Kwamamaza

Haracyari icyuho cy’abaganga bake, imbogamizi ku ntego z’icyerekezo 2020

Yanditswe kuya 8-09-2016 saa 12:22' na Niyonsenga Schadrack


Mu minsi ishize Leta y’u Rwanda yohereje abaganga batandukanye gukorera mu bice bitandukanye, gusa haracyari ikibazo cyo kuzamura umubare w’abaganga bakiri bake ku isoko mu gihugu mu guharanira kuzuza ibisabwa ku rwego mpuzamahanga mu bijyanye n’ubuvuzi.

U Rwanda rwihaye intego y’uko mu mwaka wa 2020 byibuze umuganga umwe yazaba yita ku baturage 10000.

Ishami ry’Umuryango w’Abibumbye ryita ku Buzima ku Isi[OMS] rivuga ko byaba byiza cyane ari uko abaganga hagati ya 2 na 3 bafashije abaturage 1000, icyakora mbere y’uko ibi bigerwaho uyu muryango wasabye ibihugu byo ku Isi byose ko nibura abantu igihumbi bakwitabwaho n’umuganga umwe gusa ibi nabyo biracyari kure ku isi yose.

Ubugenzuzi bw’uyu muryango kugeza ubu bugaragaza ko ibihugu 44% biwugize ari byo byamaze kugera ku kigero cy’umuganga umwe wita ku barwayi 1000.

Mu cyumweru gishize, Minisiteri y’Ubuzima mu Rwanda [MINISANTE] yohereje mu kazi abaganga 94 bari bamaze umwaka bimenyereza umwuga w’ubuvuzi ndetse n’abandi 74 boherejwe gutangira umwaka wo kwimenyereza nk’uko byasobanuwe n’Umunyamabanga wa Leta muri Minisante,Patrick Ndimubanzi.

Yagize ati “Abaganga boherejwe bazongera umubare w’inzobere mu by’ubuvuzi mu gihugu,gusa turacyafite icyuho cy’abaganga.”

Inama y’Igihugu y’abaganga b’indwara zisanzwe n’ab’amenyo [RMDC], itangaza ko aba baganga bashya bongerewe ku basanzwe bagera ku 1,176 bavuraga indwara zisanzwe ndetse n’abandi 495 b’inzobere mu by’ubuvuzi (specialists).

The Eastafrican dukesha iyi nkuru itangaza ko kugeza ubu mu Rwanda ijanisha ryakorewe ku baturage miliyoni 12 batuye mu gihugu ryerekana ko umuganga umwe yita ku barwayi ibihumbi cumi na bibiri, iyi ikaba ishobora kuba imwe mu mpamvu zituma serivisi zo mu mavuriro zitihuta.

Intumbero u Rwanda rwari rwihaye kuva mu mwaka wa 2012 nyuma y’ibarura rusange ry’abaturage yerekanaga ko mwaka wa 2020 igihugu kizaba gituwe n’abaturage miliyoni 12.7.

Ibi bisobanuye ko mu myaka itatu isigaye u Rwanda rukeneye byibura kujya rwohereza mu kazi abaganga 80 ku mwaka, mu rwego rwo gushyira mu bikorwa gahunda rwihaye mu 2020.

Nubwo hakenewe abaganga bangana gutyo kugeza ubu imibare y’abanyeshuri bari muri Kaminuza y’u Rwanda biga ubuganga yerekana ko guhera ubu kugeza muri 2020 iyi kaminuza izaba imaze gutanga abasaga 90 gusa, nabo bose badashobora guhita bajya mu kazi kuko hari n’abazakomeza amasomo yabo.

Icyakora nk’igisubizo kuri iki kibazo mu Rwanda hamaze gutangira indi Kaminuza y’i Gitwe nayo yigisha ibijyanye n’ubuvuzi.

Ku rundi ruhande kandi Leta igomba guhangana n’urwego rw’abikorera kuko byagaragaye ko hari umubare w’abize ubuganga bahitamo kwikorera ku giti cyabo cyangwa bagakorera indi miryango itegamiye kuri leta nayo ifite aho ihurira n’iby’ubuzima.

Agaruka kuri iki kibazo, Dr Emmanuel Rudakemwa uyobora ihuriro ry’abaganga b’indwara zisanzwe n’abavura amenyo yatangarije abaganga ati “ Twakomeje kumva abaganga bitotomba ariko turi gushakisha uko mwabaho neza. Leta ntiyabatanzeho amafaranga kugira ngo izababure.”

Muri 2014, Minisiteri y’Ubuzima yatangije ingamba nshya zo kongerera abaganga ubushobozi ndetse n’imishahara.

Nubwo Minisiteri y’Ubuzima isaba ko umubare w’abaganga wakwiyongera mu gihugu, OMS yatangaje ko ibihugu byinshi bigomba gukemura ikibazo cy’umubare w’abaganga bakiri bake ndetse n’ireme ry’ubuvuzi riri hasi mu rwego rwo gusigasira ubuvuzi bugezweho.

Abaganga ku bitaro bya Butaro bita ku murwayi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved