Mugombwa: Impunzi z’Abanyekongo zasanganije HCR ikibazo cy’ingutu

Yanditswe na Jean Pierre Tuyisenge
Kuya 28 Nzeri 2016 saa 02:17
Yasuwe : XX
0

Umuyobozi w’Ishami ry’Umuryango w’Abibumye ryita ku Mpunzi (UNHCR) Saber Azam, Minisitiri ushinzwe gucyura impunzi no gukumira ibiza mu Rwanda Seraphine Mukantabana, n’abandi bahagarariye ibihugu byabo mu Rwanda basuye inkambi y’impunzi ya Mugombwa iherereye mu Karere ka Gisagara, icumbikiye abanye-Congo basaga 9000 ku wa 22 Nzeri 2016, bagezwaho ikibazo cy’amashitingi ashaje.

Abayobozi bahagarariye ibihugu byabo mu Rwanda barimo uw’u Bwongereza, u Buyapani, u Bubiligi, u Buholandi, Misiri, Leta Zunze Ubumwe z’Amerika, n’abari bahagarariye ambasade z’ibihugu bya Korea n’u Budage.

Kimwe mu bibazo bagaragarijwe, ni nk’aho zimwe mu mpunzi zigifite imiryango iba mu mashitingi ahurirwamo n’abantu benshi kandi akaba agaragara nk’ashaje.

Ubuyobozi bwa UNHCR ndetse na MIDIMAR bwemera ko ibi bishobora kuba imvano y’indwara zitandukanye ndetse bikanongera umwanda, gusa bavuzeko bagiye kugikemura byihutirwa.

Izi ntumwa zafatanyije n’impunzi imirimo yo kubaka imwe mu nzu zo guturamo ndetse banatera ibiti muri iyo nkambi. Banaboneyeho umwanya wo kuganira n’izi mpunzi zaturutse muri Burasirazuba bwa Congo mu myaka ya 2012 na 2013.

Uru rugendo rwakozwe nyuma y’Inteko rusange y’Umuryango w’Abibumbye yateranye kugira ngo higwe ku Kibazo cy’Impunzi n’Abimukira (UN General Assembly Summit for Refugees and Migrants) yabaye kuwa 19 Nzeri 2016.

Nyuma y’uru ruzinduko, Leta y’u Rwanda yatangaje ko ifite gahunda yo kubungabunga imibereho y’impunzi zirurimo; aho rwari rwitabiriye inama y’Abayobozi yateguwe na Perezida Barack Obama wa Leta Zunze Ubumwe z’Amerika yari igamije kwiga ku kibazo cy’impunzi cyugarije Isi [President Barack Obama’s Leaders’ Summit on the Global Refugee Crisis], tariki ya 20 Nzeri 2016.

Muri iyi nama hari hatumiwemo ibihugu bigaragaza umuhati mu kwita ku mpunzi. U Rwanda rwavuze ko rufite gahunda yo gushyigika iterambere ry’imibereho y’impunzi, ruzifasha kwishyira zikizana mu bandi baturage ndetse hakabaho ubutwererane ku mpande zombi.

Zimwe muri gahunda zatangajwe harimo gushyira abana b’impunzi mu mashuri ya Leta bakigana n’ab’Abanyarwanda kuva mu mashuri y’incuke kugera mu yisumbuye, no gushyigikira impunzi kwigira no kugira uruhare mu mibereho yazo binyuze muri gahunda ya UNHCR na MIDIMAR.

Leta y’u Rwanda kandi yiyemeje guha buri mpunzi yose iri mu Rwanda ikarita iyiranga, kandi izibarizwa mu mijyi zikaba zigiye guhabwa uburenganzira ku kugira ubwisungane mu kwivuza nk’abandi banyarwanda bose. Uhagariye UNHCR mu Rwanda Saber Azam, yashimiye Leta y’u Rwanda kuri izi gahunda, ndetse anizeza imikoranire myiza hagati yayo na UNHCR ahagarariye.

Yagize ati “Gahunda za Leta y’u Rwanda mu gushakira impunzi ibisubizo zitwereka ko zitaweho muri Afurica ndetse no ku Isi yose. Izi gahunda zikurikije inshingano n’ibikorwa bya UNHCR muri gahunda yayo yo kuzifasha kudahora ziteze amaboko ahubwo zikaba zakwinjizwa muri gahunda y’igihugu, zigatanga umusanzu mu kwizamura, zinateza imbere igihugu cyazakiriye.”

Ku bufatanye na MIDIMAR, UNHCR ishinzwe kwita ku mpunzi aho ibungabunga ubuzima bw’izisaga ibihumbi ijana na mirongo itandatu na bitanu [165,000] zibarizwa mu nkambi 6 ndetse no mu mijyi itandukanye mu Rwanda. UNHCR itangaza ko ifasha ibihumbi n’ibihumbi by’abanyarwanda bifuza gutahuka, aho muri uyu mwaka wa 2016, ngo abasaga 3,500 bamaze gutahuka.

Mu nkambi zitandukanye mu gihugu, UNHCR itangaza ko ikorana n’Ishami ry’Umuryango w’Abibumbye ryita ku Biribwa [World Food Program], rigenera impunzi ibyo kurya. Ivuga ko muri uyu mwaka, ifatanyije na WFP ikomeje guteza imbere gahunda yo guha abantu amafaranga aho kubaha ibyo kurya. Ibi ngo bikazafasha impunzi kwimenyereza umuco wo kugenga imibereho yazo kurusha kuba zategereza guhabwa ibyo kurya gusa, bikazazifasha kwigira ndetse no kwiteza imbere, banazamura urwego rw’imirire mu miryango yabo.

U Rwanda ruri mu bihugu 50 byitabiriye inama y’Abayobozi yateguwe na Perezida Barack Obama igamije kwiga ku kibazo cy’impunzi kuri ubu cyugarije isi, icyenda gusa akaba ari byo byari bihagariye umugabane wa Afurika.

Abayobozi bafatanyije n'impunzi kubaka inzu mu nkambi
Impunzi zo mu nkambi ya Mugombwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza