Kwamamaza

Muri Mata 2017 nta soko rya Leta rizongera gutangwa mu mpapuro

Yanditswe kuya 22-09-2016 saa 21:14' na Ntakirutimana Deus


Ikigo cy’Igihugu gishinzwe gutunganya amasoko ya Leta (RPPA) kiratangaza ko guhera muri Mata 2017, nta soko rya Leta rizongera gutangwa mu mpapuro, ahubwo hazifashishwa uburyo bw’ikoranabuhanga.

Uburyo bwiswe umushinga w’ikoranabuhanga mu itangwa ry’amasoko ya Leta E-(Procurement) bumaze iminsi bukoreshwa mu bigo umunani byatoranyijwe mu gihugu, guhera tariki ya 27 Kamena 2016.

Mu kiganiro yagiranye n’abanyamakuru kuri uyu wa Kane tariki ya 22 Nzeri 2016, Umuyobozi mukuru wa RPPA, Seminega Augustus yavuze ko nyuma yuko babonye ko ubwo buryo bushoboka muri ibyo bigo, byemejwe ko muri Mata 2017 buzatangira gukoreshwa mu bigo byose bya Leta, ku bijyanye no gutanga amasoko.

Yasabye ba rwiyemezamirimo kwihutira gufata umukono w’ikoranabuhanga basabwa kugira ngo bemererwe gukoresha ubwo buryo, ndetse no kwitabira kurikoresha ngo bagende barimenyera, birinde imbogamizi z’ubumenyi mu gihe ibigo byose bizaba byatangiye gukoresha ubwo buryo.

Seminega yavuze ko ubwo buryo buzafasha mu kugabanya ruswa yashoboraga gutangwa hagati y’ushinzwe amasoko na rwiyemezamirimo, ariko ngo kuko ntaho bazongera gupfa guhurira ngo izagabanuka. Itangwa ry’amasoko ya Leta ni kimwe mu byakomeje gutungwa agatoki n’abatari bake ko bitikiriramo imari nyinshi bitewe no kudakoresha ikoranabuhanga.

Ikindi bifasha ni ukuzigama umwanya ndetse n’igihe, kugabanya uburiganya ndetse no guharanira umutekano w’inyandiko.

Kuva ubwo buryo bwatangira, ba rwiyemezamirimo bagera kuri 275 bamaze kwiyandikisha mu buryo bw’ikoranabuhanga ngo bajye bapiganwa. Muri icyo gihe hamaze gupiganirwa amasoko 60.

Imbogamizi zirimo kuboneka muri ubwo buryo nuko ngo hitabira umubare muke wa ba rwiyemezamirimo, ku buryo ngo hari nk’isoko usanga hapiganwe rwiyemezamirimo umwe, babiri cyangwa batatu.

Umuyobozi w’Umushinga ushinzwe gutunganya amasoko ya Leta muri RPPA, Migambi Richard, yavuze ko abashinzwe amasoko ya Leta mu bigo umunani byatangijwemo ubwo buryo bamaze guhugurwa.

Ku ikubitiro hahuguwe abagera kuri 81, guhera muri Mutarama 2017, n’abandi bose bo mu bigo bya Leta bakazahugurwa.

Mu rwego rwo kunoza iyo gahunda hagiye hahugurwa ibyiciro bitandukanye by’abantu, barimo ba rwiyemezamirimo, abafite Cyber Café muri Kigali n’abandi.

Umuyobozi mukuru wa RPPA, Seminega Augustus na Umuyobozi w’Umushinga ushinzwe gutunganya amasoko ya Leta muri RPPA, Migambi Richard

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved