Kwamamaza

Imodoka 30 zidasanzwe zorohereza abamugaye zigiye kwinjizwa n’iyahoze ari ONATRACOM

Yanditswe kuya 30-11-2016 saa 10:03' na Nsengimana Evariste


Umuyobozi Mukuru ushinzwe ishami ryo gutwara abantu n’ibintu muri Minisiteri y’Ibikorwaremezo, Mutabazi Peterson, avuga ko mu rwego rwo gukomeza gufasha abafite ubumuga kubona serivise zitandukanye, hatangiye gushyirwa ingufu no mu gutumiza imodoka zifite uburyo bworohereza abamugaye kuzigendamo byoroshye.

Ibi byatangarijwe mu biganiro abahagarariye abafite ubumuga n’ibigo bifite aho bihuriye n’ibikorwaremezo bagiranye ku wa Kabiri, hagamijwe kungurana ibitekerezo no kugenzura uburyo abafite ubumuga boroherezwa gukoresha ibikorwaremezo.

Uyu kandi wari umunsi wa Gatatu mu cyumweru cyahiriwe ibikorwa by’abafite ubumuga cyatangiye ku wa Gatandatu tariki 26 Ugushyingo.

Hagarutswe ku kibazo cy’imodoka usanga zidafite uburyo bworohereza abafite ubumuga kuzigendamo, ku buryo usanga bibabangamiye.

Kuri iki kibazo, Mutabazi avuga ko cyatangiye gushakirwa umuti, ku buryo ngo kuri ubu hari imodoka zatumijwe basabye ko zizaba zifite ubwo buryo, kandi ngo byarakozwe.

Ati "Ubu imodoka ziri gutumizwa zose, twumvikanye ko zigomba kuza zifite aho abamugaye bagomba kwinjirira bakanasohokera, nk’imodoka nshya 50 zatumijwe na RITCO (yahoze ari ONATRACOM), 30 muri zo zizaza zifitemo hahandi n’abafite ubumuga babasha kuzigendamo […] ubwo n’abandi bantu bari kugura imodoka zo gutwara abantu mu buryo bwa rusange nabo niyo mabwiriza bafite."

Avuga kandi ko bakangurira n’abakora imirimo yo kwigisha abantu ibinyabiziga kwibuka kugura ibinyabiziga byorohereza abafite ubumuga kubyiga kimwe n’abandi.

Mutabazi kandi avuga ko bagomba gushyiraho ibisabwa (standard) ku binyabiziga, cyane hagamijwe kwita ku bafite ubumuga, byose avuga ko bizaba byagezweho mu mpera z’umwaka utaha.

Muri iyi nama hanagarutswe ku kibazo cy’inzu ziba zarubatswe kera nta nzira z’abamugaye zifite, bakavuga ko inzira zindi zongerwaho nyuma byitwa kuborohereza hari aho usanga ziba ari iza nyirarureshwa, bityo bakavuga ko bikwiye guhinduka.

Mutabazi avuga ko hashyizweho itsinda ryo kugenzura niba inzu zubakwa zujuje ibisabwa, byose bizunganirwa n’amahugurwa ku bantu b’ingeri zinyuranye.

Yagize ati “Ikibura ni ubumenyi. Usanga abakozi ba Leta bagenda hakazamo abashya, ugasanga abo wahuguye baragiye hajemo abandi batabizi kandi batagomba guhagarika akazi, abafite inshingano zo gutanga uburenganzira bwo kubaka bagomba guhabwa amahugurwa ahagije, bagashishikarizwa kumva ko mu bikorwaremezo batangira uburenganzira bwo kubaka, bagomba kwita ku bikorwa bijyanye n’aho abafite ubumuga bagomba kunyura n’ikoreshwa ry’izo nzu […] Na ba rwiyemezamirimo batandukanye bashinzwe gukora inyigo nabo birabareba.”

Mutabazi akomeza avuga ko Minisiteri y’Ibikorwaremezo, abafite ubumuga n’Ikigo gitsura Ubuziranenge, bagomba gushyiraho ibisabwa mu kubaka byemewe ku rwego mpuzamahanga ku buryo bizorohereza abafite ubumuga baba abo mu Rwanda cyangwa mu mahanga.

Bukebuke Aimable, umuyobozi w’ihuriro ry’abanyamakuru batanga ubuvugizi ku bantu bafite ubumuga wari witabiriye ibyo biganiro, yavuze ko ari ingenzi kuko harebwa imbogamizi abafite ubumuga bahura nazo bikanafatirwa ingamba mu ruhame.

Abitabiriye iyi nama bavuga ko inyubako zose zubakwa zikwiye gushyirwamo ahagenewe abamugaye
Mutabazi Peterson asaba abantu batumiza ibinyabiziga kuzana ibizorohereza abafite ubumuga

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved