Kwamamaza

Mugimba na Iyamuremye bakurikiranyweho Jenoside, mu nzira bazanwa mu Rwanda

Yanditswe kuya 12-11-2016 saa 12:20' na Karirima A.Ngarambe na Deus Ntakirutimana


Abanyarwanda babiri, Mugimba Jean Baptiste na Iyamuremye Jean Claude babaga mu Buholandi, bakurikiranyweho ibyaha bya Jenoside yakorewe Abatutsi bategerejwe mu Rwanda uyu munsi tariki ya 12 Ugushyingo 2016.

Umushinjacyaha Mukuru wa Repubulika y’u Rwanda, Muhumuza Richard yatangaje ko byari biteganyijwe ko aba bagabo bazanwa mu Rwanda uyu munsi.

Ambasade y’u Rwanda mu Buholandi yatangaje ko aba bombi bamaze guhaguruka berekeza mu Rwanda.

Yashimye icyizere ubutabera bw’u Buholandi bwagiriye ubw’ u Rwanda, kandi ko iyi ari intambwe nziza ikomeye Leta y’u Buholandi yerekanye ko inzego z’ubutabera zakoze akazi kazo neza.

“Ni urugero u Buholandi bwerekanye ku bindi bihugu biteganya kohereza abakekwaho ibyaha nk’ibi bya Jenoside yakorewe Abatutsi.Turashimira cyane Leta y’u Buholandi uko yitwaye muri iki kibazo kugeza ubwo aba bombi boherejwe uyu munsi."

Perezida wa Ibuka mu Buholandi, Mundele Christian ati “Twishimiye ko ubutabera bw’u Buholandi bwagiriye ubutabera bw’ u Rwanda icyizere.”

Iyamuremye uzwi ku izina rya Nzinga, yabaga muri Vooborg mu Buholandi, aza gufatwa na Polisi yaho ku busabe bw’u Rwanda, ashinjwa kugira uruhare mu iyicwa ry’Abatutsi bari bahungiye muri ETO Kicukiro.

Umunyamabanga Mukuru wa Komisiyo y’Igihugu yo kurwanya Jenoside Dr Jean Damascene Bizimana yavuze ko ari inkuru ishimishije.

“Ni inkuru nziza kuri twebwe, kuko ni dosiye imaze igihe u Rwanda rusaba ko boherezwa, ibyemezo byari byarafashwe ariko u Buholandi bugatinda kubishyira mu bikorwa, icyo abantu bakwishimira ni ukubona ibihugu by’amahanga byizera ubutabera bw’u Rwanda.”

Dr Bizimana yakomeje avuga ko bitanga n’isomo ku bibwira ko bakora ibyaha bikomeye ntibakurikiranwe.

Ati “Bitanga isomo ko iyo abantu bakoze jenoside bagahungira mu mahanga bibwira ko bacitse ubutabera, boherezwa mu gihugu bakoreyemo Jenoside kugira ngo babe ari ho bakurikiranirwa icyo cyaha bakoze.”

Iryo yoherezwa kandi ngo ni inzira iganisha ku bumwe n’ubwiyunge, cyane ku miryango y’abakorewe icyaha.

Ati “Binafasha gutanga ubutabera ndetse n’ubumwe n’ubwiyunge, kuko abakorewe icyaha bagira umwanya wo gutanga amakuru batabikoreye mu mahanga, bikabafasha kongera kwiyubaka no kwakira ibikomere baba baratewe na Jenoside.”

Ku bijyanye n’ibyaha bakekwaho, Dr Bizimana yakomoje kuri Mugimba n’ibyo CNLG igaragaza ko yakoze.

Ati “Mugimba yari umwe mu bayobozi bakomeye ba CDR, aho yari umwe mu bayobozi baryo aho yari atuye mu Nyakabanda ayobora impuzamigambi zaho. Yagize uruhare gutanga intwaro, kugaba ibitero no kubiyobora, kubona umuntu nk’uwo uri mu bantu bayoboye jenoside azanwa mu Rwanda , ni ikintu cyo kwishimira mu rwego rw’ubutabera.”

Uyu mugabo wanakoraga muri Banki Nkuru y’u Rwanda(BNR) ngo yari umwe mu barwanashyaka ba CDR, Ishyaka rishinjwa kugira uruhare muri Jenoside, ribicishije mu bikorwa byo kubiba urwango no gukangurira abahutu kwica abatutsi.

Iyamuremye ashinjwa kugira uruhare mu bwicanyi bwakorewe muri Eto Kicukiro hafi y’aho yari atuye bwahitanye abagera ku 2000, ubwo ingabo za Loni zimukaga muri iryo shuri.

Bizimana kandi yishimiye iyo ntambwe itewe n’ubutabera bw’u Buholandi yemeza ko banasanzwe banakorana neza kimwe n’ubw’ibindi bihugu, ariko ngo u Buholandi by’umwihariko basaba CNLG ibimenyetso, ibyo ibonye ikabigeza ku butabera bw’icyo gihugu ndetse baba bashaka n’abatangabuhamya bukabahabwa kimwe n’ibimenyetso byagaragajwe mu gihe cy’Inkiko Gacaca.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved