Kwamamaza

Muhanga: Umwarimukazi ukekwaho kumena umunyeshuri ijisho, arahigishwa uruhindu

Yanditswe kuya 5-10-2016 saa 11:14' na Emma-Marie Umurerwa


Nyuma y’uko umwarimukazi wo ku kigo cy’amashuri abanza cya Nyundo, mu Murenge wa Rongi, mu Karere ka Muhanga, akubitiye umunyeshuri akabaru k’inkoni kakagwa mu jisho rya mugenzi we rikameneka, na we agahita ahunga, kuri ubu ngo arahigishwa uruhindu.

Nyiransabimana Françoise w’imyaka 23 ngo yigishaga mu mwaka wa gatatu w’amashuri abanza kuri iki kigo, aho yari yaragiye gusimbura umwarimukazi wari mu kiruhuko cya nyuma yo kubyara.

Tariki 7 Nzeri 2016 ngo ni bwo uyu mwarimukazi yahanaga umwana wari wakoze amakosa mu ishuri, inkoni irasaduka akabaru kagwa mu jisho ry’umwana w’umukobwa wari inyuma ye rirameneka. Tariki ya 14 Nzeri, ijisho ry’uyu mwana ngo ryakuwemo burundu, ubu umwarimu aburirwa irengero.

Mu kiganiro IGIHE yagiranye na Twagirayezu Vedaste, umuyobozi w’Ikigo cy’Amashuri cya Nyungo, avuga ko umwana wavuyemo ijisho atari we Nyiransabimana yakubitaga.

Yagize ati “Ntabwo umwana wavuyemo ijisho ari we yakubitaga, noneho akabaru k’iyo nkoni ni ko kasimbutse gafata mu jisho ry’uwo mwana wundi. Ntabwo ari umwana umwe, bari benshi. Bambwiye ko abo bana bari bakosheje, ariko ntibambwiye ibyo bari bakoshejemo. Ubu umwarimu yarabuze ntawe uzi aho aherereye.”

Twagirayezu yakomeje avuga ko itsinda ry’abanyeshuri ndetse n’abarimu, bagiye gusura uyu munyeshuri wavuyemo ijisho baramuhumuriza. Yagiriye inama abandi barimu yo kwirinda gutanga ibihano bishobora gukomeretsa umwana cyangwa bishobora kumugiraho izindi ngaruka.

Umurenge wa Rongi ni wo wavuje umwana wamenetse ijisho

Umunyamabanga Nshingwabikorwa w’Umurenge wa Rongi, Ndayisaba Aimable, yatangarije IGIHE ko ari bo bavuje uwo mwana wahuye n’icyo kibazo.

Yagize ati “Iwabo w’umwana nta mikoro bafite ku buryo bari kubasha kumuvuza. Ubuyobozi bw’Umurenge rero ni bwo bwatanze amafaranga arenga ibihumbi 200 kugira ngo uriya mwana avuzwe mu bitaro bya Kabgayi, ari naho basanze nta kindi bakora uretse kumukuramo ijisho kuko ryari ryamenetse.”

Ndayisaba yakomeje avuga ko uyu mwarimu ari gushakishwa. Ati “Yahise atoroka ntawe uzi aho aherereye kugeza ubu. Turasaba abarimu kujya birinda guha abana ibihano bibagiraho ingaruka, ubu twakoranye inama n’abarimu bose bo mu Murenge tubarabibabwira.”

Umuvugizi wa Polisi mu Ntara y’Amajyepfo, CIP André Hakizimana, avuga ko uyu mwarimukazi ari gushakishwa.

Yagize ati “Umwarimukazi ntabwo araboneka , Polisi iracyarimo kumushakisha. Amakuru dufite ni uko uyu mwana wavuyemo ijisho atariwe yakubitaga, ariko ikintu umuntu akoze atabishaka kikagira ingaruka ku muntu arabiryozwa.”

Yakomeje agira abarimu inama yo kumenya uburyo bahanamo abana, ndetse ngo byaba byiza bakoresheje imvugo kurusha inkoni.

Ingingo y’150 mu gitabo cy’amategeko ahana ibyaha mu Rwanda, ivuga ko iyo gukubita cyangwa gukomeretsa umuntu byateye indwara idakira, ubumuga buhoraho butuma ntacyo akora, kubuza burundu umwanya w’umubiri gukora no gutakaza igice cy’umubiri gikomeye, uwabikoze ahabwa igihano cy’igifungo kiva ku myaka irindwi (7) kugeza ku myaka icumi (10) n’ihazabu y’amafaranga y’u Rwanda kuva kuri miliyoni imwe (1.000.000) kugeza kuri miliyoni eshatu (3.000.000).

Iyo ukoze icyo cyaha yabigambiriye cyangwa yabitegeye igico, ahanishwa igifungo kuva ku myaka umunani (8) kugeza ku myaka icumi (10) n’ihazabu y’amafaranga y’u Rwanda kuva kuri miliyoni eshatu (3.000.000) kugeza kuri miliyoni eshanu (5.000.000)

CIP André Hakizimana yavuze ko inzego z'umutekano zikomeje gushakisha uyu mwarimukazi

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved