabo”.

Kugeza ubu umubare w’abagabo bitabira kuboneza urubyaro bifashishije uburyo bwo kwifungisha burundu uracyari hasi cyane, aho mu bitaro bikuru bya Ruhengeri abamaze kwitabira iyi gahunda bangana na 95.

Kuboneza urubyaro ni gahunda ya Leta igamije gushishikariza no gufasha abaturage kubyara abana bashoboye kurera, yaba kubagaburira, kubishyurira amashuri, kubavuza n’ibindi nkenerwa ku mwana uri mu muryango.

Ubushakashatsi bwakozwe mu 2014-2015 n’Ikigo cy’Igihugu cy’Ubuzima, RBC, ku myororokere y’Abanyarwanda, bugaragaza ko buri mwaka mu Rwanda havuka abana ibihumbi 300, ni ukuvuga abana bashobora kuzura akarere kamwe k’u Rwanda.

Mu bitaro bya Ruhengeri abagabo 95 bamaze kwifungisha burundu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza