Mukakarangwa yibuka uko Pasiteri Uwinkindi yabashutse ngo bahumirize asenge yagambanye n’abicanyi

Yanditswe na Tombola Felicie
Kuya 10 Mata 2018 saa 12:46
Yasuwe :
0 0

Mukakarangwa Ernestine warokotse ibitero byabereye muri Bugesera na Kicukiro avuga ko yibuka uburyo Pasiteri Uwinkindi wari umushumba w’itorero ADEPR muri komini Kanzenze, yabwiye abari bahungiye mu rusengero ngo bahumirize abasengere kandi yagambanye n’abicanyi ngo baze guhita batangira kwica uwitwa umututsi wese.

Mukakarangwa wasigaye wenyine mu bana batandatu bavukanaga,yavukiye mu Karere ka Bugesera mu yahoze yitwa komini Kanzenze, ubu ni mu Murenge wa Mwogo.

Jenoside yabaye afite imyaka 19 yiga mu mwaka wa kabiri w’amashuri yisumbuye ku buryo yibuka ibyabaye.

Mu buhamya yatanze tariki ya 7 Mata 2018, mu rusengero rw’Abadiventisiti rwa Kigali Bilingual Church, ubwo bibukaga ku nshuro ya 24 Jenoside yakorewe Abatutsi, uyu mubyeyi yavuze ko ababazwa no kuba mu nsengero haraguye abantu nyamara ariho bibwiragako bakirira.

Aho niho yahereye avuga ku bugome ndengakamere bw’uwari umushumba wa ADEPR muri komini Kanzenze, witwa Pasiteri Uwinkindi n’uburyo yakoresheje amanyanga yose ngo abatutsi bicwe.

Kuri ubu Pasiteri Uwinkindi yamamwe n’ibyaha birimo kuyobora ibitero simusiga byahitanye Abatutsi benshi ndetse no kujya kuri bariyeri zabaga zigamije kurobanura abatutsi bari bwicwe, ahabwa igifungo cya burundu.

Inzira y’inzitane ya Mukakarangwa

Uyu mubyeyi anyomoza abavuga ko Jenoside yakorewe Abatutsi yatewe n’ihanuka ry’indege ya Habyarima kuko mu 1992 iwabo mu Bugesera hakorerwaga igeragezwa rya ryayo bamwe bakicwa abandi bagahunga.

Avuga ko umuryango wabo bagerageje kwirinda kuko habagamo abantu bazi kurasa ariko bigapfa ubusa kugeza ubwo bahungaga, bakarara mu bishanga no ku misozi.

Avuga ko kubera ubwinshi bw’Abatutsi babaga bahungiye ku misozi bakarwanya abashaka kuza kubica, byageze aho ingabo zari i Gako zikajya ziza kubarasa maze abari nk’ibihumbi bine bagasigara ari nka 70.

Ati “ Bamaze kuturasa abantu barashize ari ukubona imirambo ukayicamo uvuga uti ‘ni njyewe ukurikiyeho, habayeho kujya mu nzu y’Imana ubundi iyo umuntu yajyaga mu nzu y’Imana ntiyicwaga ariko ikibabaje barishwe. Bajyaga bavuga ngo n’inyamaswa icitse umuhigo iyo yajyaga mu nzu nta wayisohoraga ariko icyo gihe siko byagenze.”

Avuga ko nubwo atagenda yibuka amatariki neza ariko abantu babonye bikomeye bamwe bakajya mu Kiriziya i Nyamata, i Ntarama ndetse no ku rusengero rwa ADEPR rwa Kayenzi, ahayoborwaga na Pasiteri Uwinkindi.

Ati “ Kuko na mbere nasengeraga muri ADEPR, Uwinkindi nari muzi ko yari umugome, nubwo abantu binjiraga naravuze nti ‘ntabwo ninjira kuko Uwinkindi ndamuzi kuva kera yari umuntu mubi ariko abantu bagendaga baturuka hirya no hino bamwe turanga abandi barinjira.”

Yakomeje agira “Twagiye kumva twumva mu Kiliziya i Ntarama birakomeye barabarashe, abasubiye inyuma ubwo mu Kiliziya i Kayenzi, Uwinkindi ndabyibuka yaravuze ati “Nimwinjire dusenge nyarama yari yamaze kubwira Abahutu, ati ‘niduhumiriza muhite mwiraramo maze uwitwa umututsi muramuzi mumwice.”
Abicanyi bamwe bari batuzi bati “ Ntabwo twakwica abantu twasenganye, nibo batubwiye ngo muturumbuke , bamwe twakize gutyo.”

Uko yamaze gatatu mu ruzi kandi aboshye amaguru n’amaboko

Avuga ko nyuma y’uko ibyo guhungira mu nsengero byanze bashotse ku ruzi bashaka kwambuka ngo bajye i Gahanga ariko bagahurirayo n’abicanyi.

Ati “ Tukihagera mu rukerera baravuze bati ‘mwakoze cyane kuba mwizanye ku ruzi, tugiye kubasubiza aho mwaturutse. Baratangiye abagabo bakabica urupfu rubi, abana b’abakobwa bakabaca amabere, igihimba hariya umutwe hariya bakabanaga mu ruzi.”

Ati “Barantemye ku kuboko, banjomba umuhunda mu nda, barangije bankubise mu mavi ubuhiri burimo imisumira n’ubu bijya bingaruka. Hano mu mavi harimo udusumari barangije bamboha amaboko n’amaguru banjugunya mu ruzi.”

Uyu mubyeyi avuga ko uruzi rwamujyanye, rukaza kumuta ku nkombe aho yatoraguwe n’abantu bari bihishe kuko bari barahishe Abatutsi noneho na bo bagahigwa ngo bicwe.

Ati “ Iyo ntekereje igihe namazemo mboshye numva ari nk’iminsi itatu, amaboko aboheye inyuma, amaguru aboshye n’imihoro bari bantemye n’ibindi byose.”

Avuga ko mu isayo bamukuyemo, intozi zari zatangiye kumurya ariko akaba yari agihumeka.

Avuga ko inkotanyi zifata Bugesera zamujyanye ku i Rebero ariko naho ntahatinde kuko baharasaga, bakamujyana i Ndera, abasirikare bakajya bavumuza kugeza ubwo yongeye kubona na se umubyara kuko ari we wari wararokotse.

Mukakarangwa avuga yashibutse kuko mu buzima busanzwe ibyo yanyuzemo bitari gutuma aba umubyeyi.

Ati “ Ndashima Imana ko yongeye kunyagura, twavukanaga turi abana batandatu ariko nta numwe usigaye ndashima Imana ko nabyaye nyuma y’ubwo buzima.”

Yasabye abantu bose kuba abakirisito bataryarya kuko abitwaga abantu b’Imana bakoze iby’ubunyamaswa.

Abari bitabiriye umuhango wo kwibuka
Umuyobozi w'Itorero ry'Abadiventisiti b'Umunsi wa Karindwi acana urumuri rw'icyizere
Umuyobozi w'Itorero ry'Abadiventisiti b'Umunsi wa Karindwi mu Rwanda, yasabye abari mu itorero kwitandukanya n'ubugome ubwo ari bwo bwose
Mukakarangwa Ernestine atanga ubuhamya bw'ibyamubayeho muri Jenoside

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza