Muhanga:Umusore w’imyaka 22 yajugunywe mu itanura arakongoka(Yavuguruwe)

Yanditswe na Kanamugire Emmanuel
Kuya 16 Nzeri 2016 saa 12:22
Yasuwe :
0 0

Umusore w’imyaka 22 witwa Gakuru Daniel wo mu Murenge wa Shyogwe ho mu Karere ka Muhanga, yavumbitswe mu itanura ry’amatafari arashya arakongoka.

Amakuru agera kuri IGIHE avuga ko Gakuru yavumbitswe nk’urukwi mu itanura riherereye mu gishanga cya Nyirangari kiri munsi yo mu Ruhina, ari na cyo gikomeza kigahura n’icya Rugeramigozi mu Karere ka Muhanga.

Uwo musore yavumbitswe muri iryo tanura arara ashya kugeza ubwo igice cy’amaguru cyari gisigaye cyakuwemo mu gitondo cy’uyu wa Gatanu tariki ya 16 Nzeri.

Umuturage muri ako gace uwo musore yahiriyemo yatangarije IGIHE ko urebeye ku bisigazwa by’umubiri we, ntabwo yaba yahiriye muri iryo tanura by’impanuka, ahubwo ngo nta washidikanya ko yaba yatswitswe nkana.

Ibi kandi anabishingira ku kuba itanura riba rifite abarigenzura, bakaba bagombaga kuba bamutabaye, bityo abakurikiranaga iryo yahiriyemo bakaba ari na bo ba mbere bakwiye kubazwa iby’urupfu rwa Gakuru.

Vedaste Habinshuti, Umunyamabanga Nshingwabikorwa w’Umurenge wa Shyogwe yatangarije IGIHE ko yahamagawe mu masaha y’ijoro ubwo yari mu nama, abanza gushidikanya ku byo bari kumubwira, ariko nyuma ajyayo yibwira ko niba byanabayeho, uwo muntu yatabarwa akagezwa kwa muganga.

Ati “Saa mbili n’iminota nka 15 nahamagawe n’umuyobozi w’Umudugudu wa Karama, Akagari ka Ruli yampamagaye, ambwira ko hari umuntu batwitse mu itanura ry’amatafari, jye numvaga ibyo bari kumbwira bidashoboka nkibwira ko ari umuntu uhiye akantu gato.”

Uwo muyobozi ngo yahise ajyanayo na Polisi, bahageze basanga ni amaguru yonyine asigaye, igice cyo hejuru cyari cyikunjakunje kandi cyabaye amakara, umutwe wo wari wahiye washize burundu.

Mu kubaza amakuru ku rupfu rwa Gakuru, ngo abagabo batatu bashinzwe gucunga iryo tanura bo bitanaga ba mwana, aho umwe yavugaga ko atari ahari ibyo biba, undi na we akavuga ko yari yagiye iwe gufata ifunguro rya nimugoroba, ibyo bikaba byatumye bahita banafatwa ngo babe ari bo baherwaho mu iperereza mu gihe nyiri itanura we atari hafi aho.

Kugeza ubu ntihazwi niba uwo muntu yarasesetswe mu itanura ari muzima cyangwa niba yarabanje kwicwa, ibyo bikaba ari bimwe mu bizagaragazwa n’iperereza Polisi yahise itangira gukora.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza