Muhanga: Perezida w’Abunzi yafatiwe mu cyuho aha ruswa umukozi wa RIB

Yanditswe na Akimana Jean de Dieu
Kuya 31 Gicurasi 2018 saa 07:48
Yasuwe :
0 0

Kuri Sitasiyo ya Polisi ya Nyamabuye hafungiye Perezida w’Urwego rw’Abunzi mu Kagali ka Nganzo, Umurenge wa Muhanga, Akarere ka Muhanga, akurikiranweho gushaka guha ruswa umukozi w’Urwego rw’Igihugu rushinzwe Ubugenzacyaha (RIB).

Uyu mwunzi ashinjwa ko yatanze ruswa nyuma yo gukora impapuro mpimbano mu manza yaciye z’ababuranyi, zanagize ingaruka mu nkiko zisumbuye, ashaka ko adakurikiranwa.

Umuvugizi wa RIB, Mbabazi Modeste, yavuze ko Perezida w’Abunzi yafashwe aha ruswa Umugenzacyaha mu kabari.

Yagize ati “Umugenzacyaha wacu yakoranye n’abandi bakorana uyu mugabo afatanwa aya mafaranga arimo kuyamuha ngo amushimire ko yamufashije ntibamufunge kubera gukora impapuro mpimbano; ikindi ni uko n’aho yakoreraga mu bunzi ashobora kuba yarabikoze kuko izi mpapuro zagize ingaruka kuri uru rubanza. Abagenzacyaha bacu bazi icyo ruswa aricyo nicyo ikora ndetse bazi ingaruka yabagiraho mu mwuga wabo no ku gihugu cyacu."

Yongeraho ko bibabaje kubona umuntu ushinzwe kurwanya ruswa ariwe uhindukira akayitanga.

Mbabazi ati" Birababaje kubona uwakagombye kurwanya itangwa rya ruswa ariwe uyitanga, ndasaba Abanyarwanda kwibuka indangagaciro tukazishyira imbere kandi bakadufasha kwerekana abakora ibyaha kuko kubahishira ni ukugira nabi , uba woreka igihugu cyawe ".

Uyu mwunzi yemera ko yumvikanye n’umukozi wa RIB, amuha igice cya mbere ku mafaranga angana n’ibihumbi 150,000 Frw bari bumvikanye kugira ngo icyaha cy’impapuro mpimbano yari akurikiranyweho kimuveho.

Yagize ati “Twaciye urubanza ariko ntitwasinya nyuma turasinya ariko tutitaye ku matariki uru rubanza rwaciriwe; ni ubujiji bwabayeho. Bigaragaye ko habayemo amakosa nshaka uko mvugana na Ndahimana Frodouard umukozi w’uru rwego (RIB) ko yabyoroshya nkamuha amafanga ibihumbi 150 kugira ngo adakomeza gukurikirana iri koreshwa ry’impapuro mpimbano. Nazanye aya mbere ndayamuha nyuma nzana andi ibihumbi 58000 barayamfatana, gusa ntabwo navuga ko ari ruswa kuko twari twumvikanye, nyuma mfatwa ngiye kuyamuha nzanwa gufungwa."

Uyu Perezida w’’Abunzi acumbikiwe na Polisi mu gihe iperereza rikomeje.

Icyaha cy’impapuro mpimbano akurikiranweho gihanishwa igifungo cy’imyaka itanu kugeza kuri irindwi naho icya ruswa kigahanishwa imyaka itanu kugera kuri irindwi n’ihazabu yikubye inshuro 10 z’amafaranga yatanze nka ruswa.

Umuvugizi wa RIB, Mbabazi Modeste

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza