Mu Rwanda hatangijwe ihuriro rizateza imbere ibijyanye n’itangazamakuru

Yanditswe na Kanamugire Emmanuel
Kuya 20 Ukwakira 2016 saa 03:43
Yasuwe :
0 0

Ibihugu bisaga 40 byo muri Afurika,Caraïbes na Pacifique biteraniye mu Rwanda mu nama itangirizwamo ihuriro rigamije guteza imbere ibijyanye n’itangazamakuru mu Rwanda, Kigali Media Club’.

Iryo huriro ryitezweho inyungu zitandukanye mu gihugu ku bijyanye no gutangaza amakuru ahuje n’ukuri ku Rwanda no mu bihugu bigize umuryango mugari wa Afurika, Caraïbes na Pacifique.

Umuyobozi w’Ikigo cy’Igihugu gishinzwe imiyoborere(RGB), Prof Shyaka Anastase yavuze ko u Rwanda n’ibihugu birihuriyemo bizungukiramo byinshi birimo kumenyana no guhuza imbaraga.

Ati “U Rwanda n’ibindi bihugu bimwe hari ikibazo cy’uko inkuru zibivugaho ziba zakozwe n’abanyamakuru b’ahandi, rimwe usanga batanabizi neza cyangwa badafite ukuri nyako.”

Yongeyeho ati “Kwegerana n’aba bantu bituma bagenda bamenyana, uri ahantu runaka ushaka gukora inkuru ku Rwanda afite uwo ahazi azamubaza ati ‘ibi n’ibi bite?’ Amuhe amakuru yakozwe n’ikinyamakuru cyo mu Rwanda, ayo makuru agera n’ahandi ashingiye ku nkuru yakozwe na nyir’ubwite uyizi uyicukumburira, na bo bigatuma batangaza amakuru y’igihugu batagezemo ariko bahawe n’uwo bizeye ufite ubunyamwuga.”

Yabwiye abitabiriye iyo nama ko u Rwanda rwahagurukiye politiki igamije guteza imbere itangazamakuru, haba ku bijyanye n’ubwisanzure bw’abanyamakuru, kubongerera ubushobozi no gushyiraho itegeko rigenga itangazamakuru mu Rwanda.

Mu kiganiro n’abanyamakuru, Shyaka yagize ati “Itangazamakuru ryo mu Rwanda ryarihuse cyane ryishatsemo ibisubizo, habayeho gushyiraho amategeko, urwego rwarakuze rugira abashoramari[…].Icyo nzi ni uko muri ino myaka itatu ishize urwego rw’itangazamakuru rwateye intambwe ikomeye nubwo ibibazo bitarangiye, dore ko ntaho birangirira umunsi umwe.”

Umuyobozi Ushinzwe Uburenganzira bwa muntu mu mpuzamashyirahamwe mpuzamahanga y’Abanyamakuru (FIJ), Ernest Sagaga yavuze ko u Rwanda ruzungukira byinshi muri iri huriro.

Ati “Ni ikintu gikomeye cyane nishimira ku giti cyanjye, kuko buriya ntabwo umutwe umwe wigira inama, abanyamakuru bakeneye n’urundi rubuga rwa bagenzi babo baciye mu bihe nk’ibyo turimo gucamo uyu munsi kugira ngo batubwire uko bitwaye mu bibazo ibi n’ibi.”

Sagaga yakomeje avuga ko u Rwanda rugiye mu rugaga ruzafasha abaruririmo kunguka ubumenyi bazajya basangira, ubushobozi bunyuranye ndete n’ubuvugizi.

Sagaga yavuze ko abanyamakuru basaga 400 bamaze kwicwa muri Afurika mu myaka itanu ishize, byerekana ko uburenganzira bwabo butubahirizwa uko bikwiye.

Ambasaderi w’Umuryango w’Ubumwe bw’u Burayi(EU),Michael Ryan yasabye ko iryo huriro riba umwanya mwiza wo gukemura ibibazo bitandukanye abanyamakuru bahura nabyo ku Isi, birimo ihungabanywa ry’uburenganzira bwabo.

Kigali Media Club yatangijwe uyu munsi iyobowe na Safari Gaspard, wavuze ko igizwe n’abanyamuryango 23 barimo abahoze bakora itangazamakuru,abadiplomate,abari mu bikorwa bitandukanye by’ubucuruzi n’abandi.

Iryo huriro rizaba umurongo uhuje abantu batandukanye mu Rwanda, mu karere no ku Isi ugamije guteza imbere isura nziza y’u Rwanda.

Iryo huriro ngo ntirije gukorana n’abanyamakuru by’umwihariko, ariko ngo hari isano iri hagati yaryo n’amashyirahamwe yabo, rikaba rinafite inshingano zo kuzamura ubunyamwuga n’ubushobozi bw’abanyamakuru.

Uwari uhagarariye Umunyamabanga Mukuru wa ACP, Amb. Mamour Alieu Jagne(ibumoso)
Umuyobozi Mukuru wa RGB, Prof Shyaka Anastase(hagati)
Ambasaderi w’Umuryango w’Ubumwe bw’u Burayi(EU),Michael Ryan(wa kabiri uhereye ibumoso)
Umuyobozi Ushinzwe Uburenganzira bwa muntu mu mpuzamashyirahamwe mpuzamahanga y’Abanyamakuru (FIJ), Ernest Sagaga
Safari Gaspard, Umuyobozi wa Kigali Media Club(ubanza) n'Umunyamabanga Mukuru w'Ihuriro y'ibijyanye n'itangazamakuru ku Isi, Jaroslaw(iburyo)

Amafoto:Luqman Mahoro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza