Muhanga: Abagore bari mu buyobozi bashimwa umusanzu mu guhashya amakimbirane mu ngo

Yanditswe na Mukaneza M.Ange
Kuya 23 Kamena 2018 saa 09:13
Yasuwe :
0 0

Bamwe mu baturage batuye mu Karere ka Muhanga bemeza ko kuba abagore bari mu myanya y’ubuyobozi by’umwihariko ifata ibyemezo, bimaze gutanga umusanzu ugaragara mu guhashya amakimbirane agaragara mu ngo.

Ibi aba baturage babitangaje ubwo basurwaga n’Abanyamakuru bari mu mahugurwa n’Ikigo gishinzwe Itangazamakuru, MHC ku birebana no gushishikariza abagore kugira uruhare mu matora.

Uwineza Claudine utuye mu Mudugudu wa Rwamaraba mu kagali ka Mubuga, mu Murenge wa Mubuga, yavuze ko uko umugore yumva ibibazo by’abaturage bitandukanye n’uko bigenda ku mugabo.

Ati “Mu mudugudu wacu turabafite babiri, kubera ko haba hari nk’ingo zitabanye neza, biroroha kubagezaho ikibazo ndetse bakagufasha kugikemura. Urumva kubera ko aba ari mugenzi wawe iyo umubwiye ikibazo agutega amatwi cyane ko nawe aba azi ibibazo abagore bahura nabyo.”

Gakuru Rose utuye mu mudugudu wa Matsinsi we yavuze ko abona ihohoterwa ryaragabunutse kubera ko abari mu myanya y’ubuyobozi barushaho kubasobanurira uburenganzira bwabo, ariko na none bakabagira inama ku buryo bakwitwara ngo ibyo bakeneye kandi bemerewe babibone kandi ntihavuke ubwumvikane buke hagati y’abashakanye.

Bizimana Céléstin utuye muri uyu mudugudu nawe yahamije ibyavuzwe n’aba bagore, avuga ko bigoye kuba umugore yatinyuka ngo abwire umugabo ikibazo nyakuri kiri mu rugo rwe ariko iyo ari mugenzi we byoroha.

Ati “Ikindi abagore barashoboye iyo biyemeje gukora ikintu bakigeraho koko, kandi burya iyo umugore yamaze gusobanukirwa biroroha kuzuzanya mu kubaka urugo rwabo n’igihugu cyacu.”

Ibyatangajwe n’aba baturage kandi byashimangiwe n’Umuyobozi w’Umudugudu wa Matsinsi, Musabyimana Emmanuel, wavuze ko nyuma yo kubona uruhare rwabo mu kurwanya no guhashya ihohoterwa mu ngo, byanatumye izi gahunda bazinjiza mu matsinda y’abagore agamije kwizigama.

Ati “Iyo umugore atanze ubutumwa biroroha ko bagenzi be babwumva, burya abagore bashobora kuvugana byinshi abagabo batavugana. Ikindi burya bafitanye amabanga menshi arebana n’urugo, ndetse n’imbogamizi zishobora gutuma umugore ajya mu mirimo ibyara inyungu n’imyanya y’ubuyobozi.”

Musabyimana avuga ko muri uyu mudugudu ayoboye ihohoterwa rikunze kuhagaragara usanga rishingiye kugushaka kwikubira imitungo, ndetse n’ubusinzi bugaragara ku bagabo.

Nubwo abagore bamaze kugera mu buyobozi bashimirwa umusanzu ukomeye bakomeje gutanga mu kubaka no gutanga umusanzu mu iterambere ry’igihugu, haracyagaragara icyuho mu mibare y’abajya mu myanya y’ubuyobozi isa n’ikomeye.

Mu nama nyunguranabitekerezo yahuje Urwego rushinzwe iyubahirizwa ry’ihame ry’uburinganire n’ubwuzuzanye mu Rwanda, GMO, Komisiyo y’igihugu y’Amatora, NEC n’abandi bafatanyabikorwa muri Mata, hatanzwe urugero ku myanya y’abashinzwe imibereho myiza y’abaturage mu turere bariho icyo gihe aho muri 30, abagore bari 22 n’aho abashinzwe ubukungu bakaba bari batanu gusa (uturere tubiri two ntitwari dufite abayobozi kuri uyu mwanya).

Gakuru avuga ko abagore bari mu myanya y'ubuyobozi mu mudugudu wabo babafasha gukemura ibibazo biri mu ngo nta makimbirane abayeho
Umuyobozi w’Umudugudu wa Matsinsi, Musabyimana Emmanuel, nawe yemeranya n'abaturage ayobora

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza